51
De hagaduasala o Babylon
1 E hagadaba Tagi Maolunga:
“Tilo, au e hagangalue naa lodo o de ia daa dangada
gai ia ga hebagi ange ai gi Babylon,
aama dangada e nnoho i Leb Kamai.*Leb Kamai go dahi ingoo o Babylon e dai dee iloo.
2 Au e hai naa gi hulo de gau henua gee gi Babylon
e nonu ai de henua bei de ili gi deai dangada i dono henua;
gilaadeu e hebagi ange gi de henua i luu baasi alodahi
i de laangi oona e hai ngadaa ai.
3 Tangada e dilia de mee hholu gi dee daangia dana mee hholu,
ia gi dee gahu i dono malo hebagi baalanga.
Gai e dee dugu gi ola denga dama daane i kilaa
gai daia donu gi maakau dono hagabuulinga hebagi alodahi.
4 Gilaadeu e daa naa ga maakau i de henua o de gau Babylon,
aama de lagolagohia ga maakau i honga ono haiava.
5 Gai de Maadua, go Tagi o denga hagabuulinga hebagi,
tigi tili donu Israel ma Judah,
e dee galemu donu delaadeu henua gu honu i de haisala
i mada luu mada o de Ia Dabu o Israel.
6 Saavini hulo gee mai i Babylon!
Tangada nei ma tangada nei gi hagaola ina dono mouli!
Goodou gi dee maakau i hiidinga ono haisala.
Deenei de masavaa a Tagi Maolunga e sui ange ai,
aama de hagao ange ai de henua laa gi bei dagodo o ana hegau gu hai.
7 Babylon e bei de ubu goolo i lo te lima o Tagi Maolunga,
gai gu hagaunu ai gi ssenga henua i lalo alodahi.
Denga huaahenua gu unu uvaini iai,
deelaa ai, gilaadeu gu odi i de ssenga.*Rev 17.2-4; 18.3
8 Gai tee mmule donu gai Babylon gu oha ga maoha;
oo mage dangi i ono hiidinga!
Gai gaavee hanu valaai e hai ai ono mee mmae;
kana adu e maua naa huu gi ieiangi ia.
9 Gimaadeu ne hagatale de hai gi ieiangi Babylon,
aagai ia tee maua gi ieiangi.
Gidaadeu ga tili ia, gai dahi ma dahi gi hano gi dono henua;
go hiidinga dono hagaduasala gu dae age loo gi lo te langi
gai gu maolunga donu bei denga giliiga.*Rev 18.5
10 ⌊Dangada e hagataba,⌋ ‘Tagi Maolunga gu tala odaadeu heohi;
loomai, gidaadeu ga tala i Zion
dagodo hegau a Tagi Maolunga, taadeu Maadua gu hai.’
11 Hakaa ina denga dao!
Gai hagauda ina denga mee hungihungi!
Tagi Maolunga gu hagangaalue lodo o denga hodooligi o de gau Media,
go hiidinga ia gu baba ange e oha Babylon.
Tagi Maolunga e sui ange naa ana mee
ne hai ange gi dono temple.
12 Hagaduulia age dahi hagailonga i gaogao de buibui o Babylon;
haia gi soa dangada e hagaloosia;
hagatuu ina denga daane hagaloosi;
go hiidinga Tagi Maolunga gu hai dahi hagatau
gai gu hagassula donu ana mee gu tala ai
dagodo o dangada e nnoho i Babylon.
13 Goodou e nnoho i gaogao denga vai lagolago,
gai ni dangada lava,
gu dae mai doodou laangi e maakau ai,
gai oodou mouli e modu naa bei taula.*Rev 17.1
14 Tagi o denga hagabuulinga hebagi gu hagatoo donu i dono ingoo:
Ni muna abodonu, au e hhao naa de henua
i dangada soa bei de lagolago o denga itebuubuu,
gai gilaadeu e oo naa i delaadeu kii i de goe.
15 Go ia ne haia henua i lalo i ono mahi;
ma de hagaduu henua i lalo i dono heiangi,
aama de hhola de langi i dono iloo mee.
16 De masavaa oona e basa ai,
gai vai i lo te langi gu hagangolo;
ia e hai de mama o denga vai gi hanage i luu bido o henua i lalo.
Ia e hai gi labalaba de uila i de masavaa e pala ai de langi,
ma de hagasao mai de madangi i lodo ono mommee doange goloa.
17 Dangada alodahi e ssenga ma teai selaadeu iloo mee,
de labagau o denga goolo e hagadogaa ina naa i ono diinonga.
Ono diinonga e dee ni mee abodonu;
gilaadeu e dee maua i de manamanava.
18 E deai olaadeu haigamaiana, gai ni mee hakadanga;
gilaadeu e llilo naa i de masavaa o delaadeu hagaduasala.
19 Gai e dee deenei tagodo o de ia e hagabinga laa go Tuuhanga o Jacob;
gai go ia ne haia mee alodahi,
aama Israel de aamuli o dono boolonga —
dono ingoo go Iahweh o denga hagabuulinga hebagi.
20 Go koe dagu haamaa ma dagu laagau hebagi —
go koe e balea mai au e oha ai denga huaahenua,
go koe e balea mai au e oha ai denga nohoanga hodooligi,
21 go koe e balea mai au e daa de hoosa ma tangada e gage ai;
go koe e balea mai au e oha ai de hada hebagi ma tangada e savini ai;
22 go koe e balea mai au e daa ai taane ma de hine;
go koe e balea mai au e daa ai tangada madumadua ma tama daane;
go koe e balea mai au e daa ai tama daane ma tamaa hine;
23 go koe e balea mai au e daa ai tangada hagaloosi ma ana ssiibi;
go koe e balea mai au e daa ai tangada hai veelenga
ma ana kaau e hagahai hegau;
go koe e balea mai au e daa denga goobenaa ma dagi o de hebagi.
24 Au e sui ange naa hegau a Babylon ma dangada alodahi e nnoho i kilaa i oodou mada i mua, i hiidinga hegau baubau alodahi alaadeu ne hai i Zion, go Tagi Maolunga e hagadaba.
25 Tilo, au e hai baasi adu gi de goe, de mounga e oohaa mee,
go Tagi Maolunga e hagadaba,
go de mounga e oohaa henua i lalo alodahi.
Au e hagaabo naa dogu lima e hai baasi adu ai gi de goe,
ma de poo goe ga maga iho i de mommee maolunga,
ga hai goe gi se mounga gu lava i de dudu.
26 Gai e deai naa donu se hadu e aau gee mai i kilaa e hai ai tuludulu o de logunga
gai e deai hogi se hadu e kave e hagaduu ai tagelo,
aagai koe e ngadi dagodo naa donu huu ga hano ai,
go Tagi Maolunga e hagadaba.
27 Hagaduulia age dahi hagailonga i honga de henua,
gai ilihia de hanga manu i denga huaahenua.
Hagadaabena ina denga huaahenua e hebagi ange gi de ia;
gai hagahia de nohoanga hodooligi o Ararat, ma Minni, aama Ashkenaz.
Hilia tagi o denga daane hebagi gi hebagi ange gi de ia,
gai gaamai denga hoosa lagolago bei denga itebuubuu.
28 Hagadaabena ina denga huaahenua e hebagi ange gi de ia —
go denga hodooligi o Media,
ma olaadeu goobenaa ma dagi,
ma henua alodahi e nnoho i olaadeu lalo.
29 De henua gu bolebole ma de mmae,
go hiidinga de hagatau a Tagi Maolunga
e hai baasi ange ai gi Babylon, e hagasula donu;
gai ia ga hai ai gi ngadi dagodo de henua go Babylon,
gi deai ai dangada e nnoho i kilaa.
30 Denga daane dau i de hebagi o Babylon gu haganoho de hebagi,
gilaadeu gu mmuni i lodo olaadeu hale buibui makaga,
gai gu deai olaadeu mahi,
gilaadeu gu bei dagodo o denga haahine.
Denga hale i de aduhale gu dudu i de ahi,
gai ono baalanga hagamakaga gu hadihadi.
31 Dahi dangada adi muna e savini adu naa i dua o de ia ange laa;
dahi dangada e gaavee de longo e savini adu naa i dua o de ia ange laa,
e hagailoo ange gi de hodooligi o Babylon
bolo dono aduhale alodahi gu hagadee kii ina.
32 Mommee e hulo ai laa lo te vai gu gaavee,
gai denga mommee buibui makaga gu dudu i de ahi,
gai denga daane hebagi gu maatagu.”
33 Gai e hagadaba Tagi o denga hagabuulinga hebagi, de Maadua o Israel:
“Tamaa hine o Babylon e bei de mommee hili huamanu,
i de masavaa oona e dagadagahia ai;
dono masavaa e hagihagi ai gu dai dae mai donu.”
34 ⌊Dangada o Jerusalem e hagataba,⌋
“De hodooligi o Babylon go Nebuchadnezzar gu holo gimaadeu,
ia gu hai gi ssenga ange gimaadeu,
ia gu hai gimaadeu bei de ssaa gu deai mee i ono lodo.
Ia gu holo gimaadeu bei dahi manu hagamaatagu,
ma de hhao dono dinae i agu gai mammami,
ga lava ga luei mai gimaadeu.”
35 Dangada e nnoho i Zion e hagataba,
“Hegau baubau gu hai mai gi de au ma ogu dangada
gi dau ange gi Babylon.”
Dangada o Jerusalem gi hagataba,
“Omaadeu dodo gi dau ange gi dangada e nnoho i Babylon.”
36 Deenei ai, e hagadaba Tagi Maolunga,
“Tilo, au e bale adu naa goe
e sui ange ai hegau baubau aana ne hai adu gi de goe.
Au e hai naa gi maamasa ono dai
ma de hai gi deai vai i lodo ono saalingaa vai.
37 Gai Babylon e bei naa dahi hagabuudungaa mee maoha,
gai se mommee e nnoho ai denga jackal,
se mommee hagamaatagu,
ma de llele ai mouli o dangada,
gai se mommee gu deai dangada e noho ai.
38 Dangada i kilaa e koo naa bei dagodo o denga laiono;
gilaadeu e hagangolo naa bei dama a de laiono.
39 Aagai de masavaa olaadeu gu ssae ai
gai au e hagadabena naa dahi daonga ange gi gilaadeu,
ga hai gilaadeu gu ssenga ma de malangilangi —
ga dae ai gi delaadeu sseni ga hano ai
gilaadeu gu dee alahage ange,
go Tagi Maolunga e hagadaba.
40 Au e kave naa gilaadeu gi de mommee e daa ai gilaadeu gi maakau,
bei denga ssiibi gauligi ma guudi daane, aama ssiibi daane.
41 Dee hee de hai ne hagadee kii ai laa Sheshak,†Sheshak go dahi ingoo o Babylon e dai dee iloo.
gai de henua a henua i lalo e tuhi gu magulu!
Babylon gu hai ma gu se mee hagamaatagu
i magavaa o denga huaahenua!
42 Tai e honu age naa ga haoli Babylon,
gai denga beau hadihadi mai naa ga haoli de henua.
43 Ono aduhale e hai naa ga ni mommee e ngadi daakodo,
gai gu se henua e deai vai iai, gu se lodo henua,
gai gu se henua e deai dangada e nnoho ai,
gu deai hogi dangada e hulo saele laa kilaa.
44 Gai au e hagaduasala naa a Bel i Babylon,
ga hai ia gi lueia mai mee aana gu holo.
Gai denga huaahenua gu dee daga e hulo gi ono daha;
de buibui o Babylon gu maoha.
45 Ogu dangada, goodou ssao hulo gee mai i de henua!
Dahi ma dahi gi hagaola ina dono mouli
mai i de kona de bole o Tagi Maolunga!
46 Goodou gi dee manavasaa oodou lodo aabe gi maatagu
i doodou langona denga longo i honga de henua;
dahi longo e dae mai naa i de ngadau nei
gai e dahi ange naa e dae mai i de ngadau e humai,
go longo o de hai ngadaa honga de henua,
ma de hagadau hebagi o denga dagi.
47 Deenei ai, tilo, e tae mai naa donu laangi
aagu e hagaduasala ai denga diinonga o Babylon;
dono henua alodahi e hagangadi mee ina naa,
gai ono dangada e maakau naa ma e daakodo saele i kilaa.
48 De langi ma henua i lalo, ma mee alodahi iai,
e daahili naa ga malangilangi i de hai ange mee nei gi Babylon,
go hiidinga de gau e oohaa mee e loomai naa i ngaiho
ga hebagi ange gi de henua,*Rev 18.20
go Tagi Maolunga e hagadaba.
49 Babylon e oha donu i hiidinga o de gau Israel gu maakau laa,
aama dangada alodahi o henua i lalo a Babylon ne daa laa ga maakau.*Rev 18.24
50 Goodou dangada ne ola mai i de gadilaasa,
hulo gee mai i kinei, goodou gi dee ngadi tuu saele donu huu!
Goodou gi manadua Tagi Maolunga i doodou nnoho i dahi henua mmao,
goodou gi manadua Jerusalem.”
51 ⌊Goodou e hagataba,⌋ “Gimaadeu gu hagangadi mee ina,
go hiidinga gimaadeu gu langona hanu muna hagadookaa;
gimaadeu gu dee hagadubulia,
go hiidinga de gau henua gee gu ulu
gi lodo mommee dabu i de hale o Tagi Maolunga.”
52 Aagai e hagadaba Tagi Maolunga,
“Tilo, e tae mai naa laangi
aagu e hagaduasala ai diinonga o Babylon,
gai honga de henua alodahi
iai naa de gau lagolagohia gai gilaadeu e gonogono.
53 Gai ga dae age naa donu Babylon gi de langi,
ma de hai ga makaga dono mommee buibui maolunga iai,
aagai au e hai naa gi loomai de gau oha
gi hebagi ange gi de ia,
go Tagi Maolunga e hagadaba.
54 Hagalaangona adu! Dangada o Babylon e tangi!
Gai e saamumu mai denga mee e maoha i de henua go Babylon!
55 Tagi Maolunga e oha Babylon alodahi,
ma de hai gi dee langona dono leo e hagalongaa ai.
Beau a ono hagadaumee e bei naa de nngolo o vai lagolago;
gai olaadeu leo gu kona donu de nngana.
56 Dahi dangada oha mee gu humai e hebagi ange gi Babylon;
ono daane hebagi gu noonoodia ma gu gaavee,
gai alaadeu mee hholu gu hadihadia.
Go hiidinga Tagi Maolunga se Maadua e suuia ange de baubau,
gai ia e hagaodi ange donu de hagaoanga o ana hegau.
57 Gai au e hai naa ono dagi ma ono daane heiangi
gi bei dangada gu unu laa ma gu ssenga,
ma ono goobenaa, aama dagi o de hebagi,
aama ono daane dau i de hebagi;
gilaadeu e sseni naa ga hano ai
gai e dee aalahage ange naa donu,”
go de Hodooligi e hagadaba, dono ingoo go Tagi o denga hagabuulinga hebagi.
58 E hagadaba Tagi o denga hagabuulinga hebagi:
“De buibui lahalaha o Babylon
e oha iho naa ga dagodo i honga de gelegele,
gai ono haitoga maolunga e dudu naa i de ahi;
hegau kona a dangada e deai naa donu ono haigamaiana,
denga huaahenua ne hagadaalea ange donu huu gi mee e dudu i de ahi.”
59 Gai aanei muna a Jeremiah ne tala ange gi tagi o de gau hegau go Seraiah tama daane a Neriah, tama daane a Mahseiah, i de masavaa oona ne hano ai gi Babylon madali Zedekiah, de hodooligi o Judah, i de haa ngadau oona ne hodooligi ai. 60 Gai Jeremiah ne sisi i lo te beebaa mulo denga hagaduasala alodahi ne hai ange gi Babylon — go mee alodahi ne daohi i dagodo o Babylon. 61 Gai Jeremiah ga hai ange gi Seraiah, “De masavaa naa huu oou e dae ai gi Babylon, gai koe diiloo daulia ange muna nei alodahi gi langona e dangada. 62 Gai koe ga hai ange, ‘Tagi Maolunga, koe gu hagadaba bolo koe e oha de mommee nei, gai e deai naa donu se dangada aabe se manu e nnoho ai; gai e ngadi dagodo naa ga hano ai.’ 63 Gai ga lava naa huu i dau dau ange muna o de beebaa mulo naa, gai koe ga nnoa ange gi dahi hadu ga maga ange gi lo te saalingaa vai go Euphrates.*Rev 18.21 64 Gai koe ga hai ange, ‘Babylon e abulu naa gu dee hagaahe age ange donu, i hiidinga o de hai ngadaa aagu gu dai gaamai gi de henua. Gai dangada e nnoho ai e deai olaadeu mahi.’ ”
Deenei de hagaodi muna a Jeremiah.