20
Jeremiah ma Pashhur
1 De masavaa a tangada haimeedabu go Pashhur, tama daane a Immer, tagi i de hale o Tagi Maolunga ne langona ai de tala pelaabisi a Jeremiah muna nei, 2 gai ia ne hai hanu gi hagailiilihia de pelaabisi go Jeremiah ma gi hagamakaga ina luoono lima ma luoono vae i denga baabaa, i gaogao de haitoga e hagaingoo ange laa go de haitoga e mua gi lunga o Benjamin, i de hale o Tagi Maolunga. 3 Taiao age gai Pashhur ne aau mee ne hagamakaga ai luu lima ma luu vae o Jeremiah, gai Jeremiah ne hai gi de ia, “Doo ingoo i daho Tagi Maolunga e dee go Pashhur gai go Magor-Missabib.*Magor-Missabib i muna Hebrew e bei go de mee hagamadagu gu duuli luu baasi alodahi. 4 Gai e hagadaba Tagi Maolunga, ‘Tilo, au e hai naa goe gi se mee hagamadagu adu donu huu gi de goe aama ange gi oo soa alodahi; gai koe e gidee naa de daa ga maakau o oo soa i gadilaasa a olaadeu hagadaumee. Gai au e dugu ange naa Judah alodahi gi de hodooligi o Babylon; ia e kave naa hanu dangada gi Babylon, gai ga daa hanu gi maakau i de gadilaasa. 5 Au e gaavange naa hogi de lava alodahi o de aduhale nei gi ono hagadaumee: go ono goloa alodahi aana ne mau, ma ono goloa danuaa alodahi, ma goloa hagamogomogo alodahi o denga hodooligi o Judah. Gai gilaadeu e hai naa gi de mahi mee nei ga mmoli ga kave gi Babylon. 6 Gai koe, Pashhur, ma dangada alodahi i doo hale, e gaavee naa gi dahi henua gee. Koe e hano naa gi Babylon, gai goodou alodahi e maakau naa ga danu i kilaa, go goodou ma oo soa oou ne basa pelaabisi ange gi gilaadeu i de hadu muna.’ ”
De nanu o Jeremiah
7 Tagi Maolunga, koe gu daahanga donu au,
gai au gu senga hogi;
koe e mmahi ange i de au,
gai koe gu kii i de au.
Dangada e kada i de au i laangi alodahi;
gilaadeu alodahi e doo mee i de au.
8 Masavaa alodahi oogu e basa ai,
gai au e basa i dagodo o de alasala ma de oha.
Gai muna a Tagi Maolunga ne hagadogaa donu au
ma de hai au gi se mee hagadogaa,
ma de hakadanga i taiao ga boo ai.
9 Aagai noo au e hagadaba,
“Au e dee tala naa donu ono dagodo
aabe e ahe ange e basa i dono ingoo,”
gai ana muna i ogu lodo e bei de ahi ula,
se ahi e pono ange i lodo ogu ivi;
au gu dalea mmao i de daohi,
ni muna abodonu, au gu dee maua i de daohi.
10 Au e langona dangada soa e hagadau musumusu,
De mee hagamaatagu gu i mommee alodahi!
“Gaavange ia! Gaavange ia gi de hainga!”
Ogu soa alodahi e dagitilo de masavaa oogu e haisala ai,
gai gilaadeu ga hagataba,
“Kana adu ia e hagasengalia naa;
gai gidaadeu ga hagadee kii ia
ma de sui ange ana mee ne hai.”
11 Aagai Tagi Maolunga madali au bei dagodo o taane hebagi mmahi;
deelaa ai, ogu hagadaumee e maakulu naa donu ma tee kii i de au.
Gilaadeu e dee kii naa donu ma de dookaa,
gai e dee maua naa donu gi ngalo delaadeu dee hagadubulia.
12 Tagi o denga hagabuulinga hebagi,
koe e hagatale dagodo olaadeu e heohi,
koe e tilo dagodo lodo aama maanadu a dangada,
haia gi gidee e au dau sui ange alaadeu hegau baubau,
go hiidinga au gu dugu adu goe gi hagamodu ina ogu dagodo.
13 Daahili ange gi Tagi Maolunga!
Duuhia Tagi Maolunga!
Ia e hagaola gilaadeu e duasala
mai i ssauaa o de gau baubau.
14 Hagamalaia ina de laangi oogu ne haanau ai!
Gai gi deai se manuuia i de laangi a dogu dinana ne haanau ai au!*Job 3.1-19
15 Gai e malaia naa tangada ne gaamai de longo gi dogu damana,
ga hai ai ia ga malangilangi, ga hai ange,
“Dau dama gu haanau, gai se dama daane!”
16 Tangada laa gi bei denga aduhale a Tagi Maolunga e oha laa,
ia e dee lodo aloha ange donu aagena;
ia gi langona de hevaalogi o dangada i taiao,
gai ia gi langona longo o de hebagi i de madohi lua o de laangi,
17 i hiidinga ia tee daa ngau gi magau i de mommee o denga dama,
ma de hai lo te dinae o dogu dinana go dogu daanunga,
gai dono dinae gi lengi ga hano ai.
18 Gu aha gu doo mai ai nei au i de mommee o denga dama,
gi gidee ai e au de hai hegau kona ma taemaha,
ma dogu hagadogaa ina i taulooloa dogu mouli?