1 Au gu hagatoo donu hagaheloongoi ange gi luoogu mada,

bolo au e dee tilo ga lodo ange gi dahi bua moe.

2 Gai dee hee tiba a tangada mai i daho de Maadua i lunga,

be go dono boolonga mai i daho de Ia Mmahi Mmao, e noho laa i de mommee maolunga?

3 E aha, de hai ngadaa e dee duu ange laa gi de gau baubau,

gai de mmala ange gi gilaadeu e haia de baubau?

4 E aha, de Maadua e dee gidee agu mee e hai,

gai e dau hanonga e lagalaga ai luoogu vae?

5 Noo au gu hai hegau i de mee dee heohi,

aabe go de daahanga dangada,

6 gai de Maadua gi hagahidi ina ogu dagodo i de mee hagahidi heohi,

gai ia e gidee ai naa bolo au tigi haisala donu.

7 Noo au gu hano gee i de haiava heohi,

gai ogu lodo gu nnoo ange gi agu mee e gide,

aabe dahi mee hakino gee gu pigi ange gi luoogu lima,

8 gai hanu dangada gee gi gaina mee aagu ne doo,

gai gi unuunusia age agu manu gu doo.

9 Noo ogu lodo gu hagasengalia e dahi hahine,

gai au e tali i gaogao de haitoga o tangada e baa mai gi de au,

10 gai dogu bodu gi miilia grain a dahi daane gee,

gai hanu daane gee gi hagahebaa ma ia.

11 Gai de hegau laa se baubau donu,

se baubau e hagaduasala ai tangada i daho de gau hagamodu muna.

12 Gai se ahi e duungia ga dae ai gi Abaddon;

gai e dudu naa ga odi agu mee alodahi.

13 Noo au e dee hagamodu muna o ogu daane ma haahine hai hegau i de heohi,

i de masavaa olaadeu e nnanu ai i de au,

14 gai ni aha naa aagu e hai i de masavaa a de Maadua e hagamodu ai ogu muna?

Gai noo ia gu hai ssiilingaa muna, gai dee hee ai naa dogu hai e basa ange ai?

15 Gai e dee go de ia hogi ne haia nei au i de mommee o denga dama ne hai ia?

Gai e dee go ia hogi ne haia gidaadeu i lodo dinae o odaadeu dinana?

16 Noo au e dee abodonu ange gi de gau hagaau aloha

i olaadeu mee e duasala ai,

be e dee bale ange de hine gu magau dono bodu i dono hai ngadaa;

17 noo au e gai sogosogo donu huu agu gai,

e dee gaavange hanu gi denga gauligi gu deai olaadeu damana —

18 (mai i dogu gauligi gai au ne haele gilaadeu bei delaadeu damana,

gai mai i de masavaa oogu ne haanau ai, gai au ne tilo ange denga haahine gu maakau olaadeu bodu;)

19 noo au ne gidee dahi dangada e duasala i teai ono malo,

aabe se dangada hagaau aloha e deai sono mee e gahu ai;

20 noo ia tee tuhi mai au,

i dagu hakahu ia gi mahanahana i huluhulu o agu ssiibi;

21 noo au ne hai baasi ange gi denga gauligi e deai olaadeu damana,

gai au e iloo bolo au e dahi ogu sauaa i de haitoga o de aduhale,

22 gai dogu bakau gi mahagi gi doo,

gai dogu lima gi hadi gi doo gee i dogu eu.

23 Go hiidinga au e madagu i de hagaduasala a de Maadua;

au e dee maua donu i hai de mee nei i hiidinga o dono mahamaha.

24 Noo dagu tali hagalodolodo go denga goolo,

ma de hagabinga bolo denga goolo go dagu tali;

25 noo au e malangilangi i hiidinga ogu goloa lagolago,

aabe go hiidinga au ne maua mee lagolago;

26 noo au e galo age ga tilo de maalama o de laa,

aabe go de ngalue o de maasina ma dono mahamaha,

27 gai au gu hagasengalia

ga hagadubu gilaadeu i de oso dogu lima:

28 gai mee nei se baubau hogi nii de gau hagamodu muna e hagaduasala,

gai au gu hagangadi mee de Maadua i de mommee maolunga.

29 Noo au e malangilangi i de duasala o dogu hagadaumee,

aabe go de lodo danuaa i dono hai ngadaa;

30 (gai au tee dugu ange dogu ngudu gi haisala,

i dagu hagadaba bolo ia gi malaia;)

31 noo dangada i dogu huaabodu tigi hagataba,

‘Goai tangada tee bosu i de gaimee i gai a Job?’

32 (aagai teai se dangada henua gee ne seni i gaogao denga haiava,

gai dogu hale e mahuge ange gi tangada henua gee i masavaa alodahi;)

33 noo au e dee tala dagodo o ogu haisala bei de gau ange laa,

gai e hagammuni ogu baubau i ogu lodo,

34 go hiidinga au e madagu i dangada soa,

ma de madagu i de hagangadi mee a dogu huaabodu au,

deelaa ai, au e noho dee muu, ma tee sao gi duaahaho —

35 (Mee naa gi dahi dangada e hagalaangona agu muna!

Tilo, au gu sisi dogu ingoo e hagasauaa ai agu muna;

de Ia Mmahi Mmao laa gi basa mai gi agu muna,

gai dogu hagadaumee gi siia ana mee e hagabaubau ai au.

36 Ni muna abodonu au e dau de mee nei i honga dogu eu,

ma de hagauda ange gi honga dogu biho bei de hau.

37 Au e tala ange naa gi de ia agu mee alodahi gu hai;

au e hedae ange naa gi de ia, bei dagodo o dahi dagi.) —

38 Noo dogu gelegele e hai baasi mai gi de au,

gai ono geelinga e ssui i denga loimada;

39 noo au e gai ono hua gai e dee hagao,

ma de hagaduasala dangada niiolaadeu de mommee:

40 gai denga manu daladala gi ssomo i kilaa, e dee go wheat;

ma denga helii baubau, e dee go barley.”