21
De tala de oha o Jerusalem
1 Gai Tagi Maolunga ne hagaago ange ana muna gi Jeremiah, i de masavaa a de hodooligi go Zedekiah ne hai ai gi loomai Pashhur tama a Malkiah, ma tangada haimeedabu go Zephaniah, tama daane a Maaseiah, gi hai mai, 2 “Dangidangi ange gi Tagi Maolunga i omaadeu hiidinga, go hiidinga de hodooligi o Babylon go Nebuchadnezzar gu humai e hebagi mai gi gimaadeu. Gai Tagi Maolunga gi haia hanu sauaa bei ana mee gu hai i denga masavaa gu hulo, gi hulo gee ai gilaadeu i omaadeu daha.” *2 Ki 25.1-11; 2 Ch 36.17-21
3 Aagai Jeremiah ne hai ange gi gilaau, “Gooluu hai ange gi Zedekiah: 4 ‘E hagadaba Iahweh, de Maadua o Israel: Tilo, au gu dai hai baasi adu naa gi goodou i goloa hebagi, oodou e hebagi ange ai naa gi de hodooligi o Babylon, ma de gau Babylon, i tua de buibui o de aduhale. Gai au e hagabuni mai naa gilaadeu gi lo te aduhale nei. 5 Gai au e hebagi adu naa gi de goe, i dogu lima sauaa ma dogu lima mahi, i hiidinga dogu lili ma dogu bole laumalie. 6 Au e daa naa gi maakau dangada e nnoho i de aduhale nei, go dangada ma manu dolodolo alodahi; gilaadeu e maakau naa i de mee hagamaakau baubau. 7 Gai dua naa huu mee nei, go Tagi Maolunga e hagadaba, gai au e dugu ange naa de hodooligi o Judah go Zedekiah, ma ono dagi o de hebagi aama dangada tee maakau laa i de mee hagamaakau, be go de gadilaasa aabe go de onge, gi de hodooligi o Babylon go Nebuchadnezzar, aama olaadeu hagadaumee e nnoho laa e daia gilaadeu gi maakau. Gai ia e daa naa gilaadeu i de gadilaasa; ia e dee damaa aloha ange naa donu gi gilaadeu aabe lodo aloha ange gi gilaadeu.’
8 Gai koe daalaa ange hogi gi de huaadangada nei, hai ange: ‘E hagadaba Tagi Maolunga: Tilo, au gu dugu i oodou mada i mua de haiava o de mouli ma de haiava o de magau. 9 Tangada e noho i de aduhale nei e daia naa ga magau, i de gadilaasa ma de onge aama de mee hagamaakau. Gai tangada e hano laa ga dau ange gi de gau Babylon, go dangada gu loomai nei ma e duuli luu baasi de aduhale e mouli naa; ia e hagaola naa donu huu dono mouli. 10 Au gu baba ange donu e hai ange de baubau gi de aduhale nei, e dee tanuaa, go Tagi Maolunga e hagadaba. De aduhale nei e dugu ange naa gi de hodooligi o Babylon gi hagadee kii ina, gai ia e dudu naa de aduhale i de ahi.’
Muna ange gi de huaabodu o David
11 “Gai koe hai ange hogi gi de huaabodu o de hodooligi o Judah, ‘Goodou hagalaangona muna a Tagi Maolunga, 12 de huaabodu o David, e hagadaba Tagi Maolunga:
Goodou hai hegau i de mee heohi i laangi alodahi;
hagaola ina tangada gu gaiaadia ono goloa, i tangada e vaivai haia ia;
kana dae mai dogu bole gi goodou,
bei de ahi ula e dee maua laa i de diinei,
i hiidinga o oodou hegau baubau.’
13 Tilo, au e hai baasi adu gi de goe, Jerusalem,
go de aduhale e duu laa i honga de geelonga nei,
ma honga de mommee haduhadua i de mommee soe,
go Tagi Maolunga e hagadaba;
ma goodou e hagataba laa, ‘Goai e maua i de hai baasi mai gi gimaadeu,
gai goai e maua i de ulu mai gi lo te maadeu mommee nnoho?’
14 Au e hagaduasala naa goodou gi bei hua o oodou hegau,
go Tagi Maolunga e hagadaba.
Au e haula naa dahi ahi i lodo henua i doo henua
ga dudu ai mee alodahi i luu baasi.”