Daahili Hagahinangalosaa
a Jeremiah
(Lamentations)
Hanu dagodo o de beebaa nei
De beebaa go Daahili Hagahinangalosaa a Jeremiah (aabe go Lamentations) go Jeremiah ne siia, i dua de hagadee kii ina o Jerusalem i 586 b.c. Gai e sisi ai e lima daahili o tangi see, i hiidinga de oohaa o Jerusalem; de aduhale laa gu ngadi dagodo, gai dangada gu gaavee gee i de henua. Mee lagolago e sisi i de beebaa nei, go dagodo o de dangi see, gai e basa hogi i dagodo de hagadonu a dangada de Maadua, ma de dahi alaadeu tali hagalodolodo ange gi de masavaa e humai. De gau Ssuu e hua denga daahili nei i alaadeu daumaha, i laangi olaadeu e hagahiikai ai ma de tangi see i ngadau alodahi. Deenei de laangi e hagamaanadu ai de duu ange de hai ngadaa gi de henua i 586 b.c.
Dahi gubu hagamogomogo: “Luoogu mada gu hhua i dogu dangi, gai gu dee baba ogu lodo; ogu lodo gu kona mmao de hinangalosaa i hiidinga ogu dangada gu maakau, gai denga gauligi ma gaagaa gu hiikai i honga denga haiava o de aduhale” (2.11).
Denga vaevaaenga
Denga daemaha o Jerusalem (1.1-22)
De hagaduasala o Jerusalem (2.1-22)
De hagaduasala ma de tali hagalodolodo (3.1-66)
De maoha o Jerusalem ga ngadi dagodo (4.1-22)
Talodalo i de abodonu (5.1-22)
1
De aduhale hagaaloha go Zion
1 De aduhale nogo soa laa dangada e nnoho ai
gu se mommee e ngadi dagodo!
De aduhale maolunga i magavaa o denga huaahenua
gu bei dagodo o de hine gu magau dono bodu!
De aduhale nogo maolunga ange laa i denga aduhale
gu hai ma gu se dangada hai hegau.
2 De aduhale laa e kona mmao de dangi i de boo,
ono loimada gu ssali iho gi luoono galaahuu;
gu deai se dangada i magavaa o ono soa
e hagaaneane ina ia.
Ono soa alodahi gu vaivai daakodo ange gi de ia,
gilaadeu gu ni hagadaumee niiona.
3 Judah gu gaavee gi dahi henua gee,
i dua dono vaivai haia ma de hai hegau hagaduasala ina.
Ia e noho i magavaa o denga huaahenua;
ia tee gidee dahi mommee e hagammabu ai.
Gilaadeu alodahi ne doolohia ia gu daea adu ia,
i dono masavaa e hai ngadaa ai.
4 Denga haiava e hulo laa gi Zion gu hinangalosaa,
go hiidinga gu deai dangada e loomai gi denga daonga gu hagailonga laa.
Haitoga alodahi o de aduhale gu deai dangada iai,
ono gau haimeedabu gu tangi;
denga bua mmoe gu daemaha olaadeu lodo,
gai Zion gu duasala mmao.
5 Dangada e kino i Zion gu ni dagi i kilaa,
ono hagadaumee gu nnoho paba.
Tagi Maolunga gu hagaduasala Zion,
i hiidinga ono haisala gu lagolago mmao.
Ana dama gu gaavee gee mai i de henua,
gai gu hai gi seesee i mada i mua o olaadeu hagadaumee.
6 De mahamaha alodahi gu gaavee gee
mai i daho tamaa hine o Zion.*tamaa hine o Zion e bei go dangada o Zion, aabe go de aduhale go Zion.
Ono dagi alodahi gu bei denga dia
gu deai laa selaadeu mommee iai helii;
gai gu deai hogi olaadeu mahi e saavini ai
e hulo gee mai i tangada e dolohia gilaadeu.
7 Laangi oona ne vaivai haia ai ma de silivaahea saele ai,
gai Jerusalem ne manadua denga goloa hagamogomogo alodahi,
e hanu i ono daha i denga laangi gu hulo.
De masavaa o ono dangada ne hagadee kii ina ai,
gai teai donu se dangada ne balea ange ia.
Ono hagadaumee ne haina ia,
ma de kada i dono hagadee kii ina.
8 Jerusalem gu kona mmao de haisala,
gai de aduhale gu dee gilimalali.
Dangada alodahi nogo hagadubu ina laa ia gu kino i de ia,
go hiidinga gilaadeu gu gidee dono gilisau;
gai de aduhale gu gonogono,
ma de huli gee luoono mada.
9 Ono magi haahine gu pigi ange gi ono malo;
gai ia gu dee anga ange donu gi ono dagodo i ngadau e loomai.
Dono hagadee kii ina ne hagalele mouli mmao,
gai teai donu se dangada ne hagaaneane ina ia.
“Tagi Maolunga, galo mai diiloo dogu duasala
go hiidinga dogu hagadaumee gu kii i de au.”
10 De hagadaumee gu hagabudu ono goloa
hagamogomogo alodahi.
Gai ia ne gidee denga huaahenua
gu ulu i dono mommee dabu —
go dangada aau tee dugu ange
gi ulu madali doo hagabuulingaa dangada.
11 Ono dangada alodahi gu duasala
i delaadeu hulo ga ssala alaadeu gai.
Gilaadeu ne hagahesuihagi olaadeu goloa hagamogomogo i hanu gai,
gi dee maakau ai gilaadeu.
“Tagi Maolunga, galo mai diiloo
dagodo o dogu hagangadi mee ina.”
12 Dangada e loomai laa ogu gaogao,
goodou e dee aanga mai naa donu gi ogu dagodo?
Goodou kalo mai diiloo.
Gu dahi ange laa hagaduasala bei de hagaduasala,
a Tagi Maolunga gu hai mai nei gi de au,
i de laangi ne kona ai dono lili?
13 Ia ne hai gi hano iho de ahi i de mommee maolunga,
gi duungia lodo ogu ivi.
Ia ne hhola dahi galauna e buulou ai luoogu vae;
gai ia ga hagaahe dua ai au.
Ia ne tili au gi noho sogosogo,
ma teai ogu mahi mai i taiao ga boo ai.
14 Ogu haisala gu nnoa ange au gi de laagau hagahai hegau,
gai go luoono lima ne hagamakaga ina mee nei;
mee nei ne daudau ange gi dogu ua;
ia gu hai gi deai ogu mahi.
De Ia Aamua gu dugu ange au
gi dangada oogu e dee bau ange aagena.
15 De Ia Aamua gu tili
denga daane hebagi alodahi i lo te aduhale;
ia ne hagahi dahi hagabuulinga hebagi
gi humai gi daia agu dama daane.
De Ia Aamua gu dagadagahi tamaa hine o Judah,
bei de hai e dagadagahi ai laa denga grape
i de mommee kumi uvaini.
16 “Au gu dangi i hiidinga o mee nei,
luoogu mada gu honu malingilingi i denga loimada;
go hiidinga gu deai e hagaaneane ina mai au,
ma de hagammahi ina mai ogu lodo.
Agu dama gu silivaahea saele,
gai de hagadaumee gu hagadee kii au.”
17 Zion ne dangidangi i dahi bale,
gai teai se dangada ne hagaaneane ina ange ia.
Tagi Maolunga gu hagamodu dagodo o Jacob,
bolo dangada i ono gaogao gi kino i de ia;
Jerusalem gu bei dahi mee hakino gee
i daho dangada alodahi.
18 “Tagi Maolunga e heohi,
aagai au ne hai baasi ange gi ana muna.
Denga huaadangada alodahi, goodou hagalaangona,
gai kalo mai diiloo dogu mmae.
Agu dama daane ma damaa hine
gu gaavee gi dahi henua gee.
19 Au ne hagahi gilaadeu e balea mai au,
gai gilaadeu ne hadu muna mai gi de au.
De gau haimeedabu ma denga daane maatua
gu daia ma gu maakau i lo te aduhale,
i de masavaa alaadeu e ssala ai hanu gai
gi dee maakau ai gilaadeu.
20 Tagi Maolunga, galo mai diiloo, au gu duasala mmao!
Au gu daemaha mmao,
gai ogu lodo gu dee baba
i hiidinga au ne kona mmao de hai dagu hai.
De gadilaasa e daa denga dama i duaahaho;
gai de magau gu dagodo hogi i lodo.
21 Dangada gu langona dogu gonogono,
aagai e deai donu se dangada e hagaaneane ina ogu lodo.
Ogu hagadaumee alodahi gu langona dogu hai ngadaa;
gilaadeu gu malangilangi i au mee gu hai mai gi de au.
Haia gi moolau de dae mai de laangi aau gu lava laa i de hagailoo,
gi bei ai gilaadeu ogu dagodo.
22 Alaadeu hegau baubau alodahi
gi tae age gi mada luoo mada;
gai hagaduasala ina gilaadeu
bei dau hai gu hagaduasala ai nei au,
i hiidinga o ogu haisala alodahi.
Gu kona mmao dogu gonogono i dogu duasala
gai gu deai ogu mahi.”