1 Gu aha de Ia Mmahi Mmao laa gu dee hagailonga ai laa denga masavaa hagamodu muna?

Gai gu aha dangada e iloo ia gu dee gidee ai laa ono laangi?

2 Hanu e ue denga hadu goinga o dangada,

gilaadeu e kave denga ssiibi ga dugu i olaadeu mommee iai helii.

3 Gilaadeu e kave gee donkey a de gauligi gu deai sono damana,

ma de kaau a de hine gu magau dono bodu, e hagadonu ai de hagaoa o alaadeu muli.

4 Gilaadeu e sseu gilaadeu e duasala gi hulo gee i honga de haiava,

gai e hai de gau hagaau aloha alodahi i honga henua gi hulo gi mmuni.

5 Tilo, de gau hagaau aloha e bei denga donkey lodo henua;

gilaadeu e hai hegau ange gi maua alaadeu gai;

gilaadeu e sala gai a alaadeu dama i de mommee e deai mee iai.

6 Gilaadeu e hagabudu alaadeu gai i lodo veelenga,

gai e ogo gai i lodo veelengaa grape a tangada baubau.

7 Gilaadeu e deai olaadeu malo,

gilaadeu e gilisau ma e sseni ai i de boo;

Gai e deai donu olaadeu mee e kahu ai i de hagamagalili.

8 Gilaadeu e ssui lebelebe i de langi i ulu denga mounga,

gai gilaadeu e hulo gi lalo hadu ma e hagalilo ai, e deai donu olaadeu hale.

9 Dangada e gaavee tama e deai sono damana mai i daho dono dinana,

gilaadeu e kave dahi gaagaa e hagadonu ai

de hagao a tangada hagaau aloha ana muli.

10 De gau hagaau aloha e hulo saele ma de gilisau,

gilaadeu e molimoli denga noodangaa grain, aagai gilaadeu goi hiikai donu huu.

11 Gilaadeu e kumi denga olive a tangada baubau, e hai ai lolo;

gilaadeu e dagadagahi denga grape e hai ai uvaini, aagai gilaadeu e hieunu.

12 De gonogono o dangada gu dai maakau e langona i lo te aduhale,

gai dangada gu lagolagohia e dangidangi i de bale.

Aagai de Maadua e dee hagahaisala dahi.

13 Hanu e hai baasi ange gi de maalama;

gilaadeu e dee iloo ono dagodo, aabe e seesee i ono haiava.

14 Tangada daa dangada e alahage i taiao gohugohu,

e daa gi maakau gilaadeu e duasala,

gai ia e gaiaa i de boo bei tangada gaiaa.

15 Tangada dagodo haisala e tali gi gohugohu de mee;

ia e hagadaba, ‘E deai naa donu e gidee au,’

gai ia e haoli luoono mada.

16 De boo gai de gau baubau e oha denga hale ga ulu ai;

gai de laangi gilaadeu e mmuni; gilaadeu e dee iloo donu de maalama.

17 De boo gohu e bei taiao i olaadeu daha;

go hiidinga gilaadeu ni soa niio mee hagamaatagu o de gohu.

18 Ia e moolau donu tee maleva bei ebuebu i honga vai;

delaadeu duuhanga i honga de henua go de hagamalaia,

gai gu deai e hulo e denga veelengaa grape.

19 Tau laohie ma de mahana e hai gi dee daakodo vai o denga snow;

gai e bei ai hogi, de mommee o de gau maakau

e kave gee gilaadeu gu haisala.

20 Olaadeu dinana e ngalo hogi gilaadeu, gai denga ilo e gai angaanga.

Dangada gu dee manadua gilaadeu,

aagai gilaadeu gu sele bei de manu somo.

21 Gilaadeu e vaivai hai denga haahine e deai alaadeu dama,

gai e dee abodonu ange gi de hine gu maakau dono bodu.

22 Aagai de Maadua e kave gee de gau mmahi i ono mmahi;

gilaadeu e ssula, aagai e deai selaadeu tali i de mouli nei.

23 De Maadua e hai gi dagodo be gilaadeu e nnoho paba,

aagai ia e dagitilo gilaadeu.

24 Gilaadeu e hagaamua i dahi masavaa bodobodo, ga lava gu dee maaleva;

gilaadeu e mmae bei mee ange laa alodahi,

ga lava ga duuduu bei denga grain.

25 Noo e dee deenei tagodo,

gai goai e maua i de hagaago mai bolo au se dangada hadu muna,

aabe agu muna e dee heohi?”