2 “Mee naa gi maua i de hagahidi dogu daemaha,

gai dogu duasala alodahi gi hagahidi i honga mee hagahidi!

3 Gai e daemaha ange donu i denga gelegele i gaogao tai,

aanei hiidinga oogu ne basa ai nei bee nei.

4 Denga dao a de Ia Mmahi Mmao laa gu tili ma gu ulu au,

gai au gu unu olaadeu mee hagammau;

mee hagamaatagu a de Maadua gu hagatau e hai baasi mai gi de au.

5 E dangi laa dahi donkey i de masavaa e hanu ai ana helii e gai?

Gai de kaau daane e goo laa i de masavaa e hanu ai ana gai?

6 E maua naa e dangada i de gai hanu gai e dee mami danuaa laa, gai e dee gaavange soolo?

Gai e mami danuaa naa mee tea o de ngago?

7 Au e kino gee donu i de gai mee nei;

gai denga gai bee nei e hai au ma e dai hagalueia.

8 Mee naa gi dugua mai dogu mee e dangidangi ai,

gai de Maadua gi gaamai dagu mee e tali ange ai;

9 mee naa de Maadua gi daia donu au gi magau,

ia gi hagaabo ina dono lima gi daia ai au gi magau.

10 Gai deenei de mee e hagaaneane ina ogu lodo,

ma dogu malangilangi ai, i dogu mmae,

au tigi hagangadi mee muna a de Ia Dabu laa.

11 Aahee maa ogu mahi, gai au ga duudagi ai de tali?

Aahee dagodo o dogu hagaodi, gai au ga golomagi ai ogu lodo?

12 E aha, ogu mahi e bei mahi o de hadu makaga?

E aha, dogu angaanga e hai i bronze?

13 E aha, e hanu ogu mahi e hai ai dahi mee,

gai gu deai donu mee e balea mai au?

14 Tangada e dee abodonu ange gi ono soa gu duasala laa,

gu tili gee de madagu i de Ia Mmahi Mmao laa.

15 Aagai au gu deai sagu tali ange gi ogu daina,

bei denga saalingaa vai e ssali laa i dahi masavaa bodobodo,

ma denga saalingaa vai e hoohonu age laa

16 i de masavaa e ssali ai denga haisi,

aama de hoohonu age i de ssali o denga snow,

17 aagai e dee sali i de masavaa o tau laohie,

gai denga vai e llilo i olaadeu mommee, i de masavaa hagavvela.

18 De hagabuulingaa dangada i honga manu e hulo gee i olaadeu haiava;

gilaadeu e loage gi de vao, gai gilaadeu gu maakau.

19 Manu e hagauda ina dangada mai i Tema e sala vai,

de gau hagao mee mai i Sheba ne tali hagalodolodo.

20 Gilaadeu ne duasala, go hiidinga gilaadeu ne maanadu bolo e dahi alaadeu tali;

gai ga tae huu gilaadeu gi kilaa, gai gu mmae olaadeu lodo.

21 Gai goodou e dee maua hogi i de bale;

goodou gu gidee de mee hagamaatagu gai goodou gu maatagu.

22 E aha, au gu hagadaba laa, ‘Gaamai dahi mee maagu,

hagao ina mai dahi mee maagu i doo lava,

23 hagaola ina mai au i dogu hagadaumee,

gai hagaola ina mai au i ssauaa o tangada alasala’?

24 Agoago ina mai au, gai au ga noho dee muu,

hagaagona mai be dee hee dogu hai tee heohi ai.

25 Denga muna abodonu e kona de hagammae,

aagai ni haigamaiana aha doodou hagasee?

26 E aha, goodou e llodo e hagaheohi mai au,

gai goodou e hagangadi mee tangi a tangada hai ngadaa bei au?

27 Goodou e dada hogi e hilihili ai mee e hai ange gi tama e deai sono damana,

ma de hagadau heloongoi i de hagaoanga o oodou soa.

28 Aagai iainei goodou aude haihaia, kalo mai diiloo ogu dagodo.

E aha, e maua e au i de hadu muna adu gi goodou?

29 Goodou aude maanadu bee naa, gai gi dee hagabaubau ina au;

goodou aahe ange manadua, au se dangada e hai hegau i de muna abodonu.

30 E aha, gu dahi laa muna baubau aagu ne tala i dogu ngudu?

E aha, e dee iloo e au de mee e hidi mai ai de hai ngadaa?