2 “Noo tangada e tala adu dahi muna gi de goe,

gai koe e dee golomagi naa oo lodo?

Aagai goai ai e maua i de noho ga dee muu?

3 Tilo, gu soa dangada aau ne agoago ange,

gai koe gu bale ange gilaadeu e baageaa.

4 Au muna gu bale ange tangada gu baguu laa,

ma de hagammahi dangada e dee maua i de tuu gi makaga.

5 Aagai iainei koe gu hai ngadaa, gai koe e dee golomagi oo lodo;

go koe gu hai ngadaa, gai koe gu manavasaa.

6 E aha, doo madagu i de Maadua tee hai laa ga dahi au tali,

gai doo heohi e dee hai laa ga dahi au tali hagalodolodo?

7 Noho hagasaelea age: goai tangada dee haisala gu magau laa?

Gai gu dahi laa dangada heohi ne daia ga magau?

8 Au gu gidee bolo gilaadeu e doo ina de baubau,

ma gilaadeu e dooa de hai ngadaa e hagihagi naa hogi ono hua.

9 De Maadua e manava donu huu gai gilaadeu gu maakau,

de madangi o dono lili e daa gilaadeu.

10 De laiono e goo ma de hagangolo,

aagai niho o denga laiono gauligi gu hadihadi.

11 De laiono mmahi e magau naa i teai ana gai,

gai dama a de laiono hahine e mavaevae saele naa.

12 Muna nei ne hagammuni ga tala mai ai gi de au,

gai ne musumusu mai gi dogu dalinga;

13 ne gaamai gi de au i de midi i lo te boo,

i de masavaa o dangada e sseni tao ai,*Job 33.15

14 gai au ne madagu mmao ma de bolebole,

gai ogu ivi alodahi gu bolebole.

15 Dahi hagasaalunga ne humai laa gaogao luoogu mada,

gai ngaangaaulu i dogu angaanga gu teve.

16 De hagasaalunga laa ne duu ga dee ngalue,

aagai au tee madea be se aha deelaa.

Dahi goohunga ne duu i ogu mada i mua,

gai au ne langona dahi leo i de masavaa e malino ai,

17 ‘E maua e dahi dangada gi heohi ange i de Maadua?

E maua e dahi dangada gi gilimalali ange i de ia ne haia ia?

18 Noo de Maadua e dee hagadonu dahi ono dangada hai hegau i de langi,

gai noo ia e hagabaubau ono dangada de langi i olaadeu haisala,

19 gai dee hee maa naa de kii ange dana dee hagadonu dangada ne hai i bela pigi,

go gilaadeu ne daamada mai i gelegele,

gai e hai ngaohie ange de oha gilaadeu i dahi lengisi.

20 Gilaadeu e mouli i taiao gai de ahiahi gu maakau;

e dee angahia donu delaadeu maakau ga hano ai.

21 E aha, daula o olaadeu hale malo tee dada age laa,

gai gilaadeu e dee maakau laa i teai olaadeu heiangi?’