13
De mee e nnoa ai lo te ungaalodo
1 Gai Tagi Maolunga ne hai mai gi de au, “Hannoo hagao ina dahi malo linen ga nnoa ai doo ungaalodo, aagai koe e dee hagassui de malo nei.” 2 Gai au ne hagao dahi malo ga nnoa ai lo togu ungaalodo, bei de hai a Tagi Maolunga gu tala mai ai laa.
3 Gai Tagi Maolunga ga hagaago mai ana muna gi de au i de lua hanonga, ga hai mai, 4 “Gaavee de mee nnoa ungaalodo aau ne hagao naa ma gu nnoa ai doo ungaalodo, gai koe ga kave gi ssaalingaa vai go Euphrates, ga hagammuni ai i magavaa o denga hadu.” 5 Gai au ga hano ga hagammuni de malo laa i gaogao o Euphrates, bei de hai a Tagi Maolunga gu tala mai ai.
6 Gai dua huu hanu laangi lagolago gai Tagi Maolunga ga hai mai, “Hannoo gi Euphrates hagaahea mai ai de mee nnoa ungaalodo aagu ne hai adu laa koe gi gaavee gi hagamuunia i kilaa.” 7 Gai au ga hano gi Euphrates ga geli age de mee nnoa ungaalodo laa i de mommee aagu ne hagammuni ai laa, ga hagaahe mai, gai de malo laa gu bobo donu ma gu deai ono haigamaiana.
8 Gai Tagi Maolunga ne tala mai ana muna, ga hai mai, 9 “E hagadaba Tagi Maolunga: De mee nnoa naa gu bei donu dagu hai e oha ai de mee o Judah e hagasoenga ai laa, aama de mee o Jerusalem e hagasoenga ai laa. 10 De hagabuulingaa dangada baubau nei tee llodo e hagallongo mai gi de au, gai ne hagamakaga olaadeu lodo, gai ne hulo ga daudali ange i denga diinonga ma de daumaha ange gi gilaadeu, e bei donu dagodo o de mee nnoa ungaalodo nei — gilaadeu gu deai donu olaadeu haigamaiana! 11 Gai e bei de mee e nnoa ai laa lo te ungaalodo o tangada, au ne nnoa ange naa dangada o Israel ma dangada o Judah gi lo togu ungaalodo, go Tagi Maolunga e hagadaba, e hai ai gilaadeu go dogu hagabuulingaa dangada, gai gilaadeu ga kave ai dogu ingoo ma de tuhi au, aama de hagamahamaha ai au. Aagai gilaadeu tee hagallongo mai gi de au.
Denga gili manu hhao uvaini
12 “Gai koe daalaa ange muna nei gi gilaadeu, ‘E hagadaba Tagi Maolunga, de Maadua o Israel: Denga ssaa alodahi e hhao naa donu ga hoohonu i uvaini.’ Gai noo gilaadeu e hai adu gi de goe, ‘Gimaadeu e iloo donu bolo denga ssaa alodahi e hhao naa gi hoohonu i uvaini!’ 13 gai koe ga hai ange, ‘E hagadaba Tagi Maolunga: Tilo, au e hai naa dangada alodahi e nnoho i de henua gi ssenga i de unu mee vii; go denga hodooligi e nnoho i honga de nohoanga o David, ma de gau haimeedabu, ma denga pelaabisi aama dangada alodahi e nnoho i Jerusalem. 14 Au e hai naa gilaadeu gi bei denga ssaa hadu e hagadau hoohoa laa; go denga damana ma denga dama alodahi, go Tagi Maolunga e hagadaba. Au e dee aloha ange naa donu, be e abodonu ange, aabe e lodo aloha ange gi gilaadeu, ga dee daa ai gilaadeu gi maakau.’ ”
De gaavee gee i de henua
15 Nnoho mai hagalaangona;
goodou aude hagamaolunga,
go hiidinga Tagi Maolunga gu hagadaba.
16 Hagamahamaha ina Tagi Maolunga doodou Maadua
i mua dana gaamai de gohu,
ma mua doodou baakuu
i honga denga mounga gohu.
Goodou e tali gi humai de maalama,
aagai ia e hai gi kona de gohu,
ma de hai gi gohu boo dangodango.
17 Aagai noo goodou e dee hagallongo mai,
gai au e dangi hagammuni naa i hiidinga doodou hagamaolunga.
Au e kona naa donu de dangi ma de ssali ogu loimada
go hiidinga de hagabuulingaa ssiibi a Tagi Maolunga gu gaavee gee i de henua.
18 Hai ange gi de hodooligi ma tinana o de hodooligi:
“Gooluu iho mage nnoho i denga nohoanga maolalo,
go hiidinga ooluu hau hodooligi mahamaha gu aau gee mai i ooluu biho.”
19 Denga aduhale i ngaage e pono naa,
gai e deai naa donu dangada e huugea.
Dangada o Judah alodahi gu gaavee gee i de henua,
gai gu odi alodahi dangada i de gaavee gee.
20 Dangage age diiloo dangada
e loomai laa i ngaiho.
Gai i hee iai de hagabuulingaa ssiibi gu gaavadu gi de goe,
go de hagabuulingaa ssiibi oou e basa hagasoenga ai laa?
21 Gai aahee naa au muna e tala i de masavaa,
aana e hai ai dangada aau ne agoago ange gi ni dagi niiou?*Gai aahee naa … gi ni dagi niiou: muna Hebrew i kinei e dee iloo danuaa dono hagadoonunga.
E aha, goodou e dee mmae naa oodou lodo,
bei de hine gu hai ono hagalangona?
22 Gai noo koe e ssili i oo lodo,
“Gu aha gu hai mai ai mee nei gi de au?” —
go hiidinga de lagolago oo baubau
ne aau gee ai oo malo
ma doo haia gi de mahi.
23 E aha, e maua e tangada Ethiopia i de sui de leebunga o dono gili,
be go de leopard i de sui denga mee daubulebule i dono gili?
Gai e bei ai hogi, goodou e dee maua donu i de hai tanuaa
go hiidinga goodou gu aabo i de hai de baubau.
24 “Au e hagasii saele naa goodou bei gili o denga grain
e ilihia saele laa i de madangi mai i de vao.
25 Deenei doodou duuhanga,
go tuuhanga aagu gu hagamodu adu gi de goe,
go Tagi Maolunga e hagadaba,
go hiidinga koe gu ngalo au
gai koe gu tali hagalodolodo ange gi denga ngadi diinonga.
26 Au e hagaui naa oo malo ga haoli ai luoo mada
gi dogaa ai goe i doo gilisau.
27 Au gu gidee dagodo o doo dagodo haisala,
ma doo senga ange gi de hai be se manu, ma dahulinga hakino gee,
i honga denga duuduu ma lodo duu malaelae.
Jerusalem, e vakaa naa goe!
Go aahee maa loo oou e maua ai gi gilimalali?”