5
1 Hagaagahia, diiloo be e dahi laa dangada e basa adu?
Gai goai naa de ia dabu e balea adu goe?
2 De lili e daa ga magau tangada lodo senga,
gai de magiaa e daa ga magau tangada senga.
3 Au gu gidee bolo tangada lodo senga e hagadagadaga age,
aagai e moolau donu dono duu ange gi de hai ngadaa.
4 Ana dama e dee ola naa donu,
gilaadeu gu hagabaubau ina i de masavaa e hagamodu ai muna,
gai e deai naa donu dangada e hagaola ina gilaadeu.
5 Tangada hiigai e gai ga odi ana huamanu gu hagihagi,
ia e kave hogi denga mee i magavaa o manu daladala,
gai tangada lodo gi mee e hai ga odi dono lava.
6 De hagaduasala e dee hanage i lodo mama,
gai de hai ngadaa e dee hanage i lo te gelegele,
7 aagai tangada e haanau ange gi lodo hai ngadaa,
bei denga galo ahi e lele laa ga hulo gi lunga.
8 Gai noo go au go koe, gai au e dangidangi ange gi de Maadua,
au e tala ange naa gi de ia ogu dagodo.
9 Ia e hai denga mee hagalele mouli e dee maua laa gi tonu ange aagena,
gai taelodo o ana sauaa e dee maua donu i de dau.
10 Ia e hai gi pala iho de langi gi honga de henua,
ma de hagamaluulu de mommee iai helii i vai.
11 Ia e gaavange denga duulanga maolunga gi gilaadeu e lodo maolalo,
gai e hagaaneane naa gilaadeu e hinangalosaa.
12 Ia e hai gi dee ssula hagatau a tangada e heiangi vaivai dagodo,
gi dee maua ai gi ssula alaadeu hegau.
13 Ia e hai naa gi boogia mai gilaadeu i olaadeu heiangi vaivai daakodo,
ma de hai alaadeu hagatau vaivai daakodo gi dee ssula.*1 Co 3.19
14 Gilaadeu e hedae ange naa gi de gohu i de laangi,
gilaadeu e haahaa saele naa i de laangi bei de boo.
15 Aagai ia e hagaola de ia e duasala mai i olaadeu alelo kangi,
ma de hagaola gilaadeu mai i ssauaa o de gau mmahi.
16 Gai de gau hagaau aloha e dahi alaadeu tali,
gai de hagamodu muna dee heohi e pono naa dono ngudu.
17 Tilo, e manuuia tangada a de Maadua e hagaheohi,
deenei ai, aude hagangadi mee ina de haelenga a de Ia Mmahi Mmao laa.*de Ia Mmahi Mmao: de Beebaa Hebrew e hai ange go Shaddai. *Pro 3.11; Heb 12.5-6
18 Ia e hagammae, aagai e ahe ange hogi ga saabini de maanuga;
ia e hagalagohia, aagai e hagaieiangi hogi.*Hos 6.1
19 Ia e hagaola goe mai i de hai ngadaa i e ono hanonga,
gai de hidu hai ngadaa e dee maua naa donu gi baa i de goe.
20 Ia e hagaola naa goe mai i de magau i de masavaa o de onge,
ma mai i de gadilaasa i de masavaa o de hebagi.
21 Koe e buibuia naa i denga muna hagammae,
gai koe e dee madagu donu i de masavaa o de hagaduasala e dae mai ai.
22 Koe e gadagada naa i de masavaa o de hagaduasala ma de onge,
gai e dee madagu i manu alasala o henua i lalo.
23 Gai koe e hai dahi hagatoo donu hagaheloongoi madali hadu o de gelegele,
gai denga manu lodo henua e nnoho paba naa madali goe.
24 Gai koe e donu iho naa bolo doo hale e nnoho paba,
gai koe e hano naa ga tilo au mee, gai e deai donu mee e dee maleva.
25 Koe e iloo naa hogi bolo au dama gu soa,
gai doo hagadiilinga e soa bei denga helii i honga de henua.
26 Koe e magau naa i doo madumadua,
bei denga noodangaa grain e hagabudu laa i de masavaa o de hagihagi.
27 Tilo, gimaadeu gu agoago i de mee nei, gai se muna abodonu.
Gai koe hagalaangona de mee nei mage hai hegau ai.”