32
Muna a Elihu
1 Gai denga daane dogodolu laa ga tuu delaadeu pasa ange gi a Job, go hiidinga ia e maanadu bolo ia e heohi donu. 2 Gai Elihu tama daane a Barakel taane Buz, o de hagadiilinga o Ram, gu kona mmao de lili, i de hagaheohi a Job ia, ia tee hagaheohi de Maadua. 3 Ia ne lili hogi i soa dogodolu o Job, i hiidinga gilaadeu tee maua i de pasa ange gi muna a Job, aagai gilaadeu e hagataba bolo a Job gu dee heohi. 4 Gai Elihu ne noho ga tali gi odi denga daane ange laa i de pasa ange gi a Job, go hiidinga gilaadeu e maatua ange i de ia. 5 Gai ga gidee huu e Elihu bolo denga daane dogodolu ange laa gu deai alaadeu muna e maua i de tala ange gi a Job, gai ia gu kona mmao de lili.
6 Gai Elihu tama daane a Barakel taane Buz ga basa ange, ga hai ange,
“Au se gauligi donu huu,
gai goodou ni daane gu maatua;
deenei ai, au ne manavasaa ma de madagu
i de tala adu dagu maanadu.
7 Au ne maanadu i ogu lodo,
‘Dugua ange de gau maatua gi pasa,
i hiidinga go de gau maatua e agoagona mai de heiangi.’
8 Aagai go de hagasaalunga i lodo o tangada,
ma de madangi o de manava a de Ia Mmahi Mmao laa,
e haia gi maua e ia i de donu ange.
9 E dee go de madumaatua o tangada oona e heiangi ai,
aabe go gilaadeu donu huu e tonu ange gi de mee heohi.
10 Deenei ai, au e hai adu:
Goodou nnoho mai hagalaangona agu muna,
gai au ga tala adu hogi agu mee gu iloo.
11 Tilo, au ne noho ga tali adu goodou gi daalaa oodou muna,
ma de hagallongo oodou maanadu,
i de masavaa oodou e hagasaele ai oodou muna e tala.
12 Au ne kana ange ga hagallongo oodou muna,
aagai tilo, teai se goodou ne maua i de hagaago mai bolo a Job e dee heohi;
aabe ne maua i de basa ange gi ana muna.
13 Goodou kana hagataba donu, ‘Gimaadeu gu gidee de heiangi;
go de Maadua e maua i de hagadaumee ange gi de ia, e dee go dahi dangada.’
14 Job tee hagadaumee mai gi de au,
gai au e dee basa ange naa hogi gi ana muna bei oodou muna ne pasa ange ai.
15 Gilaadeu gu lele mouli, gu deai alaadeu muna e pasa ange ai,
gai gu deai alaadeu muna e maua i de tala.
16 E aha, ga noho au e tali ange, i hiidinga gilaadeu gu dee mmuu iainei,
ma de tuu donu huu gu dee pasa mai?
17 E deai, gai au e tala adu naa donu agu muna;
au e tala hogi agu mee e iloo.
18 Gai ogu lodo gu honu i denga muna,
gai de hagasaalunga i ogu lodo e usuusu mai au.
19 Tilo, ogu lodo gu bei de manu e hhao ai denga uvaini,
ma gili manu hoou gu dai masae laa.
20 Au e basa donu e tala agu muna gi maamaane ai ogu lodo;
au e hhanga dogu ngudu e basa ange ai.
21 Au e dee hilihili dangada
aabe e hagasegesege ange dahi dangada.
22 Go hiidinga noo au e iloo de hagasegesege ange dahi dangada,
gai de ia ne haia ngau e moolau naa donu dana daa ngau ga magau.