2 “E maua i tee basa ange gi denga muna lagolago?

E maua i de hagaheohi tangada vava de ngudu?

3 E maua au ngadi muna i de hai gi dee pasa adu dangada gi de goe?

E aha, e dee hagaseegina naa goe i au muna hagadookaa?

4 Koe e hagadaba, ‘Agu agoago e heohi;

au e gilimalali i mada luoo mada o de Maadua.’

5 Mee naa de Maadua gi haangaa dono ngudu

gi basa adu ai gi de goe,

6 ma de hagaago adu gi de goe de heiangi e dee iloo laa,

go hiidinga dono heiangi e lagolago ono manga.

Gai koe gi donu iho: de Maadua gu hagangalo donu hogi hanu oo haisala.

7 E aha, e maua e goe i de ssala gi gidee mee a de Maadua gu hai laa gi dee iloo?

E maua e goe i ssala gi iloo

de bido laa o de Ia Mmahi Mmao laa?

8 Denga mee nei e maolunga ange i de langi — gai ni aha naa aau e maua i de hai?

Gai e kelo ange i de mommee o de gau maakau — gai ni aha naa aau e iloo?

9 Gai olaadeu haidenga e lloa ange i henua i lalo,

gai e llaha ange i tai.

10 Noo ia e humai ga hhao goe gi lo te hale pono,

ma de hai ssiilingaa muna, gai goai naa e maua i de hai baasi ange gi de ia?

11 Ia e madea donu denga ngadi dangada;

gai de masavaa aana e gidee ai de baubau, gai ia e dee anga ange aagena?

12 Aagai tangada senga e dee maua naa donu gi heiangi,

bei dahi donkey lodo henua e dee maua laa i de haanau dahi dangada.

13 Noo koe e hai gi heohi oo lodo,

gai koe haalo ina ange luoo lima gi de ia i talodalo.

14 Noo e hanu oo baubau, gai koe dugu gee mai i oo daha,

gai de gau baubau gi dee nnoho i oo hale.

15 Gai koe gu dee dogaa i de dangage age doo biho i teai oo haisala.

Gai koe e noho baba naa, gu dee madagu.

16 Koe e ngalo naa doo hai ngadaa,

gai koe e manadua naa de mee nei bei denga vai gu gaavee laa i de mee mmilo.

17 Doo mouli e maalama ange i de maalama o de hualaangi,

gai dono gohu e bei naa de maalama o taiao.

18 Koe e baba naa oo lodo, i hiidinga e dahi au tali;

koe e buibuia naa ma de maua i de hagamabu.

19 Koe e dagodo iho naa,

gai e deai donu dangada e hagamadagu ina goe;

gai e soa naa dangada e dangidangi adu i de bale.

20 Aagai de gau baubau e dee gidee de mee heohi;

gai gilaadeu e dee maua gi ola.

Delaadeu tali e bei naa alaadeu manava hagaodi.”