2 “Noho mai hagalaangona agu muna,

deenei doodou hai e hagaaneane ai ogu lodo.

3 Golomagi ina oodou lodo gai au ga tala agu muna,

gai ga lava naa agu muna, gai goodou ga kada ai i de au.

4 E aha, au e nanu nei i tangada?

Gai gu aha au gu dee golomagi ai ogu lodo?

5 Goodou kalo mai diiloo ogu dagodo ma de llele oodou mouli,

gai bonodia oodou ngudu i oodou lima.

6 De masavaa aagu e maanadu ai de mee nei, gai au gu madagu;

dogu angaanga gu bolebole.

7 Gu aha de gau baubau goi mouli ai laa huu,

gai gilaadeu e hulo ga madumaatua ma de hagadaga ange de mmahi?

8 Gilaadeu e mouli ga gidee alaadeu dama gu duadonu,

ma de gidee de maatua age olaadeu hagadiilinga.

9 Gilaadeu e nnoho paba i olaadeu hale e dee maatagu,

gai de laagau haele a Maadua e dee hagaduasala gilaadeu.

10 Alaadeu kaau e dee tuu donu de hagadili;

alaadeu kaau e haanau alaadeu dama, gai e dee ssege donu.

11 Gilaadeu e hai alaadeu dama gi ssao gi hulo bei dahi hagabuulingaa ssiibi;

alaadeu dama e aanu naa.

12 Gilaadeu e daahili ma de hagadangidangi i tambourine ma de harp,

ma de malangilangi i de ili denga flute.

13 Gilaadeu e duadonu i taulooloa olaadeu mouli,

gai e nnoho paba i de masavaa olaadeu e hulo ai

gi de mommee o de gau maakau.

14 Gai gilaadeu e hai ange gi de Maadua, ‘Aude hakoso ina gimaadeu!

Gimaadeu e dee llodo gi iloo e gimaadeu au hagatau.

15 Goai donu go de Ia Mmahi Mmao laa, e daumaha ange ai gimaadeu gi de ia?

Gai ni aha naa donu amaadeu e maua i demaadeu dalodalo ange gi de ia?’

16 Aagai e dee go olaadeu mahi ne haia ga ni dangada lava gilaadeu,

gai au e dee daudali i hagasaele a de gau baubau.

17 Dee hee maa tee modu de maamade laama a de gau baubau?

Gai e hia maa hanonga e duu ange ai de hai ngadaa gi gilaadeu,

ma de duha ange a de Maadua de hai ngadaa gi gilaadeu i dono lili?

18 Gai gu hia maa hanonga olaadeu ne bei ai dagodo

o denga lau manu mmasa i ma te madangi,

ma gili o denga grain e ilihia saele laa i de madangi?

19 ⌊Koe gu hagadaba,⌋ ‘De Maadua gu dugu ange olaadeu haisala gi alaadeu dama.’

Ia gi hagao ina ange ia, gi iloo ai e ia.

20 Ia gi gidee dono hagaduasala;

gai ia gi mamia ange de bole o de Ia Mmahi Mmao laa.

21 Gai dee hee naa dana hai e tilo ange ai de huaabodu aana e doe laa,

i de masavaa e hagaodi ai dono mouli?

22 E aha, e maua e dahi i de agoago ange de iloo mee gi de Maadua,

gai go ia e hagamodu ina muna de gau maolunga?

23 Dahi dangada e magau gai e mmahi,

gai e duadonu ma de noho baba;

24 dono angaanga e mmahi,

gai mee i lodo ono ivi e dee mmasa gee.

25 Dahi dangada ange e duasala ono lodo i dono masavaa e magau ai;

ia tee mami ange hanu mee danuaa.

26 Gai luu dangada nei ngaadahi ne danu i lo te gelegele,

denga ilo e tolo i olaau angaanga ngaadahi.

27 Tilo, au e donu ange gi maanadu i oodou lodo,

ma oodou hagasaele e hagabaubau ai au.

28 Goodou e hagadaba, ‘I hee iai de hale o taane aamua laa?

Gai i hee iai de hale malo o tangada baubau nogo noho ai laa?’

29 E aha, goodou tigi ssili naa donu i daho olaadeu e hagadaga saele?

Goodou e dee kana ange naa donu e hagallongo alaadeu daalanga —

30 bolo tangada baubau e ola i de laangi o de hai ngadaa,

gai ia ne ola i de laangi o de bole?

31 Goai e maua i de hagasee tangada baubau?

Goai e suuia ange ana hegau baubau e hai?

32 De masavaa oona e kave ai ga danu,

gai dono daanunga e hagaloosi ange.

33 Gelegele i lo te geelonga e danuaa ange gi de ia;

dangada alodahi e daudali ange i ono dua,

gai e soa gu hulo i ono mada i mua.

34 E maua naa donu e goodou i de hagaaneane ogu lodo i oodou ngadi muna?

Oodou muna alodahi e deai donu se muna abodonu iai.”