1 Tangada e haanau laa i daho de hine

e sogoisi ono laangi e mouli ai, gai e honu i de hai ngadaa.

2 Ia e hanage bei de huaala, gai e moolau donu hogi de mmae;

ia e bei de goohunga e lilo laa, e dee maua donu gi daulooloa.

3 Koe e maua i de haina dahi dangada bee nei?

Koe e maua i de gaamai ia e hagamodu ono muna?

4 Goai e maua i de hai de mee gilimalali i de mee e dee gilimalali?

E deai donu se dangada e maua!

5 Koe gu hagamodu laangi o tangada e mouli ai,

ma taelodo o ono malama;

gai koe gu hagailonga de hagaodi o dono mouli,

gai ia e dee maua donu i de hano gi ui ai.

6 Galo gee i de ia ma de dugu donu huu ia,

ga dae ai gi de odi ange ono laangi, bei tangada hai hegau e hagao.

7 De manu somo e dahi ana tali;

noo gu sele iho, gai e ahe ange naa ga somo age,

gai ono ulu e aahe ange naa ga matili age.

8 Gai ga madumaatua naa donu ono aga i lo te gelegele,

gai dono dahido gu magau i lo te gelegele,

9 aagai de mama o denga vai e hai naa ga ahe age,

gai ono uli e matili age naa bei dahi manu somo.

10 Aagai tangada e magau ga danu;

ia e hai naa ana manava hagaodi, gai go hee oona iai?

11 De masavaa e deai ai vai i lo te vai,

gai ssaalingaa vai gu mmasa bagubagu ma teai vai ia,

12 e bei ai hogi, tangada e magau naa gai e dee hidi age donu;

ga dae ai gi teai se langi, gai dangada e dee hiihidi age naa donu,

aabe e aalahage i de sseni.

13 Mee naa koe e hagammuni au i de mommee o de gau maakau,

haolia mai au ga dae ai gi de sili doo lili.

Mee naa koe e hagailonga dahi masavaa aau e ahe ange ai e maanadu mai au!

14 Noo tangada e magau, gai e maua naa gi mouli age ange?

Laangi alodahi oogu e hagadalea, gai au e tali

ga dae ai dogu masavaa e ilaage mai ai i de magau.

15 Koe gi hagahia mai au, gai au ga basa adu gi de goe;

koe e lodo mmao i tangada aau ne hai i luoo lima.

16 Koe e dagitilo ogu mommee e hano aagena,

aagai koe e dee daumada ogu haisala.

17 Ogu haisala e hhao naa gi lo te beagi ga hagamakaga,

gai koe e haoli ogu baubau.

18 Aagai e bei de mounga e malili iho laa ma de maoha,

ma de hadu e ngalue gee laa i dono duulanga;

19 e bei denga vai e hagamalali denga hadu,

gai de mee mmilo e dada de gelegele ga kave gee,

gai e bei ai hogi, koe e oha de tali hagalodolodo a tangada.

20 Koe e hagadee kii ia ga hano ai, gai ia gu lilo;

koe e hai gi dagodo gee luoono mada, ga hai ia gi hano.

21 Noo ana dama e hagadubulia, gai ia e dee iloo;

noo gilaadeu e hagamaolalo ina, gai ia e dee gidee hogi.

22 Gai ia e langona iho donu huu dono mmae,

ma de daemaha donu huu i ono hiidinga.”