3
De nanu o Job
1 Dua mee laa, gai a Job ne basa ga hagamalaia dono laangi ne haanau ai,*Jer 20.14-18 2 ga hagadaba,
3 “Mee naa teai ai donu sogu laangi ne haanau ai,
ma de boo a dahi ne hagadaba ai, ‘Dahi gauligi daane gu haanau.’
4 De laangi laa gi gohu,
gai de Maadua gi dee saalaa mai i lunga,
gai gi deai se maalama iai.
5 Gai gi iai de goohunga ma de gohu boo dangodango;
de hagausinga gi hanage gi haolia de laangi laa;
gai de gohu o de laangi gi hagamaatagu mmao.
6 De boo laa — gi haolia i de gohu boo dangodango!
Gai gi dee dau madali laangi i de ngadau,
gi dee dau hogi i denga malama.
7 Uaa, haia de boo laa gi se ngadi boo,
gai gi deai se malangilangi iai.
8 De gau hagamalaia gi hagamalaia ina de laangi laa,
go dangada e haia gi hanage de Leviathan.
9 Ono heduu i taiao gi hagagohu;
gai gi deai haigamaiana dana tali gi ao de mee,
gai gi dee gidee de maalama o taiao,
10 go hiidinga tee pono de haitoga o de mommee o denga dama,
gi dee gidee ai e au de hai ngadaa.
11 Gu aha tee magau ai laa donu huu au i de masavaa oogu ne haanau ai,
aabe ne magau i de masavaa oogu ne doo mai ai i de mommee o denga dama?
12 Gu aha tangada gu sigo ai laa au,
gai gu aha gu hanu ai gaanuunu oogu ne unuunu ai?
13 Mee naa iainei gai au gu dagodo ma gu baba;
au gu magau ma gu hagamabu,
14 madali denga hodooligi ma de gau hagasaele o henua i lalo,
ne hagaduulia laa denga mommee gu maoha laa ma gu ngadi daakodo,
15 madali dagi o de henua e hanu laa alaadeu goolo,
ma de hhao olaadeu hale i denga selevaa.
16 Gai gu aha tee danu ai laa donu huu au bei dahi dama ssege,
be se gaagaa tee gidee e ia de maalama?
17 De gau baubau gu dee hai mee gi hai ngadaa i kilaa,
gai gilaadeu e daalea gu hagammabu.
18 De gau i lo te hale pono gu ilaage hogi,
gilaadeu gu dee langona leo o dangada e dagudagu ina ange alaadeu hegau.
19 De gau maolalo ma de gau maolunga i kilaa hogi,
gai tangada hai hegau gu ilaage mai i dono dangada aamua.
20 Gu aha gu gaavange ai de maalama gi gilaadeu e duasala,
gai de mouli gi dangada e daemaha olaadeu lodo?
21 Gilaadeu e llodo mmao i de magau, aagai e dee maua gi dae mai,
gai e kii ange delaadeu ssala de magau
i delaadeu ssala mee hagamogomogo e hagammuni laa;*Rev 9.6
22 gilaadeu e malangilangi ma de llodo danuaa
i de masavaa olaadeu e tuu ange ai gi taanunga.
23 Gu aha gu dugu ai gi mouli tangada e dee gidee dono haiava,
gai de Maadua e buibui gi dee gidee e ia?
24 Au e dee gaimee gai au e manava i lunga;
dogu gonogono e duudagi donu huu bei de vai ssali.
25 Dogu mee e madagu ai laa gu hai mai donu gi de au,
gai dogu mee e manavasaa ai laa gu duu mai donu gi de au.
26 Au e dee maua gi baba aabe gi mabu;
au e dee maua i de hagamabu, aagai e hai ngadaa.”