2 “Au e basa adu i hiidinga au gu dee baba ogu lodo.

3 Au gu langona dahi muna hagaheohi hagadookaa,

gai au e basa adu i de hagasaalunga o de donu ange.

4 Koe gu iloo donu mee nei madagidagi,

ma mai i taamada de nnoho o tangada i henua i lalo,

5 gai de kii o tangada baubau e dee daulooloa donu,

gai delaadeu malangilangi se masavaa bodobodo donu huu.

6 Gai ga looloa naa donu ia ga dae age gi de langi,

gai dono biho gu baa i denga giliiga,

7 gai ia e magau naa donu ga hano ai, bei ono duudae;

dangada ne gidee laa ia e ssili ange naa, ‘I hee ia?’

8 Ia e bei naa dagodo o de midi e ngalo laa, gai gu dee gidee ange,

gai gu lilo bei de midi i de boo.

9 Tangada gu gidee laa ia e dee gidee ange naa donu ia,

gai dono mommee nogo noho ai e dee gidee ange naa donu ia.

10 Ana dama e sui ange naa mee a de gau hagaau aloha;

ia e hagaahe ange naa ono goloa lagolago.

11 Ono mmahi i dono masavaa e dama daane ai,

e danu naa madali ia i lo te gelegele.

12 Gai ga maimai naa donu de baubau i lo tono ngudu,

gai ia e hagammuni i lalo dono alelo,

13 gai ga dee lodo naa donu ia de luei mai,

gai e dugu i lo tono ngudu,

14 aagai ana gai e hulo naa ga mmala i lo tono dinae,

gai e mmala naa bei mee hagammau o denga labodo i ono lodo.

15 Ia e luei mai naa de lava aana gu holo laa;

gai de Maadua e hai naa ia gi hagalueia mai mee laa.

16 Ia e mmidi naa mee hagammau o denga labodo;

niho o de labodo hagammau e daa naa ia ga magau.

17 Ia e dee gidee naa denga saalingaa vai,

ma denga vai e ssali mai ai laa hooni ma vai uu haduhadu.

18 Ia e hagaahe ange naa ana mee ne hai hegau ange laa aagena, gai tigi gai,

gai e dee hagadanuaa naa donu ana mee e mau i de hagao mee.

19 Go hiidinga ia ne vaivai hai ma de tili de gau hagaau aloha;

ia ne hai gi de mahi denga hale aana tee hagaduu.

20 Ni muna abodonu, ia e dee maua naa donu gi duadonu,

ia e dee maua naa donu i de hagaola ia i ono goloa.

21 Gu deai donu mee e doe i dua dono gaimee,

gai dono lava e dee maua donu gi daulooloa.

22 Gai lo te masavaa donu oona e lagolago ai ana mee, gai ia e hai ngadaa naa;

tuasala laumalie e dae mai naa gi de ia.

23 De masavaa oona ne bosu ai,

gai de Maadua e hagaduasala naa ia i dono lili

ma de hai gi hano iho gi ono elunga.

24 Gai ga ola mai naa donu ia i de goloa hebagi e hai i iron,

gai dahi dao bronze e velo naa ia.

25 Tao laa e velo naa ia ga sao i tua,

gai dono mada malamalama e sula mai naa lo tono angaanga,

gai ia e kona naa dono madagu.

26 De gohu boo dangodango gu hagababa ange gi de ia;

de ahi e dee ili laa e dudu naa ia,

gai mee e doe i dono hale malo e odi naa i de dudu.

27 De langi e hagaago mai naa ono baubau,

gai henua i lalo e hai baasi ange naa gi de ia.

28 Gai goloa i dono hale e gaavee gee naa

i de laangi o de lili o de Maadua.

29 Aanei tuuhanga a de Maadua e gaavange gi tangada baubau,

go de boolonga gu hagamodu ange gi de ia i daho Maadua.”