1 Au gu kino donu i dogu mouli,

deenei ai, au e basa i dogu nanu;

au e basa i hiidinga de mmae ogu lodo.

2 Au e hai ange gi de Maadua: Aude hagaduasala ina au,

aagai daalaa mai be se aha aau e hai baasi mai ai naa gi de au.

3 E aha, se mee danuaa dau hai gi duasala au,

ma de hagangadi mee au hegau ne hai,

gai e malangilangi i hagatau a de gau baubau?

4 E hanu oo ganomada bei tangada?

Koe e tilo bei de hai a tangada e tilo ai?

5 E aha, oo laangi e bei laangi o tangada e mouli ai,

gai oo ngadau e sogoisi bei ngadau o tangada e mouli ai,

6 gai koe ga ssala gi gidee ogu baubau,

ma de hai gi iloo e goe ogu haisala?

7 Koe e iloo bolo au tigi ai donu ogu sala,

gai e deai hogi se dangada e hagaola ina mai au i doo sauaa.

8 Luoo lima ne bae ma de hai au.

Gai e aha, koe ga huli mai naa e daa au gi magau?

9 Manadua bolo koe ne hai au i gelegele;

gai koe ga hagaahe ange naa hogi au gi de gelegele?

10 E aha, koe tee llingi au bei denga vai uu,

ma de hai au gi haduhadu bei denga cheese?

11 Koe ne hakahu au i gili ma kano,

ga hagapuni ogu ivi ma ogu uaua.

12 Koe ne gaamai gi de au de mouli ma de abodonu mai gi de au,

gai koe ne tilo danuaa mai dogu hagasaalunga.

13 Aagai koe ne hagammuni de mee nei i oo lodo,

gai au e iloo bolo deenei donu dau hagatau:

14 noo au gu haisala, gai koe e dagitilo au,

koe e dee degi mai donu gi ogu baubau.

15 Noo au gu baubau, gai au gu vakaa!

Gai ga heohi naa donu au, aagai au e dee maua donu i de dangage age dogu biho,

go hiidinga dogu dogaa mmao ma de duasala.

16 Noo au e hagamaolunga, gai koe e dagitilo au bei dagodo o de laiono,

ma de ahe ange ga hai baasi mai ai gi de au i doo sauaa hagalele mouli.

17 Koe e aheahe ange ga hagabaubau au,

ma de hai gi kii ange doo lili i de au;

oo hagabuulinga hebagi e hai baasi mai gi de au bei denga beau lagolago.

18 Gu aha goe gu hai ai gi doo mai au i de mommee o denga dama?

Mee naa au ne magau donu i mua de gidee a dahi au.

19 Mee naa au tee haanau donu,

aabe ne danu donu huu i de masavaa oogu ne doo mai ai i de mommee o denga dama!

20 E aha, e dee gu dai odi nei laangi sogoisi oogu e mouli ai?

Gu lava, aude hakoso ina donu au, gi damaa malangilangi age ai au,

21 i mua dogu hano gi de mommee e dee ai se dangada e ahe mai ai,

ma de henua iai de gohu ma de goohunga gohu,

22 de henua o de gohu boo dangodango,

ma de gohu ma de vinigoso,

gai de maalama i kilaa e bei donu de gohu.”