47
Muna pelaabisi i dagodo o Philistia
1 Gai aanei muna a Tagi Maolunga ne hagaago ange gi de pelaabisi go Jeremiah, i dagodo o de gau Philistia, i mua de hebagi ange o de gau Pharaoh gi Gaza.*Isa 14.29-31; Ezk 25.15-17; Joel 3.4-8; Amos 1.6-8; Zep 2.4-7; Zec 9.5-7
2 E hagadaba Tagi Maolunga:
“Tilo, denga vai e hagahonu age naa i ngaiho,
ga loomai bei de mee mmilo mmahi.
Gai e haoli naa honga de henua ma mee alodahi iai,
go denga aduhale ma dangada e nnoho ai.
Dangada e oo naa ga tangi,
gai dangada alodahi e nnoho i de henua e tangi see naa,
3 i de hogihogi mai vae o denga hoosa e saavini mai ai,
ma de nngolo mai o olaadeu hada hebagi
ma de hagalongaa mai o olaadeu hagasii.
Denga damana e dee huuhuli mai donu e bale ange alaadeu dama,
i hiidinga gu deai olaadeu mahi.
4 Gai gu dae mai donu de laangi
e daa ai gi maakau dangada alodahi o Philistia,
ma de daa dangada alodahi e ola,
go gilaadeu ne balea ange Tyre ma Sidon.
Tagi Maolunga gu dai hagallilo naa de gau Philistia,
go dangada e doe i gilaadeu mai i Caphtor.*Caphtor e bei go Crete.
5 Gaza e dahi naa dono biho ga malali,
gai Ashkelon e ngadi dagodo naa.
Goodou dangada e doe i de mommee iai de geelonga,
dee hee maa taulooloa doodou duuduu oodou angaanga?
6 ⌊Goodou e hagataba,⌋ ‘De gadilaasa a Tagi Maolunga,
dee hee maa taulooloa doo dee hagamabu?
Ahe ange gi lo too hale,
gai noho ma gi dee ngalue.’
7 Aagai dee hee dono hai e hagamabu ai,
i de masavaa a Tagi Maolunga gu tala ai de mee nei,
ma dana masavaa gu hagamodu ai de mee nei
e hai baasi ange ai gi Ashkelon ma mommee i tagudai?”