1 E aha, tangada e dee kona laa ana hegau i henua i lalo?

Gai dono mouli e dee bei laa laangi o tangada hai hegau e hagao?

2 Au e bei tangada hai hegau e lodo mmao laa gi dae mai de ahiahi,

aabe go tangada e tali laa de masavaa e kave ai dono hagaoanga,

3 gai e bei ai hogi, malama gu gaamai gi de au e deai haigamaiana,

gai ogu boo e mouli ai e hagataalea.

4 De masavaa oogu e dagodo iho ai e seni, gai au e hagadaba,

‘Go aahee maa oogu e alahage ai?’

De boo e kona donu de daulooloa,

gai au e hulihuli saele ga ao de mee.

5 Dogu angaanga alodahi gu iai ilo ma mangeo,

dogu gili gu maoha gai denga maanuga gu augau ina.

6 Ogu laangi gu moolau ange i de mee siga a tangada langa mee,

gai ga odi nei donu gai e deai sagu tali iai.

7 De Maadua, manadua bolo dogu mouli e bei de madangi o de manava,

au e dee ahe ange naa donu e malangilangi.

8 Koe e gidee au iainei, gai e dee daulooloa naa donu.

Koe e gidee naa au, gai au gu magau.

9 Tangada e magau laa ga danu e dee ahe mai donu,

ia e bei dagodo o de giliiga e ilihia laa ga dee maleva.

10 Ia e dee ahe mai ange naa donu gi dono hale,

gai gu dee gidee ange i dono mommee.

11 Deelaa ai, au e dee hagapuni donu dogu ngudu,

gai au e tala donu agu muna i tee baba ogu lodo,

ma de nanu i hiidinga de daemaha ogu lodo.

12 E aha, go au go tai, aabe go de manu hagamaatagu i lo te moana gelo,

gai koe ga hagaloosi mai ai au?

13 Noo au e hagadaba, ‘Dogu moenga e hagaaneane mai au,

dogu mee dagodo e tuu dogu nanu,’

14 gai koe e hagamadagu donu hogi au i denga midi,

gai e hagamadagu au i denga midi hagaago ange,

15 gai au e hilihili gi guumia dogu ua ma de magau,

e dee go dogu mouli i de angaanga nei.

16 Au e kino i dogu mouli; au e dee mouli ga hano ai.

Aude hakoso ina au; dogu mouli e bei de madangi.

17 Se aha donu tangada, gai koe ga hagamogomogo ai ia,

gai koe ga anga ange ai gi de ia,*Psa 8.4; 144.3

18 gai koe e tilo dagodo o tangada i daiao alodahi,

ma de hagatale ono dagodo i masavaa alodahi?

19 E aha, koe e dee maua naa donu i de galo gee i de au,

aabe go dugu donu huu au i dahi damaa masavaa gai au ga holo ogu saavale?

20 De ia e dagidiiloo ina dangada,

noo au gu haisala, gai au gu bei laa de mee hagadaemaha adu gi de goe?

Gu aha goe gu velo ai au i doo dao?

21 Gu aha gu dee degi mai ai naa goe gi de au, ga tala ogu haisala?

Go hiidinga e dee mmule naa donu, gai au gu magau ga danu,

gai koe gu dee gidee ange au, i dau masavaa e ssala ai au.”