1 Dogu hadu manava gu bolebole

ma gu ngalue gee mai i dono duulanga i de hai mee nei.

2 Hagalaangona, hagalaangona adu dono leo,

ma de haganngolo mai o lo tono ngudu.

3 Ia e hai gi labalaba ana uila i lalo de langi alodahi,

ma de hai gi hano gi dae gi luu bido o henua i lalo.

4 Muli mai gai dono leo e hagangolo;

ia e hai gi babaa ana hatuli i de leo mmahi.

Ia e dee haganoho donu de labalaba o denga uila

i de masavaa e langona ai dono leo.

5 De leo o de Maadua e hagalele mouli i de hagangolo i de hatuli;

ia e hai hegau nnui odaadeu e dee tonu ange laa aagena.

6 Ia e hai ange gi denga snow, ‘Malili iho gi henua i lalo,’

gai e hai ange gi de langi pala, ‘Gi kona de pala de langi.’

7 Ia e daohi hegau a dangada alodahi,

gi iloo ai e dangada alodahi dagodo o ana hegau.

8 Denga manu lodo henua gu hulo ma gu hagalilo,

ma de nnoho i lodo olaadeu hale.

9 Ssio e sao mai i dono aabi,

gai de madangi e hai ga hagamagalili.

10 De manava o de Maadua e hagahale denga haisi,

ma de hai gi makaga honga denga vai.

11 Ia e hhao denga hagausinga i de vai,

gai e hai denga hagausinga gi gaavee saele ana uila.

12 Gai ia e hai gilaadeu gi haganigo saele gi haia mee alodahi aana e tala ange

i honga henua i lalo alodahi e nnoho ai laa dangada.

13 Ia e gaamai de langi e hagaduasala ai dangada,

aabe e hagamaluulu ai de gelegele, e hagaago mai ai dono aloha.

14 Job, hagalaangona de mee nei;

gai noho hagasaelea hegau hagalele mouli a de Maadua.

15 E aha, koe e iloo dagodo o ssauaa o de Maadua e daohi ai denga giliiga,

ma de hai ana uila gi labalaba i lodo hagausinga?

16 Koe e iloo be dee hee de hai o denga hagausinga e daudau ai laa i lo te langi,

ma hegau hagalele mouli a de ia e honu abodonu laa dono iloo mee?

17 E deai, koe e langona iho donu huu doo mahana

i de masavaa o de madangi mai i ngaage e hai ai ga dee hagalongaa honga de henua.

18 Koe e maua i de doha gi madoha lo te langi madali ia,

ma de hai gi makaga bei de galaasa dilodilo?

19 Daalaa mai amaadeu muna e tala ange gi de Maadua;

gimaadeu e dee maua i de hagatau amaadeu muna,

i hiidinga amaadeu hagasaele e gohu.

20 E aha, ga tala ange au gi de ia bolo au e lodo e basa ange?

E aha, e dahi nei dangada e lodo gi magau ia?

21 E deai donu se dangada e maua i de galo ange e tilo de laa,

i de masavaa e kona ai maalama i lo te langi,

i dua de hai a de madangi ga deai hagausinga.

22 De maalama mahamaha e hanage i ngaiho;

de Maadua gu gahu i de mahamaha hagalele mouli.

23 De Ia Mmahi Mmao laa — gidaadeu e dee maua gi gidee ia;

ia e mmahi mmao; ia e dee hagahaisala dana hagamodu muna heohi;

ia e heohi mmao, gai e dee hagaduasala gidaadeu.

24 Deelaa ai, dangada e maatagu i de ia;

ia e dee anga ange gi dangada e maanadu laa bolo gilaadeu e heiangi.”