17
De haisala ma de hagaduasala o Judah
1 “Haisala o Judah gu hagadaakodo i dahi biini baalanga,
ma de sisi i dahi mada kangi bei de diamond,
gai gu maaga ange gi olaadeu lodo,
aama honga hanga i dege o olaadeu mommee o ssigidaumaha.
2 Gai alaadeu dama goi manadua donu huu
olaadeu mommee o ssigidaumaha ma denga duludulu laagau o Asherah
i lalo denga manu ssomo
ma honga denga duuduu maolunga.
3 Dogu mounga i honga de henua,
ma oodou lava ma oodou goloa hagamogomogo alodahi,
au e hai naa oodou hagadaumee gi gaavee gee,
madali oodou mommee daumaha,
i hiidinga o denga baubau i honga doodou henua alodahi.
4 Gai go goodou donu huu ne hidi mai ai
de gaavee gee de boolonga aagu gu gaavadu gi goodou.
Au e hai naa goodou gi hai hegau ange gi oodou hagadaumee
i dahi henua oodou e dee iloo laa,
i hiidinga goodou gu hai au ma gu lili,
gai dogu lili e bei naa de ahi mmahi e ula laa ga hano ai.”
5 E hagadaba Tagi Maolunga,
“E malaia naa tangada e hagadonusia tangada,
gai dana tali go mahi o tangada,
gai ono lodo e dahuli gee mai i Tagi Maolunga.
6 Ia e bei de manu somo baa i lalo i de vao e deai laa vai iai,
e deai naa donu se mee danuaa aana e gide.
Ia e somo i de mommee e deai vai iai,
gai se henua iai soolo, e deai dangada e nnoho ai.
7 Gai e manuuia tangada e hagadonusia Tagi Maolunga,
gai go Tagi Maolunga dana tali hagalodolodo.
8 Ia e bei naa de manu somo e doo laa i gaogao de vai,
ono aga e ssomo ma e hulo gi lo te saalingaa vai.
Gai e dee madagu donu i de masavaa hagavvela;
ono lau e lau kohu i masavaa alodahi,
gai e dee manavasaa i de ngadau o tau laohie,
gai e hua i masavaa alodahi.*Psa 1.3
9 Lodo o tangada e kii ange de laumalie de hagasenga iai i mee alodahi,
gai e kona de hakino gee.
Goai e maua gi donu ange aagena?
10 Gai au, Tagi Maolunga, e tilo dagodo o de lodo
ma de hagatale maanadu a tangada,
au e hagao ange naa gi bei dagodo hegau a dahi.” *Psa 62.12; Rev 2.23
11 Tangada e hagaduulia dono lava i hegau dee heohi,
e bei dagodo o de manu lele go de partridge
e baalasi laa ga masae denga ngago aana tee haanau.
Gai de masavaa oona goi mmahi ai, gai gilaadeu ga tili ia,
gai dono hagaodi e bei dagodo o tangada lodo senga.
12 De nohoanga mahamaha, se mommee hagaamua mai i taamada age,
go taadeu mommee daumaha dabu.
13 Tagi Maolunga, go de tali a Israel,
dangada alodahi e dilia goe e dookaa naa.
Gilaadeu e daahuli gee i de goe
e bei mee e sisi i honga de gelegele ⌊e moolau laa de llilo⌋,
i hiidinga gilaadeu gu tili Tagi Maolunga,
go ssaalingaa vai iai de mouli.
14 Tagi Maolunga, hagaieiangi ina au, gi ieiangi ai au;
hagaola ina au, gi ola ai au,
i hiidinga go koe aagu e tuhi.
15 Gilaadeu e dee modu de ssili mai gi de au,
“I hee iai muna a Tagi Maolunga?
Hagassula ina ana muna!”
16 Au tee savini donu ga hano gee i hegau a tangada hagaloosi;
koe e iloo bolo au tee lodo hogi gi humai de laangi hai ngadaa.
Koe e iloo agu muna gu tala
gai e daakodo donu i mada luoo mada.
17 Aude hagamadagu ina ngau;
go koe donu dogu muuninga i de masavaa hai ngadaa.
18 Haia gi dookaa dangada e vaivai haia nei au,
aagai haia gi deai sogu hagadogaa ina;
haia gi manavasaa olaadeu lodo,
aagai haia gi dee manavasaa ogu lodo.
Haia gi dae mai de hai ngadaa gi gilaadeu,
gai haia gi lua hano e kona ai dau hagaduasala gilaadeu!
De hai gi dabu de laangi o Sabbath
19 Gai Tagi Maolunga ne hai mai gi de au, “Hannoo duu i de haitoga o de huaadangada, go de haitoga o denga hodooligi o Judah e ulu ai aama de ssao; gai koe duu hogi i denga haitoga o Jerusalem ange laa, 20 gai koe ga hai ange gi gilaadeu, ‘Goodou hagalaangona muna a Tagi Maolunga, denga hodooligi o Judah ma dangada o Judah aama dangada alodahi e nnoho i Jerusalem, gai e ulu i denga haitoga nei. 21 E hagadaba Tagi Maolunga: Goodou diiloo gi dee sabaia mai e goodou hanu mee i de laangi o Sabbath gi gaamai laa lodo haitoga o Jerusalem.*Neh 13.15-22 22 Goodou e dee hagauda mai hogi hanu mee i lodo oodou hale, aabe gi haia hanu hegau i de laangi o Sabbath. Aagai hagadabu ina de laangi o Sabbath, bei dagu hai gu tala ange ai gi oodou dubuna madagidagi.*Exo 20.8-10; Deut 5.12-14 23 Gai gilaadeu tee hagallongo mai aabe ne aanga mai gi agu muna; gilaadeu ne hagamakaga olaadeu lodo, tee llodo e hagallongo mai aabe ne daohi agu muna ange gi gilaadeu. 24 Aagai noo goodou e kana ange ga hagallongo mai gi de au, go Tagi Maolunga e hagadaba, ga dee hagauda mai hanu mee laa lodo haitoga o de aduhale nei i de laangi o Sabbath, aagai ga hai gi dabu de laangi o Sabbath, goodou gu dee hai hegau ai, 25 gai denga hodooligi e nnoho i honga de nohoanga hodooligi o David, e ulu mai naa ma de ssao ga hulo i denga haitoga o de aduhale nei madali olaadeu dangada hai hegau. Gilaadeu ma olaadeu dangada hai hegau e kage naa i honga denga hada ma honga hoosa ga loomai ai, madali denga daane o Judah aama dangada e nnoho i Jerusalem, gai de aduhale nei e nnoho ai dangada ga hano ai. 26 Gai dangada e loomai naa i denga aduhale o Judah, ma mommee nnoho i luu baasi o Jerusalem, ma de henua o Benjamin, ma de mommee iai duuduu paa i lalo, ma mommee iai mounga, aama de bido i ngaage, gai gilaadeu e gaamai mee e hai ai denga sigidaumaha dudu, ma sigidaumaha ange laa, ma sigidaumaha o grain, ma frankincense, aama sigidaumaha e hagaahe ange ai de abodonu i de hale o Tagi Maolunga. 27 Aagai noo goodou e dee hagallongo mai, goodou e dee hai gi dabu de laangi o Sabbath, ga dee hagauda mai mee laa lodo haitoga o Jerusalem i de laangi o Sabbath, gai au e dudu naa denga haitoga o Jerusalem aama ono hale danuaa, gai e dee maua naa donu i de diinei.’ ”