2 “Anailaa nei gai au gu kona donu dogu nanu;

dono lima e daemaha mmao, e dee galemu donu dogu gonogono.

3 Mee naa gi iloo e au be go hee aagu e gidee ai ia;

gai au ga hano ai gi dono mommee iai!

4 Gai au ga tala ange naa gi de ia dogu heohi,

gai au ga hagadaumee ange gi de ia.

5 Au e lodo gi iloo e au ana muna e basa mai ai,

ma de hai gi donu ange au gi ana muna e tala mai.

6 E aha, ia e hai baasi mai naa gi de au i dono sauaa laumalie?

E deai, ia e dee hagabaubau naa donu au.

7 Tangada heohi e maua i de tala dono donu i mada luoono mada,

gai dogu dangada hagamodu muna e tala bolo au e dee haisala.

8 Tilo, au e ssala naa i dua, aagai ia e dee i kilaa;

au e ahe naa gi dai, gai au e dee gidee ia i kilaa.

9 De masavaa oona e hai hegau ai i ngaiho, gai au e dee gidee ia;

de masavaa oona e huli ai gi ngaage, gai au e dee gidee hogi ia.

10 Aagai ia e iloo dogu haiava e hano ai;

ga lava naa huu dana hagatale au, gai au gu gilimalali

bei dagodo o denga goolo mai i lo te ahi.

11 Au e kana ange donu e daudali ange i ono duulangaa dabuvae;

gai au e seesee i dono haiava tee hano gee ai.

12 Au ne kii ange dogu daudali i ana muna gu tala mai,

i dagu hagamogomogo i agu gai.

13 Ia e dee dagodo gee naa donu, gai goai e maua i de sui dana maanadu?

Ia e hai ga bei ono lodo donu.

14 Ia e hai naa donu gi bei dana hagatau mai gi de au,

gai e lagolago donu ana hagatau bee nei i ono lodo.

15 Aanei hiidinga oogu e madagu ai nei i de ia;

de masavaa aagu e maanadu ai mee nei, gai au gu madagu i de ia.

16 De Maadua gu hai ma gu madagudagu au,

gai de Ia Mmahi Mmao laa gu hagamadagu au.

17 Go hiidinga au gu haolia i de gohu,

gai de gohu boo dangodango e buibui luoogu mada.