2 “E aha, e hanu haigamaiana o tangada ange gi de Maadua?

Gai e hanu haigamaiana o tangada iloo mee ange gi de ia?*Job 35.6-8

3 Gai de Ia Mmahi Mmao laa e malangilangi naa noo koe e heohi?

Gai ni aha naa aana e mau noo koe e dee haisala?

4 E aha, ia e hagasee laa goe i hiidinga koe e madagu i de ia,

ma de gaavange goe e hagamodu oo muna?

5 E dee go hiidinga de lagolago mmao oo baubau?

Gai koe gu deai donu se odi oo haisala?

6 Koe ne hai gi de mahi oo daina gi hagaahe adu au mee i teai hiidinga;

koe ne kave olaadeu malo ga hai gilaadeu gi gilisau.

7 Koe tee gaavange vai gi gilaadeu e hieunu,

gai koe tee haangai gilaadeu e hiikai.

8 Tangada mmahi niiona de alahenua,

gai go de gau hagadubu e nnoho ai.

9 Koe tee bale ange denga haahine gu maakau olaadeu bodu,

gai ne vaivai hai denga gauligi gu deai olaadeu damana.

10 Deelaa ai, denga sele gu duuli goe,

gai mee hagamaatagu ne moolau donu de hagamadagu goe,

11 gai koe gu i lo te gohu, koe gu dee gidee donu dahi mee,

gai tolona gu haoli goe.

12 E aha, e dee noho de Maadua i de mommee maolunga i de langi?

Galo age diiloo de maolunga o denga heduu!

13 Gai koe e hagadaba, ‘Ni aha a de Maadua e iloo?

E maua e ia i de hagamodu muna laa lo te mommee gohu?

14 Denga hagausinga maadolu e haoli ia, ma e dee gidee e ia gidaadeu,

i dono holiage saele i lo te langi.’

15 E aha, koe ga daohi naa donu huu i de haiava duai,

o de gau baubau ne seesee ai?

16 Gilaadeu ne maakau i mua delaadeu masavaa,

gai olaadeu dagelo gu daangia ma gu gaavee i dahi dolona.

17 Gilaadeu ne hai ange gi de Maadua, ‘Aude hakoso ina gimaadeu!

Ni aha naa a de Ia Mmahi Mmao laa e maua i de hai mai gi gimaadeu?’

18 Aagai ia gu hhao lodo olaadeu hale i mee danuaa —

au e dee buni ange gi hagasaele a de gau baubau.

19 De gau heohi e malangilangi i delaadeu gidee mee nei;

gai tangada tigi haisala e doo mee i gilaadeu,

20 ga hagadaba, ‘Ni muna abodonu odaadeu hagadaumee gu hagaduasala,

de ahi gu dudu olaadeu goloa e doe.’

21 Hagadanuaa ina ooluu magavaa ma de Maadua gi baba ai oo lodo,

gai tanuaa e humai naa gi de goe.

22 Gaavee ana muna bale e tala adu,

gai daohia ana muna i oo lodo.

23 Noo koe e ahe mai gi de Ia Mmahi Mmao laa, gai koe e hagadaga age ange naa;

noo koe e vvae gee de baubau mai i oo hale,

24 noo koe e dugu goolo i lo te gelegele,

ma goolo o Ophir i magavaa hadu i lodo vai,

25 gai de Ia Mmahi Mmao laa e hai naa go au goolo,

ma au selevaa hagamogomogo.

26 Gai koe ga malangilangi i de Ia Mmahi Mmao laa,

ma de galo age gi de Maadua.

27 Gai koe ga dalodalo ange gi de ia, gai ia e langona dau dangidangi,

gai koe ga hagasula au mee gu hagatoo donu ai.

28 Au mee e hagatau e hai e hagassula naa donu,

gai de maalama e hagamaalama naa oo haiava.

29 De masavaa naa huu e hagamaolalo ina ai dangada,

gai koe e hagadaba, ‘Hagahiihidia age gilaadeu!’

gai ia e hagaola naa gilaadeu e lodo maolalo.

30 Ia e hagaola donu hogi tangada tigi haisala,

gai ia e hagaola naa i hiidinga luoo lima e gilimalali.”