2 “E aha, e maua e dahi dangada heiangi i de basa ange i hanu ngadi muna,

aabe go de ngadi basa bei dagodo o de madangi hagavvela mai i dua?

3 E aha, ia e hagadaumee mai naa i hanu ngadi muna,

ma muna e deai olaadeu haigamaiana?

4 Aagai koe e hai gi deai se madagu i de Maadua,

ma de hai gi dee dalodalo ange gi de ia.

5 Au muna e tala baubau e hagaago mai oo baubau;

gai koe e ago ange i muna a tangada vaivai dagodo.

6 Au muna e hagabaubau donu huu goe, e dee go agu muna;

doo ngudu e hai baasi adu donu gi de goe.

7 E aha, go koe tangada ne haanau i taamada?

Gai go koe ne haanau i mua o denga mounga?

8 Koe e hagallongo naa hagasaele a de Maadua?

Gai go koe donu huu e dahi oo heiangi?

9 E hanu laa mee go koe donu huu e iloo, gai gimaadeu e dee iloo?

Gai ni aha oou gu donu ange aagena, gai gimaadeu e deai?

10 De gau sinasinaa ma de madumaatua e buni mai gi gimaadeu,

aama denga daane e maatua ange i doo damana.

11 E aha, de hagaaneane a de Maadua e dee dohu i oo daha,

aama muna maamaane e pasa adu ai gi de goe?

12 Gu aha gu dugu ange ai naa goe oo lodo gi dagina goe?

Gai gu aha gu hagaago mai ai naa doo lili i luoo mada,

13 ma de hagaago ange doo lili gi de Maadua,

gai koe ga tala ai au muna naa?

14 Se aha tangada, gai ia ga maua ai gi gilimalali?

Se aha tangada e haanau laa i daho de hine, gai ia ga maua ai gi heohi?*Job 25.4-6

15 Tilo, de Maadua e dee hagadonu ono dangada de langi dabu,

gai de langi e dee gilimalali i mada luoono mada;

16 gai tangada hakino gee ma de haisala e kii mai ange donu,

ia se dangada e unumia tee heohi bei denga vai!

17 Noho mai hagalaangona, gai au ga hagadonu adu gi de goe;

ma de tala adu agu mee gu gidee,

18 mee a denga daane heiangi gu tala,

e dee hagammuni mee alaadeu ne ago mai i daho olaadeu damana,

19 go gilaadeu ne gaavange aagena de henua

i de masavaa e deai ai dangada henua gee i olaadeu magavaa.

20 Taulooloa de mouli o tangada baubau, gai ia e duasala ma de mmae,

gai ngadau o de vaivai haia e doange gi de ia.

21 Ia e langona longo o mee hagamaatagu,

gai de masavaa oona e noho baba ai,

gai de gau daa dangada gu tae mai ga hebagi ange gi de ia.

22 Ia e deai naa sana tali bolo ia e ola mai i de gohu,

ia gu hagailonga e daa i de gadilaasa.

23 Ia e silivaahea saele, gai ni gai nii denga manu llele;

ia e donu iho bolo de laangi o de gohu gu dae mai donu.

24 De hai ngadaa ma de hagamanavasaa e hagamadagu ia,

ma de hagadee kii ia, bei dagodo o de hodooligi gu baba ange laa e hebagi,

25 go hiidinga ia e tugi ange dono lima gi de Maadua,

ma de hagamaolunga i de Ia Mmahi Mmao laa.

26 Ia e savini e hebagi ange gi de ia,

ma dahi mee hungihungi laumalie.

27 Luoono galaahuu e pungu i dono bedi,

gai dono daogubu e pugu mai.

28 Gai ia e noho i denga aduhale maoha ma gu ngadi daakodo,

ma lodo hale e deai dangada e nnoho ai,

gai gu dai maoha bei dagodo o denga gaainga.

29 Gai dono lava e lilo naa donu,

gai ono goloa lagolago e dee maua donu gi daulooloa,

gai ono goloa e dee dohu ai honga de henua.

30 Ia e dee maua naa donu gi ola mai i de gohu,

de ahi e dudu naa ia bei denga laa o de manu somo,

gai de Maadua e manava naa donu huu gai ia gu lilo.

31 Gai ia gi dee hagasengalia donu huu ia,

i dana tali hagalodolodo ange gi mee e deai olaadeu haigamaiana,

go hiidinga e deai naa donu mee e maua mai ai.

32 I mua dono masavaa, gai ia e kave naa dono hagaoanga alodahi,

gai ono laa e dee lau kohu naa donu.

33 Ia e bei naa de grapevine e luuluu laa ono hua mmodo gi malili,

ma de olive e malili laa ono huaala.

34 Go hiidinga de hagabuulinga o de gau baubau e deai naa donu alaadeu dama,

gai de ahi e dudu naa hale o dangada e llodo i denga ngadi gaavange hagasenga.

35 Gilaadeu e hai tama i hai ngadaa gai ne haanau de baubau,

gai olaadeu lodo e maanadu de daahanga dangada.”