2 “Ni muna abodonu, ni dangada heiangi,

aagai oodou heiangi e lilo naa donu madali goodou!

3 Aagai au e dahi hogi ogu donu bei goodou;

au e dee kii iho donu i goodou.

Gai goai e dee iloo mee nei alodahi?

4 Au gu bei de mee hakadanga i daho ogu soa;

e dee galemu donu au e dalodalo ange gi de Maadua, gai ia ga basa mai gi de au,

dangada e hakadanga i de au,

e dee galemu donu au se daane heohi ma tee haisala.

5 Tangada duadonu e hagangadi mee gilaadeu e dee duadonu,

ma de hagangadi mee tangada gu dai baguu.

6 Hale o de gau gaiaa e nnoho paba,

gai gilaadeu e hagalili ina de Maadua e duadonu —

go gilaadeu e dagidagina olaadeu diinonga i lodo olaadeu lima.

7 Aagai siilia ange gi denga manu dolodolo, gai gilaadeu ga agoago adu goodou,

be siilia ange gi denga manu llele, gai gilaadeu ga tala adu gi goodou.

8 Basa ange gi de gelegele, gai de gelegele ga agoago adu goodou,

aabe gi dugua ange denga mamu o lausedi gi daalaa adu ai gi goodou.

9 Gai e dahi mee daudahi i magavaa o mee nei e dee iloo

bolo go de lima o Tagi Maolunga ne haia de mee nei?

10 Ia e daohi mouli o mee alodahi,

ma manava o dangada alodahi.

11 E aha, talinga e dee hagatale laa denga muna,

bei de hai a de alelo e mami ange ai laa denga gai?

12 De heiangi e gidee i daho de gau madumaatua,

gai de mouli daulooloa e hai ga dahi olaadeu tonu ange.

13 De Maadua e heiangi ma de mmahi;

go ia iai de hagasaele heohi ma de donu ange.

14 Noo ia e oha, gai e deai donu e maua i de hagaahe age;

noo ia e tili ange gi lo te hale pono, gai e deai donu e maua i de hhuge.

15 Noo ia e daohi denga vai, gai mee alodahi gu mmae;

noo ia e hai gi ssali denga vai, gai gu dolona honga de henua.

16 De mmahi ma de heiangi abodonu i ono daha;

niiana tangada gu daahangadia aama gilaadeu e daahanga ina dangada.

17 Ia e kave gee de gau hagasaele, gu deai olaadeu duulanga,

gai e hai de gau hagamodu muna gi bei gilaadeu e llodo ssenga.

18 Ia e aau gee mee noonooa o denga hodooligi,

gai ga noonoa ange malo huna gi gilaadeu.

19 Ia e kave gee de gau haimeedabu gu deai olaadeu duulanga,

ma de hagadee kii denga daane mmahi.

20 Ia e hai gi dee mmuu gilaadeu a dangada e hagadonu,

gai e hai gi deai se heiangi o denga daane madumaatua.

21 Ia e hai gi hagangadi mee ina dagi o de henua,

ma de aau gee goloa hebagi o denga daane mmahi.

22 Ia e hai gi gidee mee e llilo i lo te gohu,

gai e hagamaalama de mommee gohu boo dangodango.

23 Ia e hai denga huaahenua gi maolunga, aama de oha hogi ga maoha;

ia e hai ga nnui denga huaahenua, ma de hai gilaadeu gi mavaevae saele.

24 Ia e hai dagi o henua i lalo gi dee tonu ange;

ma de hai gilaadeu gi silivaahea saele i de mommee e deai mee iai.

25 Gilaadeu e haahaa saele i lo te gohu e deai se maalama iai,

ma de hai gilaadeu gi ssee saele bei dagodo o tangada gu unu mee vii.