18
De hale o tangada hai gumedi hadu
1 Gai Tagi Maolunga ne hagaago ange ana muna gi Jeremiah, ga hai ange, 2 “Hannoo gi de hale o tangada hai gumedi hadu, gai au ga tala adu ai agu muna gi de goe i kilaa.” 3 Gai au ga hano iho gi de hale o tangada hai gumedi hadu, gai au gu gidee ia e noho ma e hai ana hegau i honga dana hagasii hai gumedi. 4 Aagai de gumedi aana e hai laa i bela pigi ne maoha i de masavaa aana e poo ai i luoono lima, gai ia ga ahe ange ga hai ai dahi gumedi gee, ga hagahua bei dono hai e lodo ai.
5 Gai Tagi Maolunga ga hagaago mai ange ana muna, ga hai mai, 6 “E hagadaba Tagi Maolunga: De gau Israel, au e maua donu i de hai adu gi goodou hegau a tangada hai gumedi e hai. De gau Israel, tilo, goodou ni bela pigi i lodo luoogu lima, bei denga bela pigi i lodo luu lima o tangada hai gumedi hadu. 7 De masavaa naa huu aagu e hagadaba ai bolo au ga unusi age aabe oha dahi huaahenua aabe se nohoanga hodooligi, 8 gai noo de huaahenua aagu e hagakana ange laa e daahuli gee i olaadeu baubau, gai au ga sui dagu hagatau; au e dee hai gi humai de hai ngadaa aagu gu baba ange laa e hai. 9 Gai noo au e hagailoo i dahi masavaa dagodo o dahi huaahenua aabe se nohoanga hodooligi, bolo au e hagaduu ma de hai gi makaga, 10 gai noo de huaahenua laa e hai de baubau i mada luoogu mada, ma tee hagallongo mai, gai au e sui naa ogu lodo ga dee hai tanuaa aagu gu baba ange laa e hai.
11 Deenei ai, hai ange gi dangada o Judah ma dangada e nnoho i Jerusalem, ‘E hagadaba Tagi Maolunga: Tilo, au gu hagadabena dahi hai ngadaa e gaamai gi goodou, ma de hai dahi hagatau e hai baasi adu ai gi goodou. Gai dahi ma dahi gi hano gee mai i ana hegau baubau, ma gi suuia oodou mouli ma oodou hegau.’ 12 Aagai gilaadeu e hai adu naa, ‘E deai haigamaiana. Gimaadeu e duudagi naa donu huu de hai amaadeu hagatau; dahi ma dahi e daudali naa donu huu i de makaga o ono llodo baubau laa.’
13 Deenei ai, e hagadaba Tagi Maolunga:
Siilia ange gi dangada i denga huaahenua:
be gu hanu laa dangada ne langona de hai dahi hegau bee nei?
De bua moe go Israel
gu hai dahi hegau baubau mmao.
14 E aha, e maua gi deai snow
i honga hadu i ulu o Lebanon?
E aha, e maua i de pono gi dee ssali mai denga vai maluulu
i de mommee mmao?*Muna Hebrew i kinei e dee iloo danuaa dono hagadoonunga.
15 Aagai ogu dangada gu ngalo au,
gilaadeu e dudu mee maanongi ange gi denga ngadi diinonga,
gai denga diinonga gu hai gilaadeu
gi dee maua i de seesee i de haiava madagidagi.
Denga diinonga laa gu hai gilaadeu gi hulo i denga dao haiava gee,
aama honga haiava tigi bae.
16 Gai delaadeu henua e hai naa ga se mee hagamaatagu,
gai se mommee e hagavogivogi ai dangada i de lele olaadeu mouli ga hano ai;
gai dangada alodahi e seesee laa kilaa
e geugeu naa olaadeu biho i delaadeu llele olaadeu mouli i ono dagodo.
17 Au e hai naa gilaadeu gi mavaevae saele i mada i mua olaadeu hagadaumee,
bei hegau a de madangi mmahi mai i dua.
Au e huli ange naa dogu dua gi gilaadeu, e dee go luoogu mada,
i de laangi olaadeu e hai ngadaa ai.”
18 Gai gilaadeu ne hagataba, “Loomai, gidaadeu ga hai dahi hagatau e hai baasi ange ai gi Jeremiah, go hiidinga de hainga e dee llilo naa donu mai i daho de gau haimeedabu, be go muna bale a taane heiangi, aabe go muna mai i daho denga pelaabisi. Loomai, gidaadeu ga daa Jeremiah i adaadeu muna, gai gidaadeu e dee anga ange donu gi ana muna.”
19 Tagi Maolunga, hagalaangona agu muna;
hagalaangona muna a ogu hagadaumee e tala!
20 E aha, e heohi de sui ange tanuaa i de baubau?
Aagai gilaadeu gu geli dahi geelinga moogu.
Koe gi manadua dogu duu i mada luoo mada
ga dangidangi ai i olaadeu hiidinga
gi dee humai ai doo lili i gilaadeu.
21 Deenei ai, haia gi humai de onge gi alaadeu dama;
haia gi daia gilaadeu gi maakau i de gadilaasa.
Haia alaadeu haahine gi deai alaadeu dama ma de maakau olaadeu bodu;
alaadeu daane gi maakau i de mee hagamaakau,
gai alaadeu dama daane gi maakau i de gadilaasa i de hebagi.
22 Haia gi langona delaadeu oo ga tangi i lodo olaadeu hale,
i de moolau de tae mai o de gau hebagi ga hebagi ange gi gilaadeu,
go hiidinga gilaadeu gu geli dahi geelinga moogu,
ma de dugu ssele e dada ai luoogu vae.
23 Aagai koe e iloo, e Tagi Maolunga,
alaadeu hagatau e daa ai au gi magau.
Koe gi dee degi ange gi alaadeu hegau baubau,
aabe gi sooloa olaadeu haisala i mada luoo mada.
Gai koe hagadee kii ina gilaadeu i oo mada i mua,
ma de haele gilaadeu i doo lili.