2 “Dee hee maa taulooloa de tala oodou muna?

Hagasaelea gi danuaa, gai gidaadeu ga maua i de pasa.

3 Gu aha goe gu hai ai nei gimaadeu

gi bei dagodo o manu haangai,

ma de maanadu bolo gimaadeu e deai amaadeu mee e iloo?

4 Koe e hagammae donu huu goe i doo lili;

e aha, e maua naa i de tili gee henua i lalo i oo hiidinga,

aabe go de aau gee denga hadu i olaadeu duulanga?

5 De laama a tangada baubau gu diinei,

gai de ula o dana ahi e made naa.*Job 21.17

6 De maalama i dono hale malo e gohu naa,

gai de laama i ono elunga e diinei naa ga made.

7 Ono mahi e lagalaga ai luoono vae gu tuu mai,

gai ana hagatau e hai ia ga baguu.

8 Gai luoono vae gu hai ia ma gu doo ange gi lo te galauna,

gai ia ne hano ga lave i ono lodo.

9 Luoono vae gu noodia i ssele,

gai gu lave ma gu makaga i kilaa.

10 Dahi sele gu hagammuni i honga de gelegele e dada ai ia;

dahi sele gu dagodo i honga dono haiava.

11 Denga mee hagamaatagu i luoono baasi gu hagamadagu ia,

ma de doolohi saele ia.

12 Gu deai ono mahi i dono saalohia,

gai de hai ngadaa gu baba ange e hai gi baguu ai.

13 De magi gu hai ma e masolesole dono gili,

gai de magau gu dai holo naa donu ono aalanga.

14 Ia gu gaavee gee i de hale oona e noho baba ai,

gai gu dada e kave gi de hodooligi o mee hagamaatagu.

15 Dono hale gu daakodo ai mee e dee niiana;

gai denga maga ahi gu doha saele i dono mommee noho.

16 Ia gu bei de manu somo gu maakau laa ono aga,

gai ono laa gu mmae.

17 Gu deai sono hagamaanadu i henua i lalo,

gai dono ingoo gu lilo i honga de henua.

18 Ia gu alualu ina gi hano gee mai i de maalama gi hano gi lo te gohu,

gai gu hai gi dee noho i henua i lalo.

19 Ia gu deai donu ono hagadiilinga be se aamuli i magavaa o ono dangada,

gai gu deai hogi dangada e mouli i dono mommee nogo noho ai.

20 Dangada i baasi i dai gu llele mouli i ono dagodo;

gai dangada i de baasi i dua gu maatagu mmao.

21 Ni muna abodonu, aanei dagodo o de mommee o tangada baubau;

aanei dagodo o de mommee o tangada e dee iloo e ia de Maadua.”