1 Aagai iainei gilaadeu e kada i de au, dangada e gauligi mai ange i de au;

gai olaadeu damana ni dangada niiogu e kino

i de dugu madali denga gaaduu e hagaloosia ina agu ssiibi.

2 Gu ni haigamaiana aha olaadeu mahi mai gi de au,

gai gu ui de masavaa olaadeu e mahi ai?

3 Gilaadeu gu duasala ma de hiikai,

gilaadeu gu maamaa de gelegele mmasa,

i de mommee e deai mee iai i de boo.

4 Gilaadeu e hagihagi lau o denga manu ssomo ma e gai,

alaadeu gai go aga o de manu somo go de broom.

5 Gilaadeu gu alualumia gi dee nnoho i magavaa o dangada;

gai e hagaseegina bei dagodo o de gau gaiaa.

6 Gilaadeu gu hai gi nnoho i mommee iai saalingaa vai gu masa,

ma magavaa o denga hadu ma haonga i lo te gelegele.

7 Gilaadeu gu koo bei manu alasala i lodo mee muimui;

ma de nnoho i lalo denga manu duiduia.

8 Gilaadeu ni dama nii de gau llodo ssenga gai ni ngadi dangada,

gilaadeu gu hai gi hulo gee mai i de henua.

9 Gai iainei gilaadeu gu hadu dahi daahili hakadanga ai i de au;

au gu se mee niiolaadeu e kada ai.

10 Gilaadeu e kino i de au, ma de hagammao gee i de au;

gilaadeu e dee maatagu donu i de saavale mai gi luoogu mada.

11 Go hiidinga de Maadua gu hagatanga dagu mee hholu ma de hagamaolalo hogi au,

gilaadeu gu dee maatagu donu i de hai baasi mai gi de au.

12 Dangada i dogu madau gu hai baasi mai gi de au;

gilaadeu gu usu luoogu vae gi baguu ai au,

ma de hagatuu mee e hai baasi mai ai.

13 Gilaadeu gu oha dogu haiava;

gilaadeu gu hagahai ngadaa donu au,

gai teai hogi dangada ne daohia gilaadeu.

14 Gilaadeu e ulu mai i de mommee maoha i de buibui,

gai ne loomai laa lodo mommee gu maoha.

15 Denga mee hagamaatagu gu tuu mai gi de au;

gai dogu hagadubu gu bei de mee e ilihia laa ga gaavee gee i de madangi,

gai dogu lava gu ilihia bei de giliiga.

16 Iainei, dogu mouli gu baa ange gi de odi;

gai ogu laangi e duasala ai tigi ui donu.

17 Ogu ivi e ssae i de boo,

gai dogu mmae e dee haganoho donu.

18 Dono sauaa mmahi gu hai ogu malo gi huuhuli gee;

ia gu nnoa au bei de kala e nnoa ai laa dogu malo laa daha.

19 Ia gu maga ange au gi lodo gelegele iai vai;

au gu bei dagodo o denga gelegele ma lehu.

20 De Maadua, au e dangi adu gi de goe, aagai koe e dee basa mai;

au e duu age, aagai koe e dee anga mai gi de au.

21 Koe e huli ma gu hai baasi mai gi de au,

koe gu hagaili au i doo lima mmahi.

22 Koe e hai gi ilihia ngau i de madangi gi gaavee gee,

koe e hagaleva saele au i de madangi mmahi.

23 Au e iloo bolo koe e kave naa ngau gi de magau,

go de mommee gu hagadabena ange gi dangada alodahi e mouli.

24 E aha, tangada gu duasala e dee haalo naa dono lima,

ga dangidangi i de bale i dono masavaa e hai ngadaa ai?

25 E aha, au tee dangi laa i gilaadeu gu hai ngadaa?

E aha, au tee hinangalosaa laa i de gau hagaau aloha?

26 Gai dagu masavaa ne tali ai tanuaa, aagai go de baubau aagu ne gidee;

de masavaa aagu ne tali ai de maalama, aagai go de gohu ne humai.

27 Ogu lodo e duasala mmao, e deai donu se mabu;

laangi o de sae gu tuu mai gi de au.

28 Au gu uliuli i dogu hano saele, aagai e dee go hiidinga o de laa.

Au ne duu age i de hagabuni o dangada ga dangidangi i de bale.

29 Au gu bei dagodo o denga jackal,

gai se soa niio denga ostrich.

30 Dogu gili gu uliuli ma de daga,

gai dogu angaanga gu kona de vvela.

31 Dagu harp e hua denga daahili hagahinangalosaa,

gai dagu flute e hagadangidangi madali gilaadeu e tangi.