52
De hagadee kii ina o Jerusalem
(2 Ki 24.18—25.7)
1 Zedekiah gu madalua ma dahi ono ngadau i de masavaa oona ne dae ange ai ga hodooligi, gai ia ne hodooligi i e madaangahulu ma dahi ngadau i Jerusalem. Gai de ingoo o dono dinana go Hamutal, tamaa hine a Jeremiah, taane Libnah. 2 Gai ia ne hai de baubau i mada luu mada o Tagi Maolunga, bei hegau alodahi a Jehoiakim. 3 Mee nei ne hai i hiidinga de lili o Tagi Maolunga i Jerusalem ma Judah, gai ia ne hai gilaadeu gi hulo gee mai i mada luoono mada.
Zedekiah ne hai baasi ange gi de hodooligi o Babylon. 4 Gai ssiva ngadau huu o Zedekiah ne hodooligi ai, i de madaangahulu laangi o de madaangahulu malama, gai Nebuchadnezzar, de hodooligi o Babylon ma dono hagabuulinga hebagi alodahi ne loomai e hebagi ange gi Jerusalem. Gai gilaadeu ne duuli luu baasi de aduhale ga hagatuu denga mee e oha ai de buibui o de aduhale.*Ezk 24.2 5 Gai de aduhale laa ne duuli ina luu baasi ga dae ai gi de madaangahulu ma dahi ngadau o Zedekiah ne hodooligi ai.
6 Gai ssiva laangi huu o de haa malama o de ngadau laa, gai gu kona de onge i lo te aduhale laa, gu deai gai a dangada. 7 Gai gu oohaa ga masaavava de buibui o de aduhale, gai denga daane hebagi alodahi ne saavini ga hulo gee. Gilaadeu ne ssao ga hulo laa lo te haitoga i magavaa luu buibui, i gaogao de veelenga a de hodooligi, i de masavaa a de gau Babylon e duuli ai luu baasi de aduhale. Gai gilaadeu ne ssao ga hulo i de haiava e hano laa gi Arabah.*Ezk 33.21 8 Aagai de hagabuulinga hebagi o Babylon ne doolohi de hodooligi go Zedekiah ga poo i lo te duu malaelae o Jericho, gai ono daane hebagi alodahi gu mavaevae saele.
9 Gai de gau Babylon ga poo Zedekiah ga kave gi de hodooligi o Babylon i Riblah, i de henua go Hamath, ga hagamodu ai ono muna. 10 Gai de hodooligi o Babylon ne daa ga maakau denga dama daane a Zedekiah i mada luoono mada, ia ne daa hogi ga maakau dagi alodahi o Judah i Riblah. 11 Gai ia ne llao mai luu hadu mada o Zedekiah; gai de hodooligi o Babylon ga nnoa ia i daula baalanga, ga kave gi Babylon ga hhao gi lo te hale pono, ga dae ai gi de laangi oona ne magau ai.*Ezk 12.13
De oohaa ina o de temple
12 Gai de madaangahulu laangi huu o de lima malama i de madaangahulu ma siva ngadau o Nebuchadnezzar, de hodooligi o Babylon, gai Nebuzaradan, tagi o de gau hagaloosi gai se dagi i lalo o de hodooligi o Babylon ne humai gi Jerusalem. 13 Gai ia ne dudu de hale o Tagi Maolunga, ma de hale o de hodooligi, aama hale alodahi i Jerusalem. Ia ne dudu hogi denga hale hagamogomogo alodahi i kilaa.*1 Ki 9.8 14 Gai de hagabuulinga hebagi o Babylon alodahi ne loomai laa madali tagi o de gau hagaloosi ga oha de buibui i luu baasi o Jerusalem. 15 Gai Nebuzaradan, tagi o de gau hagaloosi, ne kave gee mai i de henua hanu dangada hagaau aloha, ma dangada e doe i de aduhale, madali denga labagau e doe, aama dangada ne hagabuni ange laa gi de hodooligi o Babylon. 16 Aagai Nebuzaradan, tagi o de gau hagaloosi, ne dugu hanu dangada hagaau aloha hugadoo gi diiloo ange denga veelengaa grape ma de hagabalabala de gelegele.
17 Gai de gau Babylon ne oha denga duludulu bronze ma denga hada aama taaba bronze e dugu laa i lo te hale o Tagi Maolunga; gilaadeu ne kave denga bronze alodahi gi Babylon.*1 Ki 7.15-47 18 Gilaadeu ne kave hogi denga anibada, ma savolo, ma mee diinei laama, ma beisini, ma gumedi, aama goloa bronze alodahi e hai ai hegau o de temple. 19 Gai tagi o de gau hagaloosi ne kave hogi denga boolo, ma mee hhao maga ahi, ma beisini, ma anibada, ma mee dugu laama, ma gumedi e hai ai sigidaumaha maanongi, ma boolo e hai ai ssigidaumaha o mee unu, ma goloa alodahi e hai i goolo ma selevaa.
20 Gai luu duludulu bronze, ma taaba hhao vai, ma denga kaau bronze e madaangahulu ma lua e dugu ange laa aagena, go mee a de hodooligi go Solomon ne hai laa moo de hale o Tagi Maolunga, tee maua i de hagahidi gi iloo taemaha. 21 Gai tuuduu o dahi duludulu laa se madaangahulu ma valu sugilima, gai de haidenga o luu baasi se madaangahulu ma lua sugilima, gai de maadolu o dahi se haa madannia, gai e masaavava ono lodo. 22 De ulu o dahi duludulu bronze laa se lima sugilima tuuduu, gai e hagalaagii i gaini ma pomegranate; mee alodahi ne hai i bronze. Gai e bei ai hogi tuludulu ange laa ma ono pomegranate. 23 E massiva ma ono pomegranate i de baasi o dahi duludulu laa; gai se lau pomegranate e hagabigibigi ange gi luu baasi i honga de gaini.
De gaavee o dangada gi Babylon
(2 Ki 25.18-21, 27-30)
24 Gai tagi o de gau hagaloosi ne kave tangada haimeedabu maolunga go Seraiah, ma Zephaniah dono dogolua, aama e dogodolu daane e hagaloosia ange de haitoga o de hale daumaha. 25 Gai ia ne kave mai i dangada e doe i de aduhale, tagi o denga daane hebagi, ma e dogohidu daane hagasaele o de hodooligi. Ia ne kave hogi tangada sisi, go tagi o denga daane hebagi, gai go taane ne hagabuni ina dangada o de henua, aama e dinoono daane ne gidee mai i lo te aduhale. 26 Gai tagi o de gau hagaloosi go Nebuzaradan ne kave gilaadeu gi daho de hodooligi o Babylon i Riblah. 27 Gai de hodooligi o Babylon ne daa gilaadeu ga maakau i Riblah, i de henua go Hamath.
Deenei de hai o dangada o Judah ne gaavee gee mai i delaadeu henua. 28 Gai deenei taelodo o dangada a Nebuchadnezzar ne kave gi dahi henua gee:
de hidu ngadau, se 3,023 Ssuu;
29 de madaangahulu ma valu ngadau o Nebuchadnezzar ne hodooligi ai, se 832 dangada mai i Jerusalem;
30 gai de madalua ma dolu ngadau o Nebuchadnezzar ne hodooligi ai, se 745 dangada mai i Judah a Nebuzaradan, tagi o de gau hagaloosi ne kave;
se 4,600 ngadau dangada nei alodahi.
De ilaage ma de hagadubu o Jehoiachin
31 Gai de matolu ma hidu ngadau huu i dua de gaavee gee o de hodooligi o Judah go Jehoiachin, i de madalua ma lima laangi o de madaangahulu ma lua malama, gai go de ngadau o Evil-Merodak ne dae ange ai ga hodooligi i Babylon, gai ia ne degi ange gi Jehoiachin, de hodooligi o Judah, ga hagasao mai ia i lo te hale pono. 32 Gai ia ne basa danuaa ange gi de ia, ga gaavange gi de ia dahi duulanga e maolunga ange laa i duulanga o denga hodooligi gu nnoho laa madali ia i Babylon. 33 Gai Jehoiachin ne hagaui ono malo nogo gahu ai i lo te hale pono, gai ia ne gaimee i teebele o de hodooligi i laangi alodahi i taulooloa dono mouli. 34 Gai de hodooligi ne gaavange mee o Jehoiachin e hagadanuaa i taulooloa dono mouli, ga dae ai gi de laangi oona ne magau ai.