22
1 Gai Tagi Maolunga ga hai mai, “Hannoo gi de hale o de hodooligi o Judah mage daalaa ange gi de ia muna nei: 2 ‘Goodou hagalaangona muna a Tagi Maolunga, de hodooligi o Judah, e noho i honga de nohoanga hodooligi o David, ma ono dangada hai hegau aama dangada alodahi e ulu mai i denga haitoga nei. 3 E hagadaba Tagi Maolunga: Goodou hai hegau i de mee heohi ma de soe. Gai hagaola ina tangada gu gaiaadia ono goloa, i tangada vaivai dagodo. Goodou aude haia de baubau aabe gi vaivai haia tangada henua gee, de gauligi gu deai sono damana, aabe go de hine gu magau dono bodu. Gai goodou aude daia gi magau tangada tigi haisala i de mommee nei. 4 Noo goodou e kana ange e daudali i muna nei, gai denga hodooligi e dagi i de nohoanga o David e ulu naa i denga haitoga o de hale nei, gilaadeu e kage naa i honga hada ma honga hoosa ga loomai ai, madali olaadeu daane hai hegau ma olaadeu dangada. 5 Aagai noo goodou e dee daudali i muna nei, gai au e hagatoo donu adu i dogu ingoo, go Tagi Maolunga e hagadaba, bolo de hale nei e maoha naa ga ngadi dagodo.’ ” *Mat 23.38; Luke 13.35
6 Gai e hagadaba Tagi Maolunga i dagodo o de hale o de hodooligi o Judah:
“E dee galemu donu koe e bei Gilead mai gi de au,
ma de ulu o Lebanon,
gai au e hai naa goe gi bei de vao,
ma denga aduhale e deai dangada e nnoho ai.
7 Au e hai naa gi loomai dangada gi oohaa ina goe,
dahi ma dahi e humai naa ma ono goloa hebagi,
gai gilaadeu e sele iho naa oodou cedar danuaa hugadoo,
ga maga ange gi lo te ahi.
8 Gai dangada o denga huaadangada soa e loomai naa laa gaogao de aduhale nei, ga hagadau ssili ga hagataba, ‘Gu aha Tagi Maolunga gu hai ai nei de aduhale laumalie nei bee nei?’ 9 Gai de muna e basa ange ai deenei: ‘Go hiidinga gilaadeu gu tili de hagatoo donu hagaheloongoi a Tagi Maolunga delaadeu Maadua, gai gu daumaha ange gi denga diinonga ma de hai hegau ange gi gilaadeu.’ ”
De tala a Jeremiah dagodo o Shallum
10 Goodou aude tangi i de hodooligi gu magau laa,
be gi hinangalosaa i de ia;
aagai goodou gi tangi i tangada
gu gaavee laa gi dahi henua gee,
go hiidinga ia e dee ahe mai naa donu
aabe e ahe ange e gidee dono henua donu.
11 Gai e hagadaba Tagi Maolunga i dagodo o Shallum,*Shallum e bei go Jehoahaz. tama daane a Josiah, ne suuia laa dono damana ga hodooligi ai i Judah, gai ia gu hano gee mai i de mommee nei: “Ia e dee ahe mai naa donu.*2 Ki 23.31-34; 2 Ch 36.1-4 12 Ia e magau naa i de henua oona gu gaavee aagena; ia e dee gidee ange naa donu de henua nei.”
De tala a Jeremiah dagodo o Jehoiakim
13 “E vakaa naa tangada e hagaduulia dono hale i hegau dee heohi,
ma de hai denga aabi i lunga o dono hale i de vaivai dagodo,
aama de ngadi hagahai hegau tangada de henua,
gai e dee gaavange de hagaoanga o ana hegau.
14 Ia e hagadaba, ‘Au e hagaduu naa dogu hale gi laumalie
ma de hai gi nnui denga aabi iai.’
Gai ia ga hai gi nnui denga abaaba vaaligiligi iai,
gai e haoli laa lodo i denga baabaa cedar
ma de lebu i de leebunga mmea.
15 E aha, koe ne hai ga se hodooligi,
i de hagaduu doo hale i denga cedar?
E aha, doo damana tee gaimee laa ma de unu ga bosu?
Ia ne hai hegau i de hagamodu soe ma de heohi,
deelaa ai, ia ne duadonu.
16 Ia ne bale ange de gau hagaau aloha ma de duasala,
deelaa ai, ia ne duadonu.
Gai e dee deelaa de hagadoonunga o de iloo e tangada ogu dagodo?
go Tagi Maolunga e hagadaba.
17 Aagai koe e nnoo ange ma de lodo i goloa e maua i de hadu muna,
ma de daa gi maakau dangada tigi haisala,
ma de hagaduasala aama de vaivai hai dangada.”
18 Deenei ai, e hagadaba Tagi Maolunga i dagodo o Jehoiakim tama a Josiah, de hodooligi o Judah:
“Dangada e dee tangi naa i de ia, ga hagataba,
‘Gu aloha ai loo i dogu daina daane!
Gu aloha ai loo i dogu daina hahine!’
Gilaadeu e dee tangi naa hogi i de ia, ga hagataba,
‘Gu aloha ai loo i dogu dangada aamua!
Gu hagaaloha dagodo o dono mahamaha!’ *2 Ki 23.36—24.6; 2 Ch 36.5-7
19 Ia e danu naa bei dagodo o dahi donkey,
ma de dada ga kave ga tili gi tua denga haitoga o Jerusalem.”
De tala a Jeremiah dagodo o Jehoiachin
20 “Hanage gi Lebanon ga oo ai ga dangi,
haia gi langona e dangada i Bashan doo leo;
koe gi oo ma gi dangi i Abarim,
go hiidinga dangada alodahi e balea adu goe gu maakulu.
21 Au ne basa adu gi de goe i de masavaa oou e duadonu ai,
aagai koe ne hai mai, ‘Au e dee hagallongo adu!’
Deenei dau dahulinga e hai mai i doo gauligi;
koe tee hagallongo mai donu gi de au.
22 De madangi e ili ga kave gee oo dangada hagaloosi,
gai dangada e balea adu goe i de hebagi e gaavee gee naa.
Gai koe e hagadogaa ina naa ma de hagangadi mee ina
i hiidinga o au hegau baubau alodahi.
23 Tangada e noho i Lebanon,†Lebanon i kinei e bei go de hale o de hodooligi i Jerusalem (diiloo hogi 1 Kings 7.2).
ma de noho i lodo hale e hai i cedar,
koe e gonogono naa donu ma de mmae,
koe e mmae naa bei de hine gu hai ono hagalangona!
24 Au e hagatoo donu i dogu mouli, go Tagi Maolunga e hagadaba, e dee galemu donu koe, Jehoiachin‡Jehoiachin: de Beebaa Hebrew e hai ange Coniah. tama daane a Jehoiakim, de hodooligi o Judah e bei de buulei i dogu lima, gai au e unusi mai naa donu goe i dogu lima.*2 Ki 24.8-15; 2 Ch 36.9-10 25 Gai ia ga dugu ange goe gi dangada e nnoho naa e daia goe gi magau, go dangada oou e madagu ai naa: go Nebuchadnezzar de hodooligi o Babylon ma de gau Babylon. 26 Au e maga naa gooluu ma doo dinana ne hanaua goe gi dahi henua gee, se mommee niioluu tee haanau ai, gai gooluu ngaadahi e maakau naa i kilaa. 27 Gai gooluu e dee aahe mai naa donu gi de henua ooluu e llodo naa e aahe mai aagena.”
28 E aha, Jehoiachin se daane e hagangadi mee ina,
gai e bei dahi gumedi hadu gu maoha laa,
gai se ssaa e deai dangada e llodo ai?
Gai gu aha gilaadeu ma ana dama gu gaavee gee ai
gi dahi henua alaadeu e dee iloo?
29 De henua, de henua, de henua,
noho mai hagalaangona muna a Tagi Maolunga!
30 E hagadaba Tagi Maolunga:
“Daohia dagodo o taane nei be se daane e deai ana dama,
gai se daane e dee hagadagadaga age i de masavaa oona e mouli ai,
go hiidinga e deai naa donu ono hagadiilinga e sula,
gai e deai naa donu e dagi i de nohoanga hodooligi o David
aabe aahe ange e hodooligi i Judah.”
*22:5 Mat 23.38; Luke 13.35
*22:11 Shallum e bei go Jehoahaz.
*22:11 2 Ki 23.31-34; 2 Ch 36.1-4
*22:18 2 Ki 23.36—24.6; 2 Ch 36.5-7
†22:23 Lebanon i kinei e bei go de hale o de hodooligi i Jerusalem (diiloo hogi 1 Kings 7.2).
‡22:24 Jehoiachin: de Beebaa Hebrew e hai ange Coniah.
*22:24 2 Ki 24.8-15; 2 Ch 36.9-10