2 “Goodou denga daane heiangi, nnoho mai hagalaangona agu muna.

Goodou denga daane iloo mee, hagalaangona agu muna;

3 i hiidinga talinga e haide dagodo o denga muna,

bei de hai a de alelo e mami ai denga gai.

4 Gidaadeu ga hilihili be se aha e heohi,

gidaadeu alodahi ga made de mee danuaa.

5 Gai a Job ne hai ange, ‘Au e heohi donu huu,

gai de Maadua gu kave gee dogu heohi.

6 E dee galemu donu au e heohi, gai gu hagabinga bolo se dangada hadu muna;

e dee galemu donu au tigi haisala, gai ogu maanuga e dee maua gi mahu.’

7 Goai tangada e bei dagodo o Job,

go de ia gu unumia de hagadogaa?

8 Ia e hagabuni ange gilaadeu e haia de baubau,

ma de noho madali de gau baubau.

9 Gai ia e hagadaba, ‘E deai donu mee a tangada e mau,

i dana hai gi malangilangi de Maadua.’

10 Deenei ai, goodou denga daane e tonu ange laa, nnoho mai hagalaangona agu muna.

De Maadua e dee hai donu de baubau,

de Ia Mmahi Mmao laa e dee hai de mee dee heohi.

11 Gai ia e hagao ange tangada gi bei dagodo o ana hegau,

ia e hai gi aahe ange donu huu gi tangada ana hegau.*Psa 62.12

12 Ni muna abodonu, de Maadua e dee hai hegau baubau,

gai de Ia Mmahi Mmao laa e dee hagahaisala donu de hagamodu heohi.

13 Goai ne dugu ange ia gi huahua i henua i lalo,

gai goai ne hilia ange ia gi diiloo ange henua i lalo alodahi?

14 Noo de Maadua e hagaahe dono hagasaalunga

ma de hagaahe de madangi o dana manava,

15 gai dangada alodahi e odi naa i de maakau,

gai tangada e ahe ange naa gi de gelegele.

16 Noo koe e donu ange, gai koe hagalaangona de mee nei;

noho mai hagalaangona agu muna e tala.

17 E maua e de ia e kino i de hagamodu heohi i de dagi?

Gai koe e maua i de hagabaubau de ia heohi laa ma de mmahi?

18 Gai go ia e hai ange gi dahi hodooligi, ‘Koe e deai donu oo haigamaiana,’

gai e hai ange gi de gau aamua, ‘Goodou ni dangada baubau.’

19 Go ia e dee hilihili dangada ange gi dagi o de henua,

gai e dee kii ange dono abodonu ange gi de gau lava i de gau hagaau aloha,

go hiidinga go ia ne haia gilaadeu alodahi.

20 Gilaadeu e moolau donu i de maakau i lo te boo,

gai dangada e maakau ga dee maaleva;

gai de gau mahi gu gaavee gee,

gai e dee se dangada ne haia mee nei.

21 Ia e daumada hegau alodahi a tangada;

ia e gidee ono mommee alodahi e hano aagena.

22 E deai donu se mommee gohu, e deai donu se mommee gohu boo dangodango,

e maua e dangada e haia de baubau i de mmuni ai.

23 De Maadua tigi hagailonga ange dahi masavaa

e hagamodu ai muna o tangada i mada luoono mada.

24 Ia e daa gi maakau gilaadeu e mmahi, gai e deai donu se siilingaa muna e hai,

gai ga hai hanu dangada gee gi gaavee olaadeu duulanga.

25 Go hiidinga ia e iloo alaadeu mee e hai,

ia e hagadee kii gilaadeu ma de hagaduasala gilaadeu i de boo.

26 Ia e hagaduasala gilaadeu i madamada o dangada,

i hiidinga o alaadeu hegau baubau,

27 go hiidinga gilaadeu gu daahuli gee ma gu dee daudali ange i de ia,

gilaadeu gu hagangadi mee ono haiava.

28 Gilaadeu ne hai gi langona e de Maadua de tangi o de gau hagaau aloha,

gai ia ne langona de tangi o olaadeu e duasala.

29 Aagai noo ia e dee muu, gai goai e maua i de hagabaubau ia?

De masavaa aana e haoli ai luoono mada, gai goai naa e gidee ia?

Gai e dee hilihili be ia e hai baasi ange gi dahi huaahenua

aabe go dahi dangada,

30 gi dee maua ai e tangada baubau i de dagi,

gai ia ga hagahaisala ai dangada.

31 Gai noo dahi dangada e hai ange gi de Maadua,

‘Au gu haisala, aagai au e dee ahe ange naa donu e haisala.

32 Agoagona mai au i mee aagu e dee gidee,

gai noo au gu hai de mee dee heohi, aagai au e dee ahe ange donu e hai’ —

33 e aha, koe e lodo de Maadua gi hagao ina adu goe bei doo hai e lodo ai,

gai koe e dee lodo e dahuli oo lodo?

Koe hilihilia, e dee go au;

deenei ai, daalaa mai be ni aha au e iloo.

34 Dangada e tonu ange e hai mai gi de au,

gai de gau heiangi e langona agu muna e hai mai naa gi de au:

35 ‘Job e dee basa i de iloo mee,

gai ia e dee donu ange gi ana muna e tala.’

36 Mee naa gi kona de hagaduasala o Job,

go hiidinga ia e basa bei de gau baubau.

37 Gai ia e hagapuni ange de hai dana hai gi ono haisala;

ia e baabaa luoono lima i dana hagangadi mee gidaadeu,

ma de hagalagolago ana muna e hai baasi ange ai gi de Maadua.”