23
De uli heohi abodonu
1 E hagadaba Tagi Maolunga, “E vakaa naa de gau hagaloosi e daia, ma de haia gi mavaevae saele denga ssiibi o dagu mommee iai helii.” 2 Gai e hagadaba Tagi Maolunga de Maadua o Israel, i dagodo o de gau hagaloosi e diiloo ange ogu dangada: “Go hiidinga goodou gu dugu agu ssiibi gi hulo, tee tilo ange gilaadeu, au e hagaduasala naa goodou i hiidinga oodou hegau baubau, go Tagi Maolunga e hagadaba. 3 Gai au e gaamai naa gilaadeu e doe i dagu hagabuulingaa ssiibi i henua alodahi aagu gu kave gilaadeu aagena, gai au ga hagaahe mai gilaadeu gi lo te laadeu buibui, gai gilaadeu ga hagadili ai naa ga soa. 4 Au e hili naa hanu dangada hagaloosi gi diiloo ange gilaadeu, gai gilaadeu e dee maatagu ange naa donu, be e manavasaa olaadeu lodo, gai e deai naa hogi se gilaadeu e tili,” go Tagi Maolunga e hagadaba.
5 E hagadaba Tagi Maolunga,
“E tae mai naa laangi,
aagu e hagasula age ai dahi uli moo David, se ia e heohi,
se hodooligi e humai ga dagi i de heiangi
ma de hai hegau i de hagamodu soe ma de heohi i honga de henua.*Jer 33.14-16
6 Judah e noho baba naa i ono laangi,
gai Israel e duadonu naa.
Gai deenei de ingoo oona e hagaingoo ai:
go Iahweh taadeu Ia Heohi.
7 Aagai tilo, e tae mai naa laangi, go Tagi Maolunga e hagadaba, a dangada e dee hagataba ai, ‘Gimaadeu e hagatoo donu i de mouli o Tagi Maolunga, de ia ne hagassao ina mai de gau Israel i Egypt,’ 8 aagai gilaadeu e hagataba naa, ‘Gimaadeu e hagatoo donu i de mouli o Tagi Maolunga, de ia ne hagassao ina mai denga aamuli o Israel i denga henua i ngaiho aama mai i henua alodahi aana ne kave gilaadeu gi nnoho ai.’ Gai gilaadeu e loomai naa ga nnoho i delaadeu henua donu.”
Denga pelaabisi hadu muna
9 Dagodo o denga pelaabisi:
Gu mmae mmao ogu lodo;
ogu ivi alodahi gu bolebole.
Au gu bei tangada gu unu laa ma gu senga,
ma tangada gu dagina laa i denga uvaini,
i hiidinga o Tagi Maolunga
aama hiidinga o ana muna dabu.
10 De henua gu honu i de gau dagodo haisala;
de henua gu dangi i hiidinga gu hagamalaia,
gai mommee iai helii i lodo henua gu mmae.
Alaadeu dahulinga gu baubau,
gai gu dee hagahai hegau olaadeu sauaa i de heohi.
11 “Denga pelaabisi ma de gau haimeedabu gu dee hai hegau i de mee heohi;
gai au gu gidee donu hogi alaadeu hegau baubau i lo togu hale,
go Tagi Maolunga e hagadaba.
12 Deelaa ai, delaadeu haiava e hai naa gi segesege ma de gohu;
gai gilaadeu e dagadagahia naa ma de maakau i kilaa.
Go hiidinga au e hai naa gi humai de hai ngadaa gi gilaadeu,
i de ngadau aagu e hagaduasala ai gilaadeu,
go Tagi Maolunga e hagadaba.
13 Au gu gidee dahi mee hakino gee
i daho denga pelaabisi o Samaria:
gilaadeu e pasa pelaabisi i de ingoo o Baal
ma de dagi gee ogu dangada i de au.
14 Au gu gidee hogi dahi mee baubau mmao
i magavaa o denga pelaabisi o Jerusalem:
gilaadeu e dagodo haisala ma de hadu muna.
Gilaadeu e bale ange dangada e haia de baubau,
deelaa ai, gu deai donu se dangada daahuli gee i de baubau.
Gai au gu gidee bolo gilaadeu gu bei donu dagodo o Sodom;
gai dangada o Jerusalem gu bei dangada o Gomorrah.” *Gen 18.20; Ezk 16.49
15 Deenei ai, e hagadaba Tagi o denga hagabuulinga hebagi i dagodo o denga pelaabisi:
“Tilo, au e hai naa gilaadeu gi gaina mee mmala
ma de hagaunu gilaadeu i vai hagammau,
i hiidinga denga pelaabisi o Jerusalem
gu hai gi laumalie baubau i honga de henua alodahi.”
16 Gai e hagadaba Tagi o denga hagabuulinga hebagi:
“Goodou gi dee hagalaangona muna a denga pelaabisi e tala adu;
gilaadeu e hai goodou gi tali hagalodolodo ange gi mee dee haigamaiana.
Gilaadeu e tala midi alaadeu e hadu age donu huu i olaadeu lodo,
e dee ni muna mai i daho Tagi Maolunga.
17 Gilaadeu e duudagi huu de hai ange gi dangada e hagangadi mee ina dogu ingoo,
‘E hagadaba Tagi Maolunga: Goodou e nnoho paba naa donu;’
gai e hai ange gi dangada alodahi e hagamakaga ina olaadeu lodo,
‘E deai donu se hai ngadaa e duu adu gi goodou.’
18 Gai goai de gilaadeu gu duu laa mada luu mada o Tagi Maolunga
e hagallongo ai ana muna?
Gai goai de gilaadeu gu kana ange laa ma gu hagalaangona ana muna?
19 Tilo, de madangi a Tagi Maolunga gu dau mai,
gai gu salulu mai i dono bole,
bei dagodo o ssio e hano iho laa
gi honga o de gau baubau.
20 De lili o Tagi Maolunga e dee ahe dua naa donu
ga dae ai gi dana hagassula de hagatau gu dagodo laa i ono lodo.
Gai muli mai naa huu gai goodou e tonu danuaa ange aagena.
21 E dee go au ne haia gi loadu denga pelaabisi naa,
aagai gilaadeu ne saavini adu donu i gilaadeu.
Au tigi basa ange donu gi gilaadeu,
aagai gilaadeu gu pasa pelaabisi.
22 Aagai noo gilaadeu ne tuu i mada luoogu mada,
gai gilaadeu ne tala ange agu muna gi ogu dangada,
ma de hai gilaadeu gi daahuli gee mai i alaadeu dahulinga dee heohi
aama mai i alaadeu hegau baubau.
23 E aha, se Maadua donu huu au e baa mai,
go Tagi Maolunga e hagadaba,
gai e dee se Maadua hogi e mmao gee?
24 E aha, e maua e tangada i de mmuni
i dahi mommee gi dee gidee ai e au ia?
go Tagi Maolunga e hagadaba.
E aha, e dee noho au i mommee alodahi i de langi ma henua i lalo?
go Tagi Maolunga e hagadaba.
25 Au gu langona muna a denga pelaabisi hadu muna e tala i dogu ingoo, ma e hagataba, ‘Au gu hai dahi midi! Au gu hai dahi midi!’ 26 Dee hee maa taulooloa de daakodo denga muna hhadu i lodo o denga pelaabisi e daalaa naa muna hhadu naa? Gilaadeu ni pelaabisi donu e daalaa muna hhadu i olaadeu lodo donu. 27 Gilaadeu e maanadu de hai ogu dangada gi ngalo dogu ingoo i alaadeu midi e hagadau tala, bei de hai a olaadeu dubuna madagidagi ne hagangalo ai dogu ingoo gai ga daumaha ange gi Baal. 28 De pelaabisi gu hai laa dahi midi gi daalaa dana midi, aagai tangada e daohia agu muna gi kana ange gi daalaa agu muna i de heohi. Gai e dee dagodo daudahi donu lau o de grain ma denga hua, go Tagi Maolunga e hagadaba. 29 E aha, agu muna e dee bei dagodo o de ahi, go Tagi Maolunga e hagadaba, gai e bei hogi de haamaa e oha ai laa denga hadu?”
30 Deenei ai, e hagadaba Tagi Maolunga, “Au e hai baasi ange gi denga pelaabisi, e hagadau gaiaa ina laa denga muna, alaadeu e hagataba laa bolo ni muna mai i ogu daha. 31 Uaa, go Tagi Maolunga e hagadaba, au e hai baasi ange donu gi denga pelaabisi, e daalaa hanu ngadi muna gai ga hagataba, bolo go au ne hagadaba. 32 Tilo, au e hai baasi ange gi gilaadeu e pasa pelaabisi i denga midi hhadu, go Tagi Maolunga e hagadaba. Gilaadeu e dagi gee ogu dangada i alaadeu muna hagassoenga, gai e dee go au donu ne haia gilaadeu gi hulo, aabe go au ne hilia gilaadeu. Deenei ai, e deai donu olaadeu haigamaiana ange gi dangada, go Tagi Maolunga e hagadaba.
Muna pelaabisi hadu muna
33 “Gai ga siilia adu naa huu e dahi dangada, be go dahi pelaabisi, aabe go dahi dangada haimeedabu, ga hai adu, ‘Aahee muna hagadaemaha a Tagi Maolunga?’ gai koe hai ange, ‘Ni muna hagadaemaha aha? Au e tili naa goodou, go Tagi Maolunga e hagadaba.’ 34 Gai noo e hagadaba dahi pelaabisi be se dangada haimeedabu aabe go dahi dangada ange, ‘Muna hagadaemaha nei nii Tagi Maolunga,’ gai au e hagaduasala naa donu tangada laa ma dono huaabodu. 35 Gai goodou siilia ange gi tangada e baa adu gi goodou aama oodou dangada, hai ange, ‘Aahee muna a Tagi Maolunga ne basa mai ai?’ aabe ‘Aahee muna a Tagi Maolunga gu tala?’ 36 Aagai goodou e dee aahe ange donu e hagataba, ‘Muna hagadaemaha a Tagi Maolunga,’ go hiidinga dangada e tala muna nei e hagadonu ai alaadeu muna donu, ga hagahaisala ai muna a de Maadua e mouli laa, go Tagi o denga hagabuulinga hebagi, taadeu Maadua. 37 Gai koe siilia ange gi de pelaabisi, ‘Aahee muna a Tagi Maolunga ne basa adu ai?’ aabe ‘Aahee muna a Tagi Maolunga ne tala adu?’ 38 Aagai noo koe e hagadaba, ‘Muna hagadaemaha a Tagi Maolunga,’ e hagadaba Tagi Maolunga: Go hiidinga goodou gu hagataba i muna nei, ‘Muna hagadaemaha a Tagi Maolunga,’ aagai au ne hai adu, ‘Goodou gi dee hagataba: Muna hagadaemaha a Tagi Maolunga,’ 39 deenei ai, tilo, au e poo naa goe ga tili gee goe mai i mada luoogu mada, go goodou ma de aduhale aagu ne gaavadu naa gi goodou ma oodou dubuna madagidagi. 40 Au e hai naa gi hagangadi mee ina ma de hagadookaa ina goodou ga hano ai, gai e dee maua naa donu gi ngalo.”