9
Muna a Job ange gi Bildad
1 Gai a Job ga hai ange,
2 “Ni muna abodonu, au e iloo de mee nei se muna abodonu.
Aagai e maua e dahi dangada gi heohi i mada luu mada o de Maadua?*Job 4.17
3 Gai noo dahi e lodo e hagadaumee ange gi de ia,
gai tangada e dee maua i de basa ange gi ana muna
i e dahi hanonga daudahi mai i de mano hanonga.
4 Dono heiangi e gelo, ono mmahi e mmahi mmao;
goai gu maua i de hai baasi ange gi de ia ma gu kii?
5 Ia e hagangaalue denga mounga, gai denga mounga e dee iloo;
ia e hagahuuhuli gilaadeu gi lalo i dono lili.
6 Ia e luuluu henua i lalo ga hagangalue gee i dono duulanga,
ma de hai ono duludulu gi ngalungaalue.
7 Ia e basa ange gi de laa gai gu dee sobo age;
ia e haoli de maalama o denga heduu.
8 Go ia donu huu ne hoolaa ina de langi i lunga,
ma de seesee i honga beau o de moana.
9 Ia ne hai denga hagabuulingaa heduu:
go de Bea ma de Orion, ma de Pleiades,
aama denga aabi i de baasi i ngaage.*Job 38.31; Amos 5.8
10 Ia e hai mee hagalele mouli e dee maua laa gi tonu ange aagena,
ma denga sauaa e dee maua laa i de dau.
11 Tilo, ia e humai laa ogu gaogao, gai au e dee maua gi gidee ia;
ia e hagasoe mai laa ogu gaogao, aagai au tee madea ia.
12 Tilo, noo ia e kave gee, gai goai naa e buibui ina ia?
Goai e maua i de hai ange gi de ia, ‘Ni aha aau e hai naa?’
13 De Maadua e dee daohi donu dono lili;
de hagabuulinga hai hegau o Rahab*Rahab i muna Hebrew go de ingoo o dahi manu hagamaatagu e sisi laa i lodo beebaa madagidagi. e ino i gaogao luoono vae.
14 Dee hee ai dagu hai e hagadaumee ange ai gi de ia,
ma de ssala agu muna e basa ange ai gi de ia?
15 E dee galemu donu au e dee haisala, gai au e dee maua donu i de basa ange gi de ia;
au e dangidangi ange gi dogu Ia Hagamodu Muna gi abodonu mai gi de au.
16 Noo au e hagahi ia, gai ia ga basa mai,
gai au e dee gai naa donu bolo ia e hagallongo agu muna.
17 Ia e hagammae ngau i de madangi mmahi,
ma de hagalagolagohia ngau i teai hiidinga;
18 ia e dee dugu mai au gi ahe ange gi manamanava,
aagai e hai gi kona de duasala ogu lodo.
19 Noo e ssala be goai e mmahi, gai ia e mmahi mmao!
Noo e ssala be goai e heohi, gai goai e maua i de aalu ia?
20 Gai ga heohi naa donu au, gai agu muna e hagahaisala donu au;
gai ga tigi haisala naa donu au, gai agu muna e hagabaubau donu au.
21 Gai ga tigi haisala naa donu au, gai au e dee iloo ogu dagodo,
au e kino i dogu mouli.
22 Gai e bei donu huu, aanei hiidinga aagu e hagadaba ai laa,
‘Ia e daa ga magau tangada tigi haisala aama tangada baubau.’
23 De masavaa o de hai ngadaa e hai ai ga daa hagalele de magau,
gai ia e gadagada i de hai ngadaa o tangada tigi haisala.
24 Henua i lalo gu dugu ange gi de gau baubau,
gai de Maadua e hai gi dee kide de gau hagamodu muna i kilaa.
Noo e dee go ia ne haia mee nei, gai goai ai ne haia mee nei?
25 Ogu laangi e moolau ange de odi i de gemo o tangada e savini;
ogu laangi e moolau gai e deai se malangilangi e gidee ai.
26 Ogu laangi e hulo ga ui bei denga boose papyrus,
gai e bei denga igele e hagatili iho laa ga dango dahi mee.
27 Noo au e hagadaba, ‘Au ga hagangalo dogu nanu,
au e dee lodo baubau gai e malangilangi,’
28 gai au goi manavasaa donu huu i ogu hagaduasala;
au e iloo bolo koe e dee dugu au be se dangada tigi haisala.
29 Au e hagaduasala naa;
gai ni haigamaiana aha dogu hagaduu ngae?
30 Gai ga gaugau naa donu au i hanu snow,
ma de hagagilimalali luoogu lima i hanu lye,
31 gai koe e maga ange au gi lo te geelonga iai bela,
gai ogu malo e kino naa donu hogi i de au.
32 Ia e dee se dangada bei au, gai au ga basa ange ai gi de ia,
aabe gimaau e hagadau gaavange i de hagamodu muna.
33 E deai donu se dangada e hagamodu ina omaau muna,
ma de dugu mai dono lima gi omaau elunga.
34 Ia gi aaua gee dana laagau haele mai i de au,
gi dee madagu ai au i dana mee hagamadagu.
35 Gai au ga basa age gu dee madagu i de ia,
gai au e dee maua donu i de hai de mee nei.