50
Muna pelaabisi i dagodo o Babylon
1 Muna a Tagi Maolunga ne tala i dagodo o Babylon, i daho de pelaabisi go Jeremiah, ma de henua o de gau Babylon:*Isa 13.1—14.23; 47.1-15
2 “Goodou daalaa gi langona e dangada i denga huaahenua,
hagaduulia age dahi hagailonga ma de hagailoo ange gi dangada;
goodou e dee hagammuni donu, aagai hagataba,
‘Babylon e hagadee kii naa,
gai a Bel e hagadogaa naa,
Merodak*Bel ma Merodak ni ingoo niio dahi diinonga. e madagu naa.
Ono diinonga e hagadookaa ina naa,
gai ono diinonga gu maatagu.’
3 Go hiidinga dahi huaahenua gu humai i ngaiho e hebagi ange gi de ia,
ma de hai dono henua gi ngadi dagodo,
gu deai dangada e nnoho ai;
dangada ma manu alodahi e saavini naa ga hulo gee mai i kilaa.
4 Laangi laa i de masavaa laa,
go Tagi Maolunga e hagadaba,
gai de gau Israel ma dangada o Judah e hagabuni naa
ma de tangi ga hulo ai ga ssala Tagi Maolunga delaadeu Maadua.
5 Gilaadeu e ssili naa de haiava e hano laa gi Zion,
ma de huuhuli ange gi kilaa, ga hagataba,
‘Loomai, gidaadeu ga hagabuni ange gi Tagi Maolunga
i dahi hagatoo donu hagaheloongoi dee ngado mai
e dee maua laa gi ngalo.’
6 Ogu dangada gu bei dagodo o denga ssiibi gu dee maleva laa;
olaadeu dangada hagaloosi gu tili gilaadeu gi ssenga saele i honga mounga.
Gai gilaadeu gu silivaahea saele i honga mounga ma duuduu,
gilaadeu gu ngalo de mommee iai delaadeu buibui.
7 Gai dangada alodahi e gidee gilaadeu gu gai gilaadeu,
olaadeu hagadaumee e hagataba,
‘Gimaadeu e tigi haisala donu,
go hiidinga gilaadeu gu haisala ange donu gi Tagi Maolunga,
go delaadeu mommee nnoho heohi,
go Tagi Maolunga, de tali a olaadeu maadua madagidagi.’
8 Goodou ssao hulo gee mai i Babylon;
gai hulo gee mai i de henua o de gau Babylon,
goodou gi bei denga guudi daane
e dagina laa de hagabuulingaa guudi.*Rev 18.4
9 Tilo, au e hai naa gi humai gi Babylon
dahi hagabuulinga soa mai i denga huaahenua i ngaiho.
Gai gilaadeu e hebagi ange naa gi de henua laa,
gilaadeu e hagadee kii naa Babylon.
Gai dao o alaadeu mee hholu e bei dagodo o denga daane hebagi e aabo i de tili,
e dee ngadi aahe mai laa donu huu.
10 Gai Babylon e gaiaadia naa goloa iai;
gai dangada alodahi e tae naa olaadeu lodo i de gaiaa ono goloa,
go Tagi Maolunga e hagadaba.
11 Goodou e haia gi de mahi mee o dogu boolonga,
go hiidinga goodou ne malangilangi,
go hiidinga goodou ne llodo danuaa,
goodou e bei de kaau e lele duuduudia laa denga grain,
ma de goo bei denga hoosa mmahi,
12 deelaa ai, doodou dinana e kona naa de dogaa;
gai de ia ne hanaua goodou e hagangadi mee ina naa.
Ia e hai naa ga maolalo ange i denga huaahenua,
gai se vao, se henua e deai vai iai, gai se lodo henua.
13 Go hiidinga de bole o Tagi Maolunga,
de henua e deai naa dangada e nnoho ai,
aagai e hai naa ga se mommee e ngadi dagodo.
Gai dangada alodahi e seesee i gaogao o Babylon
e llele naa olaadeu mouli,
ma de hagavogivogi i dono maoha.
14 Goodou holiagina luu baasi o Babylon hebagi ange aagena,
goodou alodahi e dilia de mee hholu;
dilia au dao gi odi ange gi lo te aduhale,
go hiidinga ia gu haisala ange gi Tagi Maolunga.
15 Goodou hevaalogi i doodou masavaa e holiage ai de aduhale!
De aduhale gu magulu,
ono hale buibui makaga gu maoha,
dono buibui gu oha iho.
Go hiidinga deenei de hai a Tagi Maolunga e sui ange ai ana hegau:
hai baasi ange gi de ia;
suuia ange gi bei dagodo o ana mee gu hai.
16 Gaavee gee mai i Babylon tangada e dooa mee,
aama tangada e duuduudia manu i de masavaa o de hagihagi;
i hiidinga de gadilaasa e daia dangada,
dangada alodahi gi aahe gi daho olaadeu dangada donu,
gai dangada alodahi gi saavini gi hulo gi olaadeu henua donu.
17 Israel e bei dahi hagabuulingaa ssiibi
e doolohia laa i de laiono ga hai gu mavaevae saele.
Tangada ne holomia ia i mua
go de hodooligi o Assyria;
gai tangada hagaodi ne hadihadia ono ivi
go Nebuchadnezzar, de hodooligi o Babylon.”
18 Deenei ai, e hagadaba Tagi o denga hagabuulinga hebagi, de Maadua o Israel:
“Tilo, au e hagaduasala naa de hodooligi o Babylon ma dono henua,
bei dagu hai ne hagaduasala ai laa de hodooligi o Assyria.
19 Aagai au e hagaahe mai naa Israel gi dono mommee iai helii,
gai ia e gaimee ai i honga Carmel ma Bashan;
ia e bosu danuaa naa
i honga duuduu o Ephraim ma Gilead.
20 Laangi laa ma de masavaa laa,
go Tagi Maolunga e hagadaba,
gai e ssala naa gi gidee baubau o Israel,
aagai e deai naa donu haisala e gidee;
e ssala naa hogi gi gidee haisala o Judah,
aagai e deai naa hogi e gidee,
go hiidinga au e degi ange naa gi dangada aagu e hagaola.
21 Goodou loage hebagi ange gi de henua go Merathaim,†Merathaim i muna Hebrew e bei go de hai baasi i e lua hanonga.
ma dangada e nnoho i Pekod.‡Pekod i muna Hebrew e bei go de hagaduasala.
Dolohia, ga daa gilaadeu alodahi gi odi i de maakau,
go Tagi Maolunga e hagadaba,
Haia donu gi bei mee alodahi aagu gu tala adu gi de goe.
22 De hagalongaa o de hebagi gu i honga de henua,
ma de hagalongaa o de oha laumalie!
23 De haamaa o henua i lalo alodahi ⌊go Babylon⌋
gu hhadi ma gu maoha!
Denga huaahenua gu llele olaadeu mouli
i de ngadi dagodo o Babylon!
24 Babylon, au gu dugu dahi sele e dada ai goe,
gai koe tee iloo donu doo masavaa ne noodia ai;
koe ne gidee mai ga boogia,
go hiidinga koe ne hai baasi ange gi Tagi Maolunga.
25 Tagi Maolunga gu hhuge dono mommee hhao goloa hebagi,
gai gu dada mai denga goloa hebagi o dono bole,
go hiidinga de Ia Aamua, Tagi o denga hagabuulinga hebagi,
e dahi ana hegau e hai i de henua o de gau Babylon.
26 Loomai i mommee mmao hebagi ange gi de henua laa;
oohaa ono mommee e hhao ai grain;
hagabudubudu ina age Babylon bei denga hagabuudungaa grain.
Oohaa de henua alodahi,
e dee dugu donu dahi dangada daudahi.
27 Daia gi maakau ana kaau alodahi;
haia gilaadeu gi loiho gi de mommee e daa ai manu.
E vakaa naa gilaadeu!
Go hiidinga gu dae mai delaadeu masavaa,
go de laangi olaadeu e hagaduasala ai.
28 Hagalaangona adu leo o dangada e silivaahea saele
ma gilaadeu ne saavini ga hulo gee mai i Babylon,
ma gi hagailoo ina i Zion
de hai a Tagi Maolunga, taadeu Maadua,
ne sui ange ai mee ne hai ange gi dono temple.
29 Hagahia gilaadeu e damaa tili gi hebagi ange ai gi Babylon,
go gilaadeu e dilia denga mee hholu.
Gilaadeu gi holiagina de henua laa,
gai gi dee dugua donu dahi dangada daudahi gi ola.
Hagao ina ange ana hegau baubau;
gai suuia ange gi bei ana hegau gu hai.
Go hiidinga de henua laa gu hagamaolunga i Tagi Maolunga,
de Ia Dabu o Israel.*Rev 18.6
30 Deenei ai, ono daane mmahi e maakau naa i honga ono haiava,
gai ono daane hebagi alodahi e dee mmuu naa i de laangi laa,
go Tagi Maolunga e hagadaba.
31 Tilo, tangada hagamaolunga, au e hai baasi adu gi de goe,
go de Ia Aamua, Tagi o denga hagabuulinga hebagi e hagadaba;
go hiidinga gu dae mai donu doo laangi,
go de laangi aagu e hagaduasala ai goe.
32 De ia hagamaolunga e baguu naa ga dagodo i honga de gelegele,
gai e deai naa donu se dangada e hagahidi age ia;
au e haula naa dahi ahi i lodo ono aduhale,
e dudu ai mee alodahi i luu baasi de henua laa.”
33 Gai e hagadaba Tagi o denga hagabuulinga hebagi:
“Dangada o Israel gu vaivai haia,
aama dangada hogi o Judah.
Dangada ne gaavee gilaadeu e daohi donu huu gilaadeu,
e dee llodo e dugu gilaadeu gi hulo.
34 Aagai de ia e hagaola ina gilaadeu e mmahi mmao;
dono ingoo go Tagi o denga hagabuulinga hebagi.
Ia e bale ange naa donu gilaadeu,
gai ia ga hai ai gi nnoho paba delaadeu henua,
aagai e hai naa gi dee nnoho paba dangada e nnoho i Babylon.
35 Dahi gadilaasa e hai baasi ange naa gi de gau Babylon!
go Tagi Maolunga e hagadaba,
gai e hebagi ange gi dangada e nnoho i Babylon,
ma ono dagi aama ono daane heiangi!
36 Dahi gadilaasa e hai baasi ange naa
gi gilaadeu e daalaa mee tigi loomai,
gilaadeu ni dangada llodo ssenga!
Dahi gadilaasa e daa naa ono daane hebagi!
Gai gilaadeu e kona naa donu de maatagu.
37 Dahi gadilaasa e daa naa denga hoosa ma de oha denga hada hebagi,
ma de gau henua gee e hebagi madali gilaadeu!
Gilaadeu e bei naa dagodo o denga haahine.
Dahi gadilaasa e oha naa ono goloa hagamogomogo!
Gilaadeu e hai gi de mahi naa ono goloa.
38 Gai e hagamaamasa naa ono vai,
gai gi deai ai vai i lodo ono vai!
Go hiidinga se henua iai denga diinonga,
gai gilaadeu e ssenga ange gi denga diinonga.
39 Gai denga manu lodo henua ma denga hyena e nnoho naa i kilaa,
denga owl e noho naa hogi i kilaa.
Gai e deai ange naa donu dangada e nnoho ai,
aabe noholia i denga atangada i muli mai.*Rev 18.2
40 Bei de hai a de Maadua ne oha ai laa Sodom ma Gomorrah
madali denga mommee e paa ange gi kilaa,
go Tagi Maolunga e hagadaba,
gai e deai naa donu dangada e nnoho gaainga i kilaa
gai e deai naa hogi dangada e nnoho i kilaa.*Gen 19.24-25
41 Tilo, dahi hagabuulingaa dangada e loomai naa i ngaiho;
dahi huaahenua soa ma hodooligi soa,
e loomai naa i luu bido o henua i lalo.
42 Gilaadeu e hagauda alaadeu mee hholu ma olaadeu dao;
gilaadeu e alasala ma tee llodo aaloha.
Delaadeu loomai e bei de haganngolo o de moana
i de masavaa olaadeu e saavini mai ai i honga hoosa;
gilaadeu e loomai bei denga daane hebagi e hagatau laa i olaadeu hagabuulinga
e hebagi adu gi de goe, tamaa hine o Babylon.
43 De hodooligi o Babylon gu langona olaadeu longo,
gai luoono lima gu pole.
Ia gu manavasaa ono lodo,
ma de mmae bei de hine gu hai ono hagalangona.
44 Tilo, au e humai naa bei de laiono i lodo mee muimui o Jordan
gi de mommee iai helii lau kohu,
gai e moolau naa donu dagu doolohi ia
ga hai gi hano gee i dono henua.
Gai au ga hili tangada oogu e malangilangi ai gi de hegau nei.
Goai e bei ogu dagodo?
Gai goai e maua i de hai baasi mai gi de au?
Gai goai tangada hagaloosi e maua i de hebagi mai gi de au?”
45 Deenei ai, goodou hagalaangona de hagatau a Tagi Maolunga
e hai baasi ange ai gi Babylon,
ma ana mee gu hagadabena e hebagi ange ai gi de henua o de gau Babylon:
dama a dana hagabuulingaa ssiibi e gaavee gee naa;
ia e oha naa olaadeu mommee iai helii i olaadeu hiidinga.
46 Gai henua i lalo e bolebole naa i delaadeu langona de hagadee kii ina o Babylon;
gai dono leo e dangi ai e dae naa gi denga huaahenua.