1 Gu kona mmao de daemaha ogu lodo,

gu odi ogu laangi e mouli ai,

gai dogu daanunga gu tali donu huu au.

2 Ni muna abodonu, de gau doo mee gu madali au;

gai au gu gidee delaadeu hai e hagammae manava ai au.

3 Aude haihaia, haia go koe e hagadonu ai ogu dagodo.

Gai goai ange e haia dahi mee e hagadonu ai ogu dagodo?

4 Koe gu hai gi dee tonu ange gilaadeu,

deenei ai, koe gi dee dugu ange gilaadeu gi kii.

5 Tangada e hagabaubau ina ono soa gi maua ai e ia dahi hagaoanga,

e hai naa ga dee gidee e ana dama de mee heohi.

6 De Maadua gu hai au gi se mee e hakadanga ai dangada,

gai dangada e savasavale mai gi luoogu mada.

7 Luoogu mada gu dee gidee i ogu loimada,

gai dogu angaanga alodahi gu kivi bei dahi goohunga.

8 Dangada e hai hegau i de heohi gu llele mouli,

gai tangada e dee haisala gu hai baasi ange gi tangada e dee hagadonu de Maadua.

9 Gai tangada heohi e daudali naa i de mee heohi,

gai tangada gilimalali e hagadaga ange naa de mmahi.

10 Aagai goodou alodahi, aahe mai ange, hagataalea ange!

Au e dee gidee dahi dangada heiangi i oodou magavaa.

11 Gu odi donu ogu laangi e mouli ai, gu maoha agu hagatau,

gai gu maoha hogi ogu mee e lodo ai.

12 Gilaadeu gu hai de boo go de laangi;

gilaadeu e hagataba i lo te gohu, ‘De maalama gu baa mai donu.’

13 Noo dogu mommee noho go de mommee o de gau maakau,

gai noo au e hhola ogu moenga i de mommee gohu,

14 noo au e hai ange gi taanunga, ‘Go koe dogu damana,’

gai e hai ange gi de ilo, ‘Go koe dogu dinana ma dogu daina hahine,’ —

15 gai go hee e dahi ai agu tali?

Gai goai e gidee bolo e dahi agu tali?

16 E aha, dagu tali e hano iho naa gi de mommee o de gau maakau?

E aha, gimaau ngaadahi e loiho naa gi lo te gelegele?”