48
Muna pelaabisi i dagodo o Moab
1 Dagodo o Moab. E hagadaba Tagi o denga hagabuulinga hebagi, de Maadua o Israel:
“E vakaa naa Nebo, de henua e oha naa!
Kiriathaim gu hagadogaa ina, i de hagadee kii ina;
de mommee buibui makaga gu hagadogaa ina ma de oohaa ina.*Isa 15.1—16.14; 25.10-12; Ezk 25.8-11; Amos 2.1-3; Zep 2.8-11
2 Dangada e dee aahe ange naa ga tuhi Moab.
Dangada e hagasaele naa de hai gi hai ngadaa Heshbon:
‘Loomai, gidaadeu ga hai gi deai se huaahenua nei!’
De aduhale go Madmen e hai naa ga dee mmuu;
gai de gadilaasa e doolohi naa goodou.
3 Hagalaangona adu de tangi o dangada i Horonaim,
gilaadeu e tangi i delaadeu vaivai haia ma de oohaa.
4 Moab e oha naa ga maoha;
ana gauligi vaaligiligi e tangi naa.
5 Dangada e loage naa e hulo gi Luhith,
gai gilaadeu e tangi i delaadeu loiho i honga de haiava e hano laa gi Horonaim;
gai gilaadeu e langona naa de tangi o dangada,
i de manavasaa olaadeu lodo i hiidinga de oohaa mee.
6 Goodou saavini hulo gee! Hagaola ina goodou!
Goodou e bei naa dagodo o de juniper lodo henua.
7 Goodou e hagadonu oodou mahi ma oodou goloa lagolago,
deenei ai, goodou e hagadee kii naa hogi;
gai tiinonga go Chemosh e gaavee naa gi dahi henua gee,
madali ono dangada haimeedabu aama dagi o de henua.
8 Gai tangada e oohaa mee e humai naa ga oha denga aduhale alodahi,
gai e deai naa donu se aduhale e ola.
De mommee gelo e oha naa hogi,
de mommee soe i de henua e maoha naa hogi,
bei de hai a Tagi Maolunga gu tala ai laa.
9 Hagamalili ina ange soolo gi honga o Moab
go hiidinga e oha naa ga maoha;
ono aduhale e hai naa ga ni mommee e ngadi daakodo,
gu deai dangada e nnoho ai.
10 E malaia naa tangada
e dee kana ange e hai hegau a Tagi Maolunga!
E malaia naa tangada e dee daia
gi maakau dangada i dana gadilaasa!
11 Moab ne noho baba mai i dono gauligi,
bei dagodo o denga uvaini e dee hagangalungalue laa,
tigi llingi ange gi dahi ssaa gee —
ia tigi gaavee hogi gi dahi henua gee.
Ia goi mami danuaa donu huu,
gai dono nnamu tigi dagodo gee donu.
12 Tilo, e tae mai naa laangi,
go Tagi Maolunga e hagadaba,
aagu e hai ai gi loomai dangada gi liingia mee i lodo ssaa,
gilaadeu e llingi naa ga deai mee i Moab;
gilaadeu e hai naa ga odi uvaini i ono lodo,
gai ga hoohoa denga ssaa.
13 Gai Moab e dogaa naa i tiinonga go Chemosh,
bei de hai o de gau Israel ne dookaa ai laa,
i delaadeu tali hagalodolodo ange gi tiinonga go Bethel.
14 Dee hee doodou hai e hagataba ai naa,
‘Gimaadeu ni daane hebagi mmahi,
gai ni daane e aabo i de hebagi?’
15 Gai Moab gu oha ma gu maoha,
ono aduhale gu kage mai aagena denga daane hebagi,
gai ono dama daane mmahi e daia naa ga maakau,
go de Hodooligi e hagadaba, gai dono ingoo go Tagi o denga hagabuulinga hebagi.
16 De hai ngadaa o Moab gu dai dae mai donu,
gai dono hagaduasala e moolau naa donu i de dae mai.
17 Dangada alodahi e nnoho i luu baasi o Moab, goodou tangi i ono hiidinga,
dangada alodahi e langona ono longo;
gi hagataba, ‘Gu kona donu de hadi togo mmahi laa,
gu kona donu de hadi togo mahamaha laa!’
18 Dangada e nnoho i Dibon,
iho mai i doodou duulanga hagadubu,
ma gi noho i honga de gelegele mmasa,
go hiidinga de ia e oohaa ina Moab e humai naa e hebagi adu,
ma de oha oodou aduhale buibui.
19 Dangada e nnoho i Aroer,
goodou tuu i gaogao de haiava ma gi dagidiiloo ai;
goodou ga ssili ange gi taane e savini laa ga hano
aama de hine e ola laa, ga hai ange, ‘Ni aha gu hai naa?’
20 Moab gu hagadogaa ina, i hiidinga gu maoha.
Goodou oo magi tangi!
Goodou hagailoo ina i gaogao ssaalingaa vai go Arnon
bolo Moab gu oha ma gu maoha.
21 De hagaduasala gu dae mai gi de mommee soe i de henua,
gai gu dae hogi gi Holon, ma Jahzah, ma Mephaath,
22 ma Dibon, ma Nebo, ma Beth Diblathaim,
23 ma Kiriathaim, ma Beth Gamul, ma Beth Meon,
24 ma Kerioth, ma Bozrah, ma denga aduhale alodahi i Moab, e mmao ma de paa mai.
25 De hanga*de hanga e hagasengasenga ange gi mahi o Moab. o Moab gu tuu ma gu doo;
gai dono lima gu hadi,
go Tagi Maolunga e hagadaba.
26 Haia ia gi unu gi senga,
go hiidinga ia gu hagamaolunga i Tagi Maolunga.
Haia Moab gi dagodo i lodo ono hagalueia;
haia ia gi se mee e hakadanga ai dangada.
27 E aha, koe tee hakadanga laa i Israel?
E aha, ia ne gidee mai laa i magavaa o de gau gaiaa,
gai koe ga hagammae manava ai ia
i de masavaa aau e basa ai i de ia?
28 Dangada e nnoho i Moab,
goodou hulo gee i denga aduhale
ma gi nnoho i magavaa o denga hadu;
goodou gi bei denga manu kono
e hai laa olaadeu hoohanga i mada haonga i honga mounga.
29 Gimaadeu gu langona de hagamaolunga o Moab:
ia gu kona donu dono hagamaolunga,
ia e lodo maolunga, ma de hagasoenga,
ma de lodo gi lunga.
30 Au e iloo bolo ia e hagamaolunga,
aagai e deai donu haigamaiana,
go Tagi Maolunga e hagataba,
gai ana hegau e deai donu mee e kii ange ai.
31 Deenei ai, au e dangi naa i Moab,
au e dangi naa i Moab alodahi,
au e hinangalosaa naa i denga daane o Kir Hareseth.
32 Denga grapevine o Sibmah, au e dangi i oo hiidinga,
bei de hai o Jazer e dangi ai.
Oo laa e ssomo naa ga tae gi honga tai;
gai e tae naa hogi gi tai o Jazer.
Gai de ia oha mee
e oha naa au huamanu lleu ma au grape.
33 Gai gu deai se malangilangi be se lodo danuaa
i gelegele e doo ai manu i de henua o Moab.
Au gu hai gi deai uvaini i mommee e kumi ai uvaini;
gu deai hogi dangada e dagadagahia denga grape ma de malangilangi i kilaa;
Gai dangada e oo, gai e dee se oo i delaadeu malangilangi.
34 Leo o delaadeu tangi gu langona
mai i Heshbon ga dae ai gi Elealeh, ma Jahaz,
ma mai i Zoar ga dae ai gi Horonaim aama Eglath Shelishiyah,
gai Nimrim gu deai vai iai.
35 Au e hai naa gi deai dangada i Moab
e haia sigidaumaha i denga mommee daumaha
ma de dudu mee maanongi ange gi olaadeu diinonga,
go Tagi Maolunga e hagadaba.
36 Gai ogu lodo e dangi i Moab bei de ili o de flute;
ogu lodo e dangi i dangada o Kir Hareseth bei de ili o de flute.
Go hiidinga olaadeu goloa lagolago gu dee maaleva.
37 Biho o dangada alodahi gu dahi,
gumigumi alodahi gu dahi hogi;
lima alodahi gu selesele ma gu lagolagohia,
gai daogubu alodahi gu haoli i malo daladala.
38 Honga hale alodahi i Moab aama honga ono haiava
e deai ange naa donu mee e langona ai, go de tangi donu huu,
i hiidinga au gu hhoa Moab bei de ssaa e deai dangada e lodo ai,
go Tagi Maolunga e hagadaba.
39 Gu kona donu dono maoha!
Gu kona donu delaadeu tangi!
Gu kona donu de ahe dua o Moab ma de dogaa!
Moab gu se mee e hakadanga ai dangada,
gai gu se mee hagamaatagu ange gi dangada i luoono baasi.”
40 Go hiidinga e hagadaba Tagi Maolunga:
“Tilo, e humai naa dahi bei de igele gemo,
ga doha luoono bakau ga hebagi ange ai gi Moab.
41 Denga aduhale e hagadee kii ina naa,
gai denga hale hagaloosi makaga e gaavee naa.
De laangi laa gai lodo o denga daane hebagi o Moab
e bei naa dagodo lodo o de hine gu hai ono hagalangona.
42 Moab e oha naa donu ga dee se huaadangada,
go hiidinga ia ne hagamaolunga ange ia i Tagi Maolunga.
43 Dangada o Moab, de mee hagamaatagu,
ma de geelinga gelo, aama ssele
e baba adu donu gi goodou,
go Tagi Maolunga e hagadaba.
44 Tangada e savini ga hano gee i de mee hagamaatagu,
e doo ange naa gi lo te geelinga gelo,
gai tangada e gage age i lo te geelinga gelo laa,
e doo ange naa gi lo te sele.
Go hiidinga au e gaamai naa gi honga o Moab
dahi ngadau e hagaduasala ai ia,
go Tagi Maolunga e hagadaba.
45 Gilaadeu e silivaahea saele ma teai olaadeu mahi,
gu nnoho i lalo de malu o Heshbon,
go hiidinga dahi ahi gu sao mai i Heshbon,
se ahi ula mai i de hale o Sihon;
gai gu dudu de lae o Moab,
ma dumuagi o de gau pasa hagassoenga.
46 E vakaa naa goe e Moab!
Dangada o Chemosh gu maakau;
au dama daane gu gaavee gi dahi henua gee,
gai au damaa hine gu gaavee gee hogi.
47 Aagai au e hagaahe ange naa de manuuia o Moab,
i denga laangi e loomai,”
go Tagi Maolunga e hagadaba.
Deenei de odi de hagamodu muna o Moab.