2 “Au gu langona mee lagolago bee nei i mua;

goodou alodahi e dee iloo donu de hagaaneane dahi!

3 Tigi lava naa donu oodou ngadi muna e tala?

Se aha ne haia goodou ga pasa mai bee naa?

4 Au e maua hogi i de basa bei goodou,

noo goodou e bei ogu dagodo;

gai au e maua hogi i de basa ga hai baasi adu gi goodou,

ma de geugeu adu dogu biho gi goodou.

5 Au e maua i de hagammahi adu oodou lodo i agu muna,

gai au e hagamaamaane naa oodou lodo i agu muna.

6 Aagai noo au e tala agu muna, gai au goi mmae donu huu;

gai noo au e dee basa, gai dogu mmae e dee maua gi ui.

7 Ni muna abodonu, de Maadua, koe gu hai gi deai ogu mahi;

koe gu hai gi deai ogu soa.

8 Koe gu hai au gi ni gili donu huu, e hai baasi mai ai gi de au;

taadaanga sala o dogu angaanga gu hai baasi mai donu gi de au,

gai gu tala hagabaubau ogu dagodo.

9 Ia gu oha dogu angaanga i dono lili;

ia e kadi mai ono niho gi de au,

dogu hagadaumee e haaina donu huu au.

10 Dangada e haaina ma de kada i de au,

gilaadeu e hagaili dogu galaahuu ma de doo mee i de au,

gilaadeu gu hagabuni e hai baasi mai ai gi de au.

11 De Maadua gu dugu ange au gi de gau baubau,

ma de tili ange au gi ssauaa o de gau baubau.

12 Au nogo noho baba i mua, aagai ia ga oha dogu angaanga;

ia ne kumi dogu ua ga luuluu au gu too dagidahi.

Ia ne hai au go dana mee e tili gi ulu;

13 ono dangada dili mee hholu gu duuli au.

Ia gu velo au, gai tee hagaola donu au,

gai ogu dae gu maalingi gi honga de gelegele.

14 Ia ne hagalagolagohia ngau i hanonga lagolago,

ma de hebagi mai gi de au bei dagodo o dahi daane hebagi dau.

15 Au gu dui malo daladala e haoli ai dogu angaanga,

au gu danu dogu hanga i lo te gelegele.

16 Luoogu mada gu mmea i dogu dangi,

gai luoogu hiihii mada gu hhua ma de uli;

17 gai au tigi vaivai hai donu dangada,

gai agu dalodalo e gilimalali.

18 De gelegele, aude hagamuunia ogu dodo,

gai gi deai donu se haganoho de dangi.

19 Iainei donu gai de ia e daalaa hagadonu ogu dagodo i de langi;

gai de ia e balea mai au e noho i de mommee maolunga.*Job 19.25

20 Ogu soa e doo mee i de au,

aagai au e dangi ange gi de Maadua.

21 Mee naa gi dahi dangada e hagadaumee ange gi de Maadua

bei de hai a tangada e dangidangi i hiidinga o tangada e baa ange gi de ia.

22 Gai e dee lagolago ange naa donu ngadau,

gai au gu hano i haiava oogu e dee ahe mai ai.