1 De Ia Aamua gu haoli tamaa hine o Zion

i de hagausinga o dono lili!

Ia ne tili iho mai i de langi gi henua i lalo

de mahamaha o Israel;

ia tee manadua donu de mommee e dugu ange aagena luoono vae,

i de laangi oona ne lili ai.

2 De Ia Aamua tee lodo aloha ange donu

gai ne oha mommee nnoho alodahi o Jacob;

ia ne oha mommee buibui makaga

o tamaa hine o Judah i dono bole.

Ia ne oha iho dono nohoanga hodooligi,

ma de hai gi dee hagadubulia ono dagi.

3 Ia ne hai gi deai mahi o Israel

i hiidinga de kona dono lili.

Ia ne aau dono lima sauaa e buibui ai laa gilaadeu,

i de masavaa o olaadeu hagadaumee ne loomai ai.

Ia ne hai baasi ange gi Jacob bei dagodo o de ahi,

ga hagallilo mee alodahi i kilaa.

4 Ia ne dada dana mee hholu bei hegau a de hagadaumee;

gai dono lima madau gu baba donu.

Ia ne daa ga maakau gilaadeu alodahi e tilo danuaa,

bei hegau a de hagadaumee;

ia ne llingi iho dono bole bei de ahi

gi honga de hale malo o tamaa hine o Zion.

5 De Ia Aamua gu bei dagodo o de hagadaumee;

ia gu oha ma de holo Israel.

Ia ne holo ono hale danuaa alodahi,

ma de oha ono mommee buibui makaga.

Ia gu hai gi laumalie

de hinangalosaa ma de dangi o tamaa hine o Judah.

6 Ia gu oha dono baasi hale bei dagodo o dahi veelenga;

ia gu oha dono mommee hagabuni.

Tagi Maolunga gu hai Zion gi ngalo

denga daonga ma denga Sabbath,

ia ne hagangadi mee de hodooligi

ma tangada haimeedabu i hiidinga de kona dono lili.

7 De Ia Aamua gu hagangadi mee dono mommee o ssigidaumaha,

ma de tili dono mommee dabu.

Ia gu dugu ange de hagadaumee

gi oohaa denga buibui o ono hale danuaa;

gilaadeu gu hagalongaa i lo te hale o Tagi Maolunga,

bei mee e hai i laangi o dahi daonga gu hagailonga laa.

8 Tagi Maolunga gu baba ange e oha

de buibui o tamaa hine o Zion.

Ia gu dagi de uga haide e haide ai,

gai tee hagaahe donu dono lima e oha ai laa.

Ia ne hai denga mee hagamakaga i tua de buibui

ma denga buibui gi hagaaloha olaadeu dagodo;

gai mee nei alodahi gu maoha ma gu daakodo ai.

9 Haitoga o de aduhale gu baakuu gi honga de gelegele;

gai olaadeu laagau hagamakaga gu hadihadi ma de maoha.

De hodooligi ma denga dagi o de henua gu gaavee gi denga huaahenua;

gai gu deai donu hainga,

gu deai hogi midi e hagaago ange gi denga pelaabisi

mai i daho Tagi Maolunga.

10 Denga daane maatua o tamaa hine o Zion

gu nnoho i honga de gelegele ma e dee mmuu ai,

gai gu hagamalili ange gelegele gi honga olaadeu biho

ma de kahu i denga malo daladala.

Denga damaa hine o Jerusalem

gu ino gi honga de gelegele.

11 Luoogu mada gu hhua i dogu dangi,

gai gu dee baba ogu lodo;

ogu lodo gu kona mmao de hinangalosaa

i hiidinga ogu dangada gu maakau,

gai denga gauligi ma gaagaa gu hiikai

i honga denga haiava o de aduhale.

12 Gilaadeu e hai ange gi olaadeu dinana,

“I hee iai pelaoaa ma uvaini?”

i de masavaa olaadeu e ssili ai olaadeu mada,

bei denga daane gu lagolagohia laa

i honga haiava o de aduhale,

gai gilaadeu gu paa ange donu gi de maakau

i de masavaa a olaadeu dinana e daohi ai gilaadeu.

13 Tamaa hine o Jerusalem,

dee hee dagu hai e tala ai oo dagodo?

Gai se aha aagu e hagadagodo ange goe aagena?

Tamaa hine o Zion,

se aha aagu e hagadulagi ange goe aagena,

gai au ga hagaaneane ai goe?

Doo maanuga gu gelo bei dagodo o tai;

gai goai naa e maua i de hagaieiangi goe?

14 Oo pelaabisi ne gidee denga midi hagaago ange

hadu muna ga daahanga ai dangada;

gilaadeu tee hagaago adu oo baubau

gi hagaahea mai ai goe gi de henua,

aagai gilaadeu ne hagassenga goe

i denga muna pelaabisi ga dagi gee ai goe.

15 Dangada alodahi e seesee laa oo gaogao

e baabaa naa olaadeu lima i de goe;

gilaadeu e hagavogivogi ma de geugeu olaadeu biho

i hiidinga o tamaa hine o Jerusalem, ga ssili:

“Deenei de aduhale e hagaingoo ange laa bolo e mahamaha mmao,

gai henua i lalo alodahi e malangilangi ai?”

16 Oo hagadaumee alodahi e hai baasi adu naa gi de goe i alaadeu muna;

gilaadeu e hagavogivogi, ma de kadi adu olaadeu gauvae gi de goe,

gilaadeu ne hagataba, “Gimaadeu gu oha de aduhale laa!

Deenei donu demaadeu laangi nogo tali laa,

gai iainei gu dae mai ma gu gidee e gimaadeu!”

17 Tagi Maolunga gu hai gi bei dana hagatau,

gai gu hagassula ana muna,

go ana muna gu hagasauaa madagidagi loo.

Ia gu oha de aduhale, ia tee lodo aloha ange donu aagena;

ia gu hai de hagadaumee gi malangilangi i mee gu hai adu gi de goe,

ma de hai oo hagadaumee gi mmahi ange i de goe.

18 Dangada e tangi ange gi de Ia Aamua

i olaadeu lodo.

De buibui o tamaa hine o Zion,

oo loimada gu bei de vai e sali laa i de laangi ma de boo;

koe e dee hagammabu donu,

gai oo loimada e dee tuu donu.

19 Alahage ma gi dangi i de boo,

i denga masavaa e sui ai laa de gau hagaloosi!

Daalaa mee i oo lodo bei de llingi o denga vai

i mada luu mada o de Ia Aamua!

Haalo ina ange luoo lima gi de ia

i hiidinga mouli o au dama,

gu ssili mada laa i delaadeu saalohia

i dege o denga haiava alodahi.

20 Tagi Maolunga, galo ange diiloo!

Goai ange aau gu hai ange mee nei aagena?

E heohi nei de gai a denga haahine alaadeu dama ne haanau,

go alaadeu dama nogo tilo danuaa ange?

E heohi nei de daa gi maakau o de gau haimeedabu ma denga pelaabisi

i lo te mommee dabu o de Ia Aamua?

21 Denga dama daane ma de gau maatua

gu daakodo i lodo gelegele i honga haiava;

agu damaa hine ma agu dama daane

gu daia ma gu maakau i de gadilaasa.

Koe ne daa gilaadeu ga maakau

i de laangi oou ne lili ai;

koe tee lodo aloha ange gi gilaadeu,

aagai ne daa gilaadeu ga maakau.

22 Koe ne hagahi gi loomai denga mee hagamaatagu

bei dau ssala ange dangada gi taonga;

gai e deai naa donu se dangada e maua gi ola aabe e mouli

i de laangi o Tagi Maolunga e bole ai.

Gilaadeu aagu ne haanau ma de haele

gu lava i de daa a ogu hagadaumee ma gu maakau.