49
Muna pelaabisi i dagodo o Ammon
1 E hagadaba Tagi Maolunga i dagodo o de gau Ammon:
“E aha, gu deai dama daane a Israel?
Gu deai dama e dugu ai delaadeu boolonga?
Gai gu aha Milcom gu kave ai de mommee o Gad,
gai ono dangada gu nnoho i lodo ono aduhale?*Ezk 21.28-32; 25.1-7; Amos 1.13-15; Zep 2.8-11
2 Gai tilo, e tae mai naa laangi,
go Tagi Maolunga e hagadaba,
aagu e hai ai gi langona de oo ina mai o de hebagi
e hai baasi ange ai gi Rabbah o de gau Ammon!
Gai e hai naa ga bei de hagabuudungaa gainga,
gai ono aduhale e dudu naa i de ahi.
Israel e kave naa de henua o dangada ne gaavee dono henua,
go Tagi Maolunga e hagadaba.
3 Heshbon, koe gi dangi, go hiidinga Ai gu maoha!
Dangada o Rabbah, goodou hevaalogi tangi,
gai kahu i malo daladala ma de hinangalosaa,
ma de saavini i magavaa o denga buibui;
go hiidinga Milcom e gaavee naa gi dahi henua gee,
madali ono dangada haimeedabu aama dagi o dono henua.
4 Tamaa hine e dee hai hegau i de mee abodonu,
gu aha gu basa hagasoenga ai naa goe i oo geelonga,
ma de tali hagalodolodo ange oo goloa hagamogomogo, ga hagadaba,
‘Goai e maua i de hai baasi mai gi de au?’
5 Tilo, au e gaamai naa de mee hagamaatagu gi de goe,
go de Ia Aamua, Tagi o denga hagabuulinga hebagi e hagadaba,
mai i denga mommee alodahi i luoo baasi,
gai goodou alodahi e hai naa gi hulo gee,
dahi ma dahi e seesee naa donu ga hagasoe gi mua,
gai e deai naa donu dangada e bale ange gilaadeu.
6 Aagai muli mai naa huu, gai au e hagaahe ange de manuuia o de gau Ammon,”
go Tagi Maolunga e hagadaba.
Muna pelaabisi i dagodo o Edom
7 E hagadaba Tagi o denga hagabuulinga hebagi i dagodo o Edom:
“E aha, gu deai nei donu se heiangi i Teman?
Gai gu deai nei donu hagasaele heohi a de gau maanetonu?
Gai gu llilo nei donu olaadeu heiangi?*Isa 34.5-17; 63.1-6; Ezk 25.12-14; 35.1-15; Amos 1.11-12; Oba 1-14; Mal 1.2-5
8 Dangada e nnoho i Dedan,
goodou saavini mmuni i lodo haonga kelo,
go hiidinga au e hai naa gi hai ngadaa Esau,
i de masavaa aagu e hagaduasala ai ia.
9 E aha, noo de gau hagihagi e loomai e hagihagi denga grape i oo daha,
gai gilaadeu e dee dugu naa hanu grape?
Gai noo de gau gaiaa e loomai i de boo,
gilaadeu e dee kave naa donu huu olaadeu mee e llodo ai?
10 Aagai au gu aau ma gu deai malo o Esau;
au gu hai ga gidee mommee e hagammuni laa,
gai ia e dee maua donu i de mmuni.
Ana dama gu maakau, ono daina
ma dangada e paa ange gi de ia gu deai.
11 Dugua au dama e deai olaadeu damana,
gai au ga tilo ange gilaadeu;
gai au haahine gu maakau olaadeu bodu e maua i de hagadonu au.”
12 E hagadaba Tagi Maolunga, “Noo dangada e dee heohi delaadeu unu i de ubu o de hagaduasala nei e unu ai, gai goodou e maanadu bolo goodou e dee hagaduasala? Goodou e dee haihai naa donu ga dee hagaduasala, aagai goodou e unu donu i de ubu nei. 13 Au e hagatoo donu i dogu ingoo, go Tagi Maolunga e hagadaba, bolo Bozrah e hai naa gi se mommee maoha ma de hagamaatagu, se mee e hakadanga ai dangada gai se muna hagamalaia; ono aduhale alodahi e maoha naa ga ngadi daakodo ga hano ai.”
14 Au gu langona dahi hagailoo mai i daho Tagi Maolunga:
dahi dangada hagailoo gu hai gi hano gi denga huaahenua, gi hai ange,
“Goodou hagabuni loomai hebagi ange gi de henua laa!
Hiihidi age haia de hebagi!”
15 “Au e hai naa goe gi damaa mee ange i denga huaahenua,
ma de hagangadi mee ina i daho dangada.
16 Koe gu hagasengalia i hiidinga de maatagu o dangada i de goe,
aama doo lodo hagamaolunga,
koe e nnoho laa i magavaa o denga hadu maolunga,
ma honga mommee maolunga o denga duuduu.
Gai e dee galemu donu dau hai doo hoohanga i denga mommee maolunga,
gai au e tili iho mai naa goe i kilaa,
go Tagi Maolunga e hagadaba.
17 Edom e hai naa ga se mee hagamaatagu;
dangada alodahi e seesee i ono gaogao e llele mouli naa ga hagavogivogi,
i hiidinga o de hai ngadaa gu hai ange laa aagena.
18 Gai e bei hogi de oha o Sodom ma Gomorrah,
madali denga aduhale e paa ange,
go Tagi Maolunga e hagadaba,
gai e deai naa donu se dangada e nnoho gaainga i kilaa;
e deai naa hogi dangada e nnoho i kilaa.*Gen 19.24-25
19 Tilo, au e bei de laiono i lodo mee muimui i Jordan
e humai laa e hai baasi ange gi de mommee iai helii lau kohu;
gai e moolau naa donu dagu doolohi ia
ga hai gi hano gee i dono henua.
Gai au ga hili tangada oogu e malangilangi ai gi de hegau nei.
Goai e bei ogu dagodo?
Gai goai e maua i de hai baasi mai gi de au?
Gai goai tangada hagaloosi e maua i de hebagi mai gi de au?
20 Deenei ai, goodou hagalaangona de hagatau a Tagi Maolunga e hai baasi ange ai gi Edom,
ma ana mee gu hagadabena e hebagi ange ai gi gilaadeu e nnoho i Teman:
dama a dana hagabuulingaa ssiibi e gaavee gee naa;
ia e oha naa olaadeu mommee iai helii i olaadeu hiidinga.
21 Henua i lalo gu bolebole i dana langona delaadeu hagadee kii ina,
gai de leo o delaadeu tangi e tae loo gi Tai Mmea.*Tai Mmea: de Beebaa Hebrew e hai ange Tai o denga Aalege.
22 Tilo, dahi igele gemo e lele mai naa ga hagatili iho,
ga doha luoono bakau ga hai baasi ange ai gi Bozrah.
Gai lodo o denga daane hebagi mmahi o Edom
e bei naa lodo o de hine gu hai ono hagalangona.”
Muna pelaabisi i dagodo o Damascus
23 Dagodo o Damascus.
“Hamath ma Arpad gu hagadookaa ina,
go hiidinga gilaau gu langona hanu longo baubau;
gilaau gu maatagu olaau lodo,
gilaau gu dee paba olaau lodo
bei dagodo o tai e dee maua laa gi malino.*Isa 17.1-3; Amos 1.3-5; Zec 9.1
24 Damascus gu deai ono mahi,
gai gu huli ma gu savini;
ia gu kona de manavasaa ma de mmae,
bei de mmae o de hine gu hai ono hagalangona.
25 Gai gu aha tee dilia ai laa de aduhale a dangada e tuhi laa,
gai go de aduhale oogu e malangilangi ai?
26 Deelaa ai, ono dama daane mmahi e maakau naa i honga ono haiava,
ono daane hebagi alodahi e hagallilo naa i de laangi laa,
go Tagi o denga hagabuulinga hebagi e hagadaba.
27 Gai au e dudu naa denga buibui o Damascus,
gai de ahi e oha naa denga hale danuaa o Ben-Hadad.”
Muna pelaabisi i dagodo o Kedar ma Hazor
28 Dagodo o Kedar ma de nohoanga hodooligi o Hazor, a Nebuchadnezzar de hodooligi o Babylon ne hebagi ange laa aagena. E hagadaba Tagi Maolunga:
“Hiihidi age, hebagi ange gi Kedar,
gai daia gi maakau dangada i de baasi dua!
29 Olaadeu hale malo ma alaadeu ssiibi e gaavee gee naa,
olaadeu malo buibui ma olaadeu goloa alodahi
ma alaadeu gamelo e gaavee gee naa.
Gai dangada e oo naa, ga hai ange,
‘Denga mee hagamaatagu gu hai i mommee alodahi!’
30 Dangada e nnoho i Hazor, goodou hagamoolau hulo gee!
Goodou hulo nnoho i lodo haonga,
go Tagi Maolunga e hagadaba.
De hodooligi o Babylon go Nebuchadnezzar
gu hai dahi hagatau e hai baasi adu ai gi goodou;
ia gu hagadabena e hebagi adu ai gi goodou.
31 Hiihidi age hulo hebagi ange gi de huaahenua e nnoho paba laa ma de duadonu,
go Tagi Maolunga e hagadaba,
se huaahenua e deai ono abaaba aabe ni laagau hagamakaga;
e deai hogi dangada e paa ange gilaadeu.
32 Alaadeu gamelo e hai naa ga ni goloa e maua i de hebagi,
alaadeu manu haangai lagolago e duha naa.
Au e hai naa gilaadeu e dahi baasi o olaadeu biho
gi mavaevae saele gi denga mommee mmao,
ma de hai gi hai ngadaa gilaadeu i mommee alodahi,
go Tagi Maolunga e hagadaba.
33 Hazor e hai naa ga se mommee e nnoho ai denga jackal,
gai gi se mommee e maoha ga hano ai.
Gai e deai naa donu dangada e nnoho i kilaa,
e deai naa hogi e noho gaainga i de mommee laa.”
Muna pelaabisi i dagodo o Elam
34 Gai aanei muna a Tagi Maolunga ne hagaago ange gi de pelaabisi go Jeremiah, dagodo o Elam, i taamada de dagi o Zedekiah, de hodooligi o Judah, ga hai ange, 35 “E hagadaba Tagi o denga hagabuulinga hebagi:
Tilo, au e hhadi naa de mee hholu a Elam,
go de goloa hebagi olaadeu e mmahi ai.
36 Au e gaamai naa denga madangi e haa
i dege e haa o de langi gi hai baasi ange gi Elam.
Au e hai naa gilaadeu gi mavaevae saele i denga madangi e haa,
gai e deai naa donu se huaahenua
o dangada o Elam e dee mavaevae saele aagena.
37 Au e hai naa gi maatagu dangada o Elam i olaadeu hagadaumee,
aama dangada e nnoho e daia gilaadeu gi maakau.
Au e hai naa gi humai
de hai ngadaa gi gilaadeu i dogu lili,
go Tagi Maolunga e hagadaba.
Au e doolohi naa gilaadeu ma de gadilaasa,
ga dae ai gi dagu daa gilaadeu gi odi.
38 Au e hagaduu naa dogu nohoanga i Elam,
gai ga daa gi maakau dono hodooligi ma ono dagi,
go Tagi Maolunga e hagadaba.
39 Aagai muli mai naa huu,
gai au e hagaahe ange naa de manuuia o Elam,”
go Tagi Maolunga e hagadaba.