1 E aha, koe e iloo de masavaa o denga guudi i ulu mounga e haanau ai laa alaadeu dama?

Go koe e dagidiiloo laa de masavaa o dahi dia e haanau ai dana dama?

2 Go koe e daulia taelodo o olaadeu malama ga dae ai gi delaadeu haanau,

gai koe e iloo delaadeu masavaa e haanau ai?

3 Gilaadeu e nnoho gi lalo e haanau ai alaadeu dama,

gai gu ui delaadeu mmae i dua de too mai alaadeu dama.

4 Alaadeu dama e maatua age ga mmahi i lodo henua;

gai gilaadeu e hulo gee e dee aahe mai ange.

5 Goai ne dugua gi hano dahi donkey lodo henua?

Gai goai ne daalaa mee noonoa o dahi donkey aada?

6 Go au ne gaavange de vao e hai ai dono mommee noho,

ma de henua iai soolo e noho ai ia.

7 Ia e gadagada i de hellumi o lo te aduhale,

gai ia e dee hagallongo de oo o tangada e haia gi savini dahi manu.

8 Dana mommee e gai ai helii go honga denga mounga,

gai ia e ssala denga manu lau kohu.

9 E aha, e lodo de kaau lodo henua e hai hegau adu gi de goe?

Gai ia e noho laa i lo tau buibui manu i de boo?

10 Koe e maua i de nnoa dahi kaau lodo henua gi hagabalabala ina de gelegele,

aabe gi daudali adu i oo dua gi hagabalabala ina ai denga geelonga?

11 E aha, koe e maua i de hagadonu de kaau aada, i hiidinga de kona dono mmahi,

ma de dugu ange ia gi haia au hegau?

12 Koe e iloo abodonu bolo de kaau laa e ahe mai naa

ga gaamai au grain gi de mommee hili huamanu?

13 De ostrich e mahamaha i de gabagaba luoono bakau;

gai luoono bakau e dee maua i de hagahedae ange gi hulu manu o de stork.*Muna Hebrew i kinei e dee iloo danuaa dono hagadoonunga.

14 De ostrich e dugu ana ngago i honga de gelegele,

e hagamahanahana i honga de gelegele;

15 ia gu ngalo bolo ana ngago e maua gi dagadagahia ga mahaahaa,

gai denga manu lodo henua e maua i dagadagahi ga mahaahaa.

16 De manu nei e vaivai hai ana dama, e dagodo be e dee ni dama niiana;

gai e dee anga ange donu gi teai haigamaiana o ana hegau,

17 go hiidinga de Maadua tee hai gi heiangi ia,

aabe ne hai gi maua e ia i de donu ange.

18 De masavaa e doha ai luoono bakau e savini,

gai ia e gadagada i de hoosa ma tangada e savini ai.

19 E aha, go koe ne gaavange mmahi o de hoosa,

aabe go koe ne hakahu ina ange dono ua i denga huluhulu?

20 E aha, go koe ne haia de hoosa gi lele bei de itebuubuu,

ma de hai gi maatagu dangada i dana busi luoono bongaa usu?

21 Luoono vae e geli, ma de malangilangi i dono mmahi,

ia e uluhia i de hano e hebagi.

22 Ia e gadagada i dono dee madagu, ia e dee madagu i dahi mee daudahi;

gai e dee hagaui gee donu i ma te gadilaasa.

23 De mee e hhao ai denga dao o de mee hholu e daudau i dono gaogao e dadangi,

ma tao looloa ma tao bodobodo e dabadaba mai i dono gaogao.

24 Gai ia e uluhia ma de gemo i de savini,

ia e dee maua i de noho donu huu i de masavaa e ili ai de hanga manu.

25 Ia e busi luoono bongaa usu i de ili denga hanga manu, gai e hagadaba, ‘Aha!’

Ia e dungua de hai taua i de mommee mmao,

ma de oo o denga dagi, ma de hagahia i taamada o taua.

26 E aha, niiou de heiangi o de hawk e lele ai laa,

ma de doha ai luoono bakau ga lele ai gi ngaage?

27 Gai go koe e hai ange laa gi de igele gi lele gi hanage gi de mommee maolunga

gi haia ai dono hoohanga?

28 Ia e noho i honga dahi hadu maolunga ma de seni i kilaa i de boo;

gai dono mommee buibui makaga go honga dahi hadu kangi.

29 Ia e noho i kilaa ma e dagitilo mai be ni aha aana e mau i de gai;

luoono mada e gidee adu de mommee mmao.

30 Ana dama e unu denga dodo,

gai de mommee iai de gau gu daia ga maakau, gai go kilaa hogi oona iai.” *Mat 24.28; Luke 17.37