1 Au se dangada gu duu ange gi de hai ngadaa

i de haele a de Maadua au i dono bole;

2 ia ne alualu au ma de hai au gi seesee

i de mommee gohu, e dee maalama;

3 ni muna abodonu, ia ne aheahe ange

ga hagailiili au i dono lima mai i taiao ga boo ai.

4 Ia gu hai dogu gili ma dogu angaanga gi hagadaga ange de bobo,

ma de hadihadi ogu ivi.

5 Ia gu duuli au ma de haoli au

i de hai ngadaa ma de hagaduasala;

6 ia gu hai au gi noho i lo te gohu

bei dagodo o dangada gu maakau odiodi laa.

7 Ia gu buibui au gi dee maua i de savini e hano gee;

ia gu hai denga daula baalanga daemaha ma gu nnoa ai au.

8 Au ne dalodalo ma de dangidangi i de bale,

gai ia tee hagallongo dagu dalodalo.

9 Ia ne buibui dogu haiava i duudangaa hadu,

ia ne hai gi pigo ogu haiava.

10 Ia e bei dagodo o de bea e noho laa ma e tali ai au,

ma de laiono e mmuni laa ma e dagitilo ai.

11 Ia ne dada mai au i ssaelenga ga hangahanga dogu angaanga

ma de tili au i kilaa, teai se dangada ne balea mai au.

12 Ia ne dada dana mee hholu

ma de hai au go de mee e tili ange aagena ana dao.

13 Ia ne tili ga ulu dogu hadu manava

i dao i lo tana mee hhao dao.

14 Au gu se mee e kada ai ogu dangada alodahi,

gilaadeu e hadu ogu daahili mai i taiao ga boo ai.

15 Ia ne haangai mai au i mee mmala

ma de hai gi bosu au i mee mmala.

16 Ia ne uguugu ange luoogu mada gi honga denga giligili,

ma de dagadagahi ange luoogu mada gi lodo lehu.

17 Ogu lodo gu dee baba,

au gu ngalo dagodo o de malangilangi.

18 Deelaa ai, au e hagadaba, “Gu deai donu se lodo mmahi i ogu daha,

gai gu deai hogi sagu tali ange gi Tagi Maolunga.”

19 Au e manadua dogu duasala ma dogu silivaahea saele,

de mee mmala ma de hagammau!

20 Ogu lodo e manadua donu huu mee laa,

ma de daemaha o ogu lodo.

21 Aagai ne dahi donu agu tali

i dagu manadua de mee nei:

22 Go hiidinga de abodonu o Tagi Maolunga, odaadeu tee maakau ai;

dono lodo aloha e dee helui donu.

23 Gai e hagahoou i daiao alodahi;

doo hai hegau i de mee abodonu e laumalie mmao.

24 Au e hagadaba, “Go Tagi Maolunga dogu duuhanga;

deenei ai, go ia dagu tali.”

25 Tagi Maolunga e abodonu ange gi gilaadeu e daalia ange ia,

ma tangada e saalaa ia.

26 Se mee danuaa de golomagi lodo o tangada

ga tali ai de hagaola a Tagi Maolunga.

27 Se mee danuaa de golomagi lodo o tangada

i de masavaa oona e dama daane ai.

28 Ia gi noho donu huu ma gi dee muu,

go hiidinga go Tagi Maolunga

ne hagauda ina ange de mee nei gi ono elunga.

29 Gai ia gi ino gi honga de gelegele —

kana adu e hanu donu haigamaiana o dana tali hagalodolodo.

30 Ia gi huli ange dono galaahuu gi tangada e hagailia ia,

gai ia gi dogaa.

31 Go hiidinga de Ia Aamua

e dee tili donu dahi dangada ga hano ai.

32 Gai e dee galemu naa donu dana hai gi duu ange au gi de hagaduasala,

gai ia e lodo aloha mai donu hogi,

bei tagodo o dono abodonu laumalie.

33 Ia e dee lodo donu e hagaduasala dahi

aabe e hagadaemaha dangada.

34 De vaivai haia o dangada alodahi

i lo te hale pono i henua i lalo,

35 ma tee hagamodu muna o dangada i de heohi

i mada luu mada o de Ia Maolunga Mmao laa,

36 ma de hagahaisala de hagamodu muna o tangada,

ni mee niio de Ia Aamua e kino ai.

37 Goai e maua i de tala dahi muna gai e hai ga bei,

noo de Ia Aamua laa e dee dugu ange?

38 E aha, e dee go de Ia Maolunga Mmao laa

e daalaa de loomai o de baubau ma tanuaa?

39 Gai gu aha tangada gu nanu ai

i dono hagaduasala i hiidinga ono haisala?

40 Gidaadeu gi dagidiiloo adaadeu hegau,

ma de aahe mai gi Tagi Maolunga.

41 Odaadeu lodo gi daangage age,

ma de haalo age odaadeu lima gi de Maadua i de langi,

42 ma gi hagataba, “Gimaadeu gu haisala ma de hagamaanege,

gai koe tigi degi mai gi gimaadeu.

43 Koe ne saabini goe i doo lili ga doolohi ai gimaadeu;

koe ne daa gimaadeu ga maakau, koe tee lodo aloha mai donu.

44 Koe gu buibui goe i de hagausinga,

gi dee maua ai amaadeu dalodalo gi tae age gi de goe.

45 Koe ne hai gimaadeu gi bei dagodo mee hakino gee ma gainga

i magavaa o denga huaahenua ange laa.

46 Omaadeu hagadaumee alodahi

gu hai baasi mai gi gimaadeu i alaadeu muna.

47 Gimaadeu gu duasala i de mee hagamaatagu ma denga geelinga kelo,

ma de oohaa ga ngadi dagodo.”

48 Ogu loimada gu ssali bei dagodo o denga vai ssali,

i hiidinga de daia ga maakau o ogu dangada.

49 Ogu loimada e dee noho donu de malingilingi,

gai tee noho donu,

50 ga dae ai gi de galo iho o Tagi Maolunga

i de langi ga gidee.

51 Agu mee e gidee gu hai ma gu daemaha ogu lodo

i hiidinga o denga haahine alodahi i dogu aduhale.

52 E deai donu hiidinga a ogu hagadaumee e doolohi ai au,

bei dagodo o dahi manu lele.

53 Gilaadeu ne tili ange au gi lo te geelonga

ma de hai denga hadu ga maga ai au;

54 denga vai gu haoli dogu biho,

gai au ne hagadaba, “Au ne dai magau donu.”

55 Tagi Maolunga, au ne dalodalo adu gi de goe,

mai i tagelo o de geelonga.

56 Gai koe gu langona dagu dangidangi:

“Koe gi dee bonodia luoo dalinga

i de masavaa oogu e dangidangi ai i de bale!”

57 Koe ne hagabaa mai gi de au

i de masavaa aagu ne hagahi adu ai goe;

koe ne hai mai, “Aude madagu!”

58 Dogu Ia Aamua, koe gu tala dogu heohi,

koe ne hagaola dogu mouli.

59 Tagi Maolunga, koe gu gidee mee dee heohi ne hai mai gi de au,

hagamodu ina ogu muna gi sula danuaa mai ai dogu heohi.

60 Koe gu gidee delaadeu hai ne sui mai ai agu hegau,

ma alaadeu hagatau alodahi e hai baasi mai ai gi de au.

61 Tagi Maolunga, koe gu langona delaadeu hai ne hagadogaa ai au,

ma alaadeu hagatau alodahi e hai mai gi de au.

62 Muna ma maanadu a ogu hagadaumee

e hai baasi mai gi de au i taiao ga boo ai.

63 Galo ange diiloo de masavaa olaadeu e nnoho ai gi lalo ma de tuu gi lunga;

gai gilaadeu e hadu ogu daahili.

64 Tagi Maolunga, suuia ange alaadeu hegau,

gi bei ange alaadeu mee gu hai.

65 Koe gi hagamakaga ina olaadeu lodo,

ma de hagamalaia gilaadeu!

66 Dolohia gilaadeu ga daa gi maakau i doo lili,

gi dee mouli ai gilaadeu i lalo de langi a Tagi Maolunga.