1 Job, iainei gai koe hagalaangona agu muna;

gai noho hagalaangona agu muna alodahi e tala.

2 Tilo, iainei gai au ga hhanga nei dogu ngudu;

au gu baba donu e tala agu muna.

3 Agu muna e hagaago mai bolo ogu lodo e heohi,

gai au e tala agu mee e iloo i de muna abodonu.

4 De Hagasaalunga o de Maadua ne hai au,

gai de madangi o de manava o de Ia Mmahi Mmao laa ne hai au gi mouli.

5 Basa mai gi agu muna, noo koe e maua;

hagadabena ina au muna e hagadaumee mai ai gi de au.

6 Tilo, gidaau se dagodo daudahi i daho de Maadua;

au se dangada hogi ne hai i gelegele pigi.

7 Tilo, e deai donu oo hiidinga e madagu ai i de au,

gai au e dee kona naa donu dagu hagadaemaha goe.

8 Ni muna abodonu, koe ne tala gi langona e au,

gai au gu langona dau hagadaba:

9 ‘Au e gilimalali gai e deai donu ogu haisala,

au tigi haisala donu, gai e deai donu ogu dee heohi.

10 Aagai de Maadua gu gidee dahi mee e hai baasi mai ai gi de au,

ia gu hai au gi se hagadaumee niiona;

11 ia gu nnoa ange luoogu vae gi denga laagau hagamakaga,

ma de dagitilo mommee alodahi oogu e hano aagena.’ *Job 13.27

12 Tilo, koe e dee heohi donu i de mee nei; au e basa adu gi au muna.

De Maadua e maolunga ange i tangada.

13 Gai gu aha gu nanu ange ai naa goe i de ia,

gai ia e dee basa ange donu gi muna a dangada?

14 Go hiidinga de Maadua e basa i tahi ma de lua hanonga,

gai e deai donu se dangada e donu ange aagena.

15 Ia e basa i de midi, ma de midi hagaago ange i de boo,

i de masavaa e sseni tao ai dangada,

ma delaadeu sseni i honga olaadeu moenga;*Job 4.13

16 ia e hhuge dalinga o dangada,

ga hagamaatagu gilaadeu i ana haelenga.

17 Ia e maua i de hagadahuli gee tangada mai i ana dahulinga baubau,

ma de aau gee de lodo maolunga i daho tangada;

18 ia ga hagaola ia mai i de mommee o de gau maakau,

ma de hagaola ia gi dee magau ai ia i de gadilaasa.

19 Tangada e haelea hogi i dono magi ga dagodo i honga de moenga,

gai dono angaanga e sae i masavaa alodahi,

20 gai denga gai gu ni mee niiona e kino ai,

ia gu kino hogi i denga gai danuaa hugadoo.

21 Dono angaanga gu hagadaga de bangabanga,

gai ono ivi nogo llilo laa gu tuu mai.

22 Ia gu baa ange donu gi de geelonga o de gau maakau,

dono mouli e gaavange gi gilaadeu e haia gi humai de magau.

23 Aagai noo dahi dangada de langi e balea ange ia,

se ia e hano i magavaa, gai go dahi i magavaa o de mano

e tala ange gi tangada de mee heohi i dana hai;

24 ma de abodonu ange gi de ia, ga hai ange,

‘Hagaola ina ia mai i de mommee o de gau maakau,

au gu gidee de hai e hagaola ai ia’ —

25 gai dono angaanga e ahe ange naa ga dama daane,

ma de ahe ange ga mmahi bei dono masavaa e dama daane ai.

26 Gai tangada ga dalodalo ange gi de Maadua, gai ia ga abodonu ange gi de ia,

gai ia e malangilangi i dana gidee luu mada o de Maadua;

gai de Maadua e ahe ange ga hagaheohi ia.

27 Gai ia e daahili naa i madamada o dangada, ga hai ange,

‘Au gu haisala, au gu hano gee i de mee heohi,

aagai de Maadua tee hagaduasala donu au.

28 Ia ne hagaola au mai i de mommee o de gau maakau,

au e mouli naa ga gidee de maalama.’

29 Tilo, de Maadua e hai ange mee alodahi gi tangada,

i e lua aabe dolu hanonga,

30 e hagaahe mai ai ia i de mommee o de gau maakau,

gai de maalama o de mouli ga hagamaalama ia.

31 Job, noho mai hagalaangona,

gai noho hagalaangona agu muna;

aude basa, gai au ga basa adu.

32 Gai noo e hanu au muna e lodo e tala mai, gai koe daalaa mai;

gai au e malangilangi donu i de tala bolo koe e heohi.

33 Gai noo e deai, gai koe nnoho hagalaangona agu muna;

aude basa, gai au ga agoago adu goe i dagodo o de heiangi.”