De Beebaa go
Joel
Hanu dagodo o de beebaa nei
Taane ne siia de beebaa nei go de pelaabisi go Joel, tama daane a Pethuel. E dee lagolago adaadeu mee e iloo i dagodo o de pelaabisi nei, e dee iloo danuaa hogi dono masavaa nogo mouli ai. Agu made de beebaa nei ne sisi i de lima be go de haa centuryb.c., i de masavaa o de nohoanga hodooligi o Persia. Joel ne tala pelaabisi de loomai o denga itebuubuu, ga oha mee e ssomo i honga de henua, ma de masavaa teai ai vai. Ia ne tilo bolo de mee nei go de hagailonga o de dae mai o de laangi o Tagi Maolunga, go de masavaa a Tagi Maolunga e hagaduasala ai dangada e hai baasi ange gi dana hagatau heohi.
Joel ne tala ange gi dangada bolo Tagi Maolunga e lodo gilaadeu gi daahuli olaadeu lodo. Ia ne tala ange hogi bolo de Maadua gu hagatoo donu ange gi ono dangada, bolo ia e hagaahe ange naa delaadeu manuuia.
Dahi mee e heohi i de hagamaanadu: go de hagatoo donu a de Maadua, bolo ia e hai naa gi hano iho dono Hagasaalunga gi honga o dangada alodahi — go denga daane ma haahine, ma de gau mmodo aama de gau madumaatua alodahi (2.28-29).
Hanu gubu hagamogomogo: “E hagadaba Tagi Maolunga, ‘Goodou aahe mai gi de au iainei, i oodou lodo alodahi, goodou hagahiikai, ma de tangi, aama de daemaha oodou lodo.’ Hagaagona mai de daemaha abodonu oodou lodo, e dee go de saesae donu huu oodou malo. Gai aahe mai gi Tagi Maolunga doodou Maadua, go hiidinga ia e abodonu ma de lodo aloha. Ia e dee moolau de lili, gai e honu i de lodo aloha, gai ia ga dee gaamai de baubau gu dai humai laa” (2.12-13).
Denga vaevaaenga
De loomai o denga itebuubuu (1.1—2.17)
De hagatoo donu e hagaahe ange de manuuia (2.18-27)
De laangi o Tagi Maolunga(2.28—3.21)
1
1 Tagi Maolunga ne hagailoo ange ana muna gi Joel, tama daane a Pethuel.
De oha a denga itebuubuu honga de henua
2 Denga daane maatua, goodou hagalaangona muna nei,
alodahi e nnoho i honga de henua, hagalaangona.
Gu hanu laa hegau bee nei ne hai i doodou masavaa,
aabe go de masavaa o odaadeu dubuna madagidagi?
3 Daalaa ange mee nei gi oodou dama,
gai gilaadeu gi daalaa ange gi alaadeu dama,
gai alaadeu dama gi daalaa ange gi de atangada i olaadeu dua.
4 Mee ne doe i gai a denga itebuubuu,
gai de hagabuulingaa itebuubuu gu gai;
mee ne doe mai i de hagabuulingaa itebuubuu
gai denga itebuubuu e tolo laa gu gai;
mee ne doe mai i denga itebuubuu e tolo laa
gai denga itebuubuu ange laa gu gai.*Denga hagadaagangaa itebuubuu nei e dee iloo danuaa olaadeu dagodo.
5 De gau ssenga, goodou aalahage tangi;
alodahi e unumia uvaini, goodou tangi ssee,
goodou tangi, i hiidinga gu deai donu uvaini maimai,
gai gu gaavee gi dee unumia ai e goodou.
6 Dahi huaahenua gu kage mai gi honga dogu henua,
gilaadeu e mmahi gai e dee maua i de dau;
olaadeu niho e bei niho o dahi laiono,
gai e kangi bei niho o de laiono hahine.*Rev 9.8
7 Gilaadeu gu oha agu grapevine,
ma de hagabaubau agu fig.
Gai gu holehole ma gu deai gili o denga manu,
gai laa o denga manu gu tea.
8 Goodou tangi bei de bua moe e gahu laa i malo daladala
i hiidinga dono hinangalosaa i dono bodu.
9 Gu deai donu sigidaumaha o grain ma mee unu
i de hale o Tagi Maolunga.
De gau haimeedabu gu tangi,
aanei gilaadeu ne haia hegau i mada luu mada o Tagi Maolunga.
10 Denga veelenga gu ngadi daakodo,
gai de gelegele gu hagahinangalosaa ono dagodo;
denga grain gu lava i de oha,
gu deai donu hogi uvaini hoou ma lolo.
11 De gau hai veelenga, go goodou gi dookaa,
de gau e dooa denga grapevine, goodou tangi see;
goodou tangi i teai wheat ma barley;
go hiidinga teai huamanu e hagihagi.
12 De grapevine gu magau,
de fig gu mmae;
de pomegranate, ma de palm aama de apple hogi,
denga manu ssomo alodahi gu odi i de maakau.
Gai gu deai donu se malangilangi i daho dangada.
De hagahi ange dangada gi tangi
13 De gau haimeedabu,
goodou kahu i malo daladala, ma de tangi,
de gau hai hegau i de mommee o ssigidaumaha,
goodou tangi ssee.
De gau e haia hegau i mada luu mada o dogu Maadua,
goodou loomai, kahu i malo daladala i dahi boo;
go hiidinga gu deai donu sigidaumaha o grain ma sigidaumaha o mee unu,
e gaamai gi de hale o doodou Maadua!
14 Hagailoo ina de hagahiikai dabu;
hagailoo ina de hagabuni dabu.
Hagabuni ina denga dagi
ma dangada alodahi e nnoho i de henua
gi de hale o Tagi Maolunga doodou Maadua,
gai dalodalo ange gi Tagi Maolunga.
15 E vakaa naa gidaadeu i de laangi laa!
Go hiidinga de laangi o Tagi Maolunga gu baa mai donu,
gai de Ia Mmahi Mmao e oha naa donu de henua.*Isa 13.6
16 E aha, gidaadeu tee gidee laa teai gai,
ma teai se malangilangi be se lodo danuaa
i de hale o taadeu Maadua?
17 Denga golee i lo te gelegele gu pobo.
Denga hale doange gu deai mee iai;
denga mommee e hhao ai grain gu maoha,
go hiidinga gu deai donu grain e hhao ai.
18 Denga manu haangai gu tangi!
Denga kaau gu ngadi hulo saele donu huu,
go hiidinga gu deai mommee iai helii;
denga ssiibi gu duasala donu hogi.
19 Tagi Maolunga, au e dangidangi adu gi de goe,
go hiidinga de ahi gu dudu ma gu odi
denga mommee iai helii i lodo henua,
gai de ula o de ahi gu dudu
denga manu ssomo alodahi i honga de henua.
20 Gai manu lodo henua gu tangi adu gi de goe;
go hiidinga denga saalingaa vai gu deai vai iai,
gai de ahi gu dudu denga mommee iai helii.