1 Tilo, au gu gidee mee nei alodahi,

gai gu langona ma gu donu ange aagena.

2 Oodou mee e iloo, gai au e iloo hogi;

au e dee maolalo ange i goodou.

3 Aagai au e lodo e tala ange agu muna gi de Ia Mmahi Mmao laa,

ma de hagadaumee ange gi de Maadua.

4 Aagai goodou e haoli goodou i oodou muna hhadu;

goodou alodahi ni dangada hai magi dee haigamaiana!

5 Mee naa goodou gi nnoho donu gi dee mmuu,

e hagaago mai ai doodou heiangi!

6 Goodou nnoho hagalaangona agu muna e hagadaumee adu ai;

gai hagalaangona dagu dangidangi.

7 E maua e goodou i de pasa baubau i de ingoo o de Maadua?

E maua e goodou i de pasa hadu muna i dono ingoo?

8 Goodou e maua i de hai hegau i de hilihili dangada ange gi de ia?

Goodou e maua i de tala hagaheohi dagodo o de Maadua?

9 E aha, e danuaa adu naa gi goodou noo ia e tilo oodou dagodo?

E maua naa e goodou i de daahanga de Maadua, bei doodou daahanga dangada?

10 Ia e hagasee naa donu goodou,

noo goodou e hagammuni doodou hilihili dangada.

11 Dono mahamaha e dee hai naa ga maatagu goodou?

Dono hagamadagu e dee hano iho naa gi oodou elunga?

12 Oodou muna hagasengasenga e bei lehu;

gai oodou muna e hagaheohi ai goodou, e bei bela pigi.

13 Goodou nnoho mage dee mmuu, gai au ga tala agu muna;

gai gi haia mai be se aha e hai mai gi de au.

14 Gu aha au gu hagahai ngadaa ai nei donu huu au,

ma de hai gi hagamanavasaa mai gi dogu mouli?

15 Gai ga daia naa donu e ia ga magau au, gai au e dahi donu agu tali ange gi de ia;

gai au e tala ange donu dogu donu gi de ia.

16 Kana adu de mee nei e hagaola naa au,

go hiidinga tangada baubau e dee maua donu i de humai gi mada luoono mada!

17 Goodou kana ange hagalaangona agu muna,

gai haia gi langona danuaa e goodou agu muna.

18 Tilo, au gu hagadabena e tala dogu donu,

au e iloo bolo e gide mai naa bolo go au e heohi.

19 Goai e maua i de hai baasi mai gi de au?

Gai noo au e hagapuni dogu ngudu, gai au e magau donu.

20 De Maadua, gaamai gi de au luu mee e lua nei,

gai au e dee mmuni naa donu i de goe:

21 aaua gee doo lima e hagaduasala ai nei au,

gai aude haia gi madagu au i de goe.

22 Gai hagahia mai au gai au ga basa adu,

aabe go au e basa adu, gai koe ga basa mai.

23 Dee hee maa de lagolago ogu baubau ma ogu haisala?

Hagaagona mai ogu baubau ma ogu haisala.

24 Gu aha gu hagammuni ai naa luoo mada

ma de dau au gi se hagadaumee niiou?

25 E aha, koe ga hagamadagu naa au bei de lau manu e ilihia laa i de madangi?

Koe e doolohi naa gili grain mmasa?

26 Koe e daohi denga mee hai ngadaa e hai baasi mai ai gi de au,

ma de dau mai ogu haisala i de masavaa oogu e gauligi ai.

27 Koe gu nnoa ange luoogu vae gi denga laagau hagamakaga;

koe e dagitilo mommee alodahi oogu e hano aagena,

ma de dagitilo duulanga o ogu dabuvae.*Job 33.11

28 Gai tangada e bobo bei dagodo o dahi mee bobo,

gai e bei de malo gu gaina laa i denga goa.