2 “Dee hee maa taulooloa doodou hagammae au,

ma doodou hagadaemaha ogu lodo i oodou muna?

3 Gu madaangahulu odi huu hanonga oodou ne hagadogaa ai au,

gai goodou tee dookaa donu i de vaivai hai au.

4 Gai noo ni muna abodonu au gu haisala,

gai e dau mai donu huu gi de au.

5 Noo goodou e hagataba bolo goodou e kii ange i de au,

ma de hagataba bolo dogu hai ngadaa ne hidi mai i ogu haisala,

6 gai goodou gi iloo bolo de Maadua tee heohi ana mee ne hai mai gi de au,

i dana buulou au i dana gatae.

7 Tilo, au e dangi ma e hagadaba, ‘Au gu vaivai haia,’

gai e deai donu dangada e pasa mai.

Au e dangidangi i de bale,

aagai e deai donu se hagamodu heohi.

8 De Maadua gu buibui dogu haiava,

gi dee maua ai e au i de hano gi ui;

ia gu haoli ogu haiava alodahi i de gohu.

9 Ia gu kave gee dogu hagadubu,

gai gu aau gee de hau i ulu dogu biho.

10 Ia gu oha au ma agu mee alodahi,

gai ia gu kave gee dagu tali hagalodolodo

bei dagodo o de manu somo gu unusi age laa.

11 Ia gu kona mmao de lili i de au,

gai gu dau au gi se hagadaumee niiona.

12 Ono daane hebagi gu hagabuni ma gu loomai ai;

gilaadeu gu hagaduu age dahi mee oha e hai baasi mai ai gi de au,

ma de duuli luu baasi o dogu hale malo.

13 Ia gu hai ogu daina ma gu hulo gee mai i de au;

gai ogu soa gu hai au be se dangada henua gee.

14 Ogu dangada donu gu hulo gee;

gai ogu soa gu ngalo hogi au.

15 De gau henua gee i dogu hale,

ma ogu haahine hai hegau gu hai au be se dangada gee;

au gu bei dagodo o dahi dangada henua gee i olaadeu daha.

16 Au ne hagahi dogu dangada hai hegau, aagai ia e dee basa mai,

gai au ne dangidangi ange donu gi de ia.

17 Dogu bodu e kino i de hagadungu ogu haha,

gai ogu daina donu e hakino gee i ogu dagodo.

18 Denga gauligi vaaligiligi e hagangadi mee au;

gilaadeu e kada i de au i de masavaa oogu e duu age ai.

19 Ogu soa alodahi gu kino i de au,

gai dangada oogu e aloha ai gu hai baasi mai gi de au.

20 Au gu ni gili donu huu ma ivi,

au gu bei tangada e hagasee laa donu huu ma de ola.

21 Ogu soa, aaloha mai gi de au, aaloha mai gi de au,

go hiidinga de Maadua gu hagaili au.

22 Gu aha goodou gu doolohi ai naa ngau bei mee a Maadua e hai?

Gai tigi lava naa donu oodou mee e hai mai gi de au?

23 Mee naa gi daohia agu muna e tala,

gai gi siia agu muna i lo te beebaa mulo,

24 i dahi goloa iron aabe se goloa lead,

ga maaga ange ai gi honga dahi hadu gi daakodo ai ga hano ai!

25 Aagai au e iloo bolo dogu Ia Hagaola e mouli,

gai muli mai naa huu gai ia e duu i honga henua i lalo.

26 Gai ga maoha naa donu dogu gili,

aagai dogu angaanga e gidee naa de Maadua.

27 Au e gidee naa donu ia i luoogu mada,

go luoogu mada donu, e dee go dahi dangada gee.

Ogu lodo gu dee baba mmao!

28 Noo goodou e hagataba, ‘Dee hee taadeu hai e hagammae ai ia,

gai de mee nei go ia donu ne hidi ai,’

29 goodou haia gi maatagu goodou i de gadilaasa,

go hiidinga de hagaduasala e humai naa i de gadilaasa,

gi iloo ai e goodou bolo e dahi donu hagamodu muna.”