2 “Goai e hagagohu ina nei agu muna bale

i muna e deai se iloo mee iai?

3 Hagadabena mage duu age be se daane,

gai au ga ssili adu agu muna, gai koe ga basa mai.

4 Go hee oou nogo iai i de masavaa aagu ne hagaduu ai tagelo o henua i lalo?

Daalaa mai muhuu, noo koe e donu ange aagena.

5 Goai ne hagailonga ina ono haidenga?

Ni muna abodonu koe e odi donu mee nei i dau iloo!

Gai goai ne dagia de uga ga haide ai?

6 Gai se aha ne hagatuu ange aagena ono dagelo,

aabe goai ne hagaduulia tuludulu o de logunga i kilaa —

7 i de masavaa o denga heduu o taiao ne daahili ai,

gai de gau de langi ne hevaalogi i de malangilangi?

8 Goai ne bonodia tai i hanu haitoga,

i de masavaa ne ssii age ai vai i tagelo,*Jer 5.22

9 ma de masavaa aagu ne hakahu ai honga tai i denga hagausinga,

ma de saabini i denga hagausinga maadolu,

10 ma de masavaa aagu ne hagamodu ai dono ngaadonga,

ga hagatuu ono haitoga ma mee e hagamakaga ai;

11 gai au ne hagadaba, ‘Koe e dae mai donu huu gi kinei e dee hano gi ui;

go kinei o denga beau mmahi e tuu mai ai’?

12 Gai gu dahi au tala ange mee a taiao ne hai mai i taamada doo mouli,

aabe go de hagaago ange gi taiao dono duulanga,

13 gi hano ai gi dae gi luu bido o henua i lalo,

ma de luuluu de gau baubau gi dee nnoho i kilaa?

14 Henua i lalo ne sui bei bela pigi i lalo de mee maaga,

gai ono maaga e daakodo danuaa mai bei maaga o de malo.

15 Gai de maalama e buibui hegau a de gau baubau,

gai e daohi gilaadeu gi dee vaivai haia dangada.

16 E aha, koe gu dae laa gi de mommee e ssali age ai vai o tai,

aabe gu seesee i lo te dagelo o de moana?

17 Koe gu gidee denga haitoga o de magau,

aabe gu gidee haitoga o de mommee gohu boo dangodango?

18 Koe e iloo be dee hee maa de laumalie o henua i lalo?

Daalaa mai, noo koe e iloo mee nei alodahi.

19 Gai dee hee de haiava e hano ai gi de mommee e daamada mai ai de maalama,

gai go hee iai de mommee e daamada mai ai de gohu?

20 Koe e maua i de hagaahe gilaau gi olaau mommee,

gai koe e iloo denga haiava e hulo ai gi olaau hale?

21 Koe e iloo donu, go hiidinga koe gu haanau huu i de masavaa laa;

koe gu lagolago donu oo ngadau ne mouli ai!

22 Koe gu ulu laa gi lodo mommee doange o denga snow,

aabe gu gidee mommee doange o denga dibaa haisi,

23 go mee aagu gu dugu ange gi de masavaa hai ngadaa,

ma de masavaa o taua ma de hebagi?

24 Gai dee hee de haiava e hano ai gi de mommee e daamada mai ai de maalama,

aabe go de mommee o de madangi mai i dua e humai ai gi honga de henua alodahi?

25 Goai ne gelia de ava e hulo ai vai o de langi,

ma de haiava o de uila ma hatuli,

26 ma de hai gi pala iho de langi gi honga de henua e deai dangada iai,

ma de vao e deai laa dangada iai,

27 e hagamaluulu ai de gelegele e deai mee e ssomo ai,

ma de hai gi ssomo age helii i honga de gelegele?

28 Gai e dahi laa damana o de langi pala?

Gai goai ne hagadili ina madaua o mee ssuungia o taiao?

29 Goai ne hanaua denga haisi,

gai goai ne hanaua denga haisi malili mai i de langi?

30 Denga vai gu makaga bei de hadu,

gai honga denga vai gelo gu makaga hogi.

31 Koe e maua i de noonoa de hagabuulingaa heduu go de Pleiades,

aabe e tala mee noonoa o de hagabuulingaa heduu go de Orion?*Job 9.9; Amos 5.8

32 Koe e maua i de hai gi ssula age de hagabuulingaa heduu go de Mazzaroth i de masavaa gu hagailonga,

ma de dagi de Bea ma ana dama?

33 Koe e iloo denga hainga o mee i lo te langi?

Koe e maua i de hagatuu hanu hainga ange gi mee i henua i lalo?

34 Koe e maua i de oo ange gi denga hagausinga,

gi pala iho ai de langi gi oo elunga?

35 Koe e maua i de hai gi hulo denga uila gi dahi mommee,

ma de hai adu ai gi de goe, ‘Aanei gimaadeu’?

36 Goai ne gaavange de heiangi gi lodo o tangada,

gai goai ne haia ia gi donu ange?

37 Goai e dahi ono heiangi e dau denga giliiga?

Gai goai e maua i de hagadiba de ssaa e hhao ai vai i lo te langi,

38 ga hai de mama o denga gelegele gi pigi,

gai denga bela gu pigi ma gu makaga?

39 Go koe e maua i de tili de manu e gai de laiono hahine,

aabe go de hai gi boobosu denga dama a de laiono,

40 i de masavaa olaadeu e nnoho ai i lodo olaadeu hale,

ma de dagitilo i lodo mee muimui?

41 Goai e gaavange gai a de raven,

i de masavaa o ana dama e tangi ange ai gi de Maadua,

ma de silivaahea saele i teai alaadeu gai?