2
De hagabuulingaa itebuubuu
1 Ilihia de hanga manu i Zion,
gai ilihia i honga dogu mounga dabu.
Gai dangada alodahi i honga de henua gi maatagu,
i hiidinga de laangi o Tagi Maolunga e dae mai naa.
Gai gu baa mai donu —
2 se laangi gohu ma teai se maalama iai,
se laangi hagausinga ina ma de gohu boo dangodango.
Gai de hagabuulinga hebagi soa ma de mmahi
gu bei de haolia o honga denga mounga i de gohu,
gai tigi ai donu mee bee nei ne hai madagidagi,
gai e deai naa hogi mee bee nei e hai i muli mai,
i ngadau o denga atangada alodahi e loomai.
3 De ahi e dudu naa mee i ono mada i mua,
gai de ula o de ahi e hanadu naa i olaadeu dua.
De henua gu bei de veelenga o Eden i olaadeu mada i mua,
gai olaadeu dua gu lodo henua e ngadi dagodo,
gai e deai donu mee e maua gi ola mai i gilaadeu.
4 Gilaadeu e bei holiholinga o denga hoosa;
gai e saavini bei denga hoosa hebagi.*Rev 9.7-9
5 Gai e hagalongaa bei de saavini o denga hada hebagi,
gilaadeu e saavini mai naa laa honga denga mounga,
bei de hogihogi o de ahi e duungia laa denga helii,
ma de hagabuulinga hebagi mmahi gu hagatau laa e hebagi.
6 Denga huaadangada gu maatagu
i delaadeu gidee mee nei:
gai dangada alodahi gu mada tea olaadeu mada.
7 Gilaadeu e saavini bei denga daane dau o de hebagi,
gilaadeu e kage i de buibui bei denga daane hebagi.
Dahi ma dahi e seesee donu huu i dono duulanga,
e dee daa donu gi de baasi.
8 Gilaadeu e dee hagadau usu donu,
gai dahi ma dahi e hagasoe donu gi mua.
Gilaadeu e ulu gi lodo mommee buibui
gai e deai e maua i de oha olaadeu hagabuulinga.
9 Gilaadeu e llele laa honga de aduhale,
gilaadeu e saavini i honga denga buibui;
gilaadeu e kage age gi lodo hale,
gai gilaadeu e ulu naa i denga abaaba vaaligiligi bei tangada gaiaa.
10 Henua i lalo ma de langi gu ngalungaalue i delaadeu loomai.
De laa ma de maasina gu hagagohu,
gai denga heduu gu llilo gu dee maalama.*Rev 8.12
11 Tagi Maolunga e basa
i mada i mua o dono hagabuulinga hebagi;
dono hagabuulinga hebagi e laumalie mmao,
gai de ia e hagassula ina ana muna e mmahi mmao.
De laangi o Tagi Maolunga e maolunga, ma de hagamaatagu mmao;
goai e bau ange aagena?*Rev 6.17
Aahe mai gi Tagi Maolunga
12 E hagadaba Tagi Maolunga,
“Goodou aahe mai gi de au iainei, i oodou lodo alodahi,
goodou hagahiikai, ma de tangi, aama de daemaha oodou lodo.”
13 Hagaagona mai de daemaha abodonu oodou lodo,
e dee go de saesae donu huu oodou malo.
Gai aahe mai gi Tagi Maolunga doodou Maadua,
go hiidinga ia e abodonu ma de lodo aloha.
Ia e dee moolau de lili, gai e honu i de lodo aloha,
gai ia ga dee gaamai de baubau gu dai humai laa.
14 Gai goai e iloo be ia e dee ahe naa
dana maanadu ga dugu dahi manuuia,
bei sigidaumaha o denga grain ma sigidaumaha o mee unu
e vange gi Tagi Maolunga doodou Maadua?
15 Ilihia de hanga manu i Zion;
hagailoo ina de hai de hagahiikai dabu,
ma de hagahi mai dangada gi de hagabuni dabu.
16 Hagabuni ina mai de huaadangada;
haia gi dabu de hagabuulingaa dangada.
Hagabuni ina denga daane maatua;
hagabuni ina mai denga gauligi,
ma denga gaagaa goi unuunu laa.
Taane se goodo hai bodu gi sao mai i dono aabi,
gai de hine se goodo hai bodu gi sao mai hogi i dono aabi.
17 De gau haimeedabu e hai hegau laa i mada luu mada o Tagi Maolunga
gi tangi i magavaa o de velanda o de temple ma de mommee o ssigidaumaha.
Gilaadeu gi hagataba, “Tagi Maolunga, hagaola ina oo dangada.
Koe gi dee haia gi hagangadi mee ina dangada o doo boolonga,
aabe gi daalaa hakadanga i daho denga huaahenua.
Gai gu aha gu hagataba ai denga huaahenua,
‘I hee iai delaadeu Maadua?’ ”
Muna a Tagi Maolunga ne basa ange ai
18 Gai Tagi Maolunga gu lodo gaiaa i hiidinga o dono henua,
ia gu lodo aloha hogi i ono dangada.
19 Gai Tagi Maolunga e basa ange naa ga hai ange gi gilaadeu:
“Tilo, au e gaavadu naa gi goodou
denga grain, ma uvaini hoou, aama lolo lagolago,
goodou e gaimee naa ga boobosu;
gai au e dee ahe ange naa donu e dugu ange denga huaahenua
gi hagangadi mee ina goodou.
20 Au e kave gee naa denga itebuubuu mai i ngaiho
gi mmao gee mai i goodou,
ga hai gi hulo gi de vao
e deai laa vai iai gai se ngadi mommee.
Denga itebuubuu e hulo i mua,
e too ange naa gi lo te dai i baasi i dua,*lo te dai i baasi i dua e bei go Tai Magau.
gai denga itebuubuu e loomai i muli
e too ange naa gi lo te dai i baasi dai;†lo te dai i baasi dai e bei go Mediterranean.
gai e maakau naa ga pilo,
i hiidinga ia gu hai hanu hegau hagalele mouli.”
21 De henua, aude madagu,
gai lodo danuaa ma de malangilangi.
Ni muna abodonu, Tagi Maolunga gu hai hanu hegau hagalele mouli.
22 Denga manu lodo henua, goodou aude maatagu,
denga mommee iai helii i lodo henua
gu dai aahe ange naa ga lau kohu.
Denga manu ssomo gu dai hhua naa,
de fig ma de grapevine ngaadahi gu hhua lagolago.
23 Dangada o Zion, goodou llodo danuaa,
ma de malangilangi i Tagi Maolunga doodou Maadua,
go hiidinga ia gu gaavadu gi goodou de langi pala,
i malama hagaodi o de ngadau i hiidinga dono heohi.
Ia ne hai gi pala iho de langi laumalie,
i de hagaodi ma taamada o de ngadau,
bei denga masavaa gu hulo.
24 Denga mommee hili huamanu e hoohonu naa i denga grain;
gai mommee kumi uvaini ma lolo e hoohonu naa ga malingilingi.
25 Au e hagaahe adu naa gi goodou mee i ngadau
a de hagabuulingaa itebuubuu gu gai —
go itebuubuu e tolo, ma de oha, aama de duuduudia mee — ‡Denga hagadaagangaa itebuubuu nei e dee iloo danuaa olaadeu dagodo.
go de hagabuulinga hebagi soa aagu ne hai gi loadu gi oodou magavaa.
26 Goodou e lagolago naa oodou gai, goodou e gaimee naa ga boobosu,
gai goodou ga tuhi ai naa de ingoo o Tagi Maolunga doodou Maadua,
i dana hai mee hagalele mouli i oodou daha;
gai ogu dangada e dee aahe ange naa donu ga dookaa.
27 Gai goodou e tonu ange naa bolo au e noho donu i Israel,
gai go au go Iahweh doodou Maadua,
e deai ange donu;
ogu dangada e dee aahe ange naa donu ga dookaa.
De hano iho o de Hagasaalunga o Tagi Maolunga
28 Muli mai naa huu,
gai au e hai naa gi hano iho dogu Hagasaalunga
gi honga o dangada alodahi;
oodou dama daane ma oodou damaa hine e pasa pelaabisi naa,
oodou daane maatua e hai naa denga midi,
gai oodou dama daane e hai naa denga midi hagaago ange.*Acts 2.17-21
29 Gai au e hai naa hogi gi hano iho dogu Hagasaalunga
gi honga oodou daane ma haahine hai hegau i denga laangi laa.
30 Gai au e hai naa mee hagalele mouli i lo te langi
ma honga henua i lalo,
i denga dodo, ma de ahi aama de useahi.
31 De laa e hagagohu naa,
gai de maasina e bei naa denga dodo,
i mua de dae mai de laangi maolunga ma de hagamaatagu o Tagi Maolunga.*Mat 24.29; Mark 13.24-25; Luke 21.25; Rev 6.12-13
32 Gai dangada alodahi e hagahia ange
de ingoo o Tagi Maolunga e hagamouli;
Gai dangada e hagaola naa i honga de mounga go Zion ma Jerusalem,
bei de hai a Tagi Maolunga gu tala ai laa;
dangada ne ola,
go gilaadeu a Tagi Maolunga ne hagahi.*Rom 10.13
*2:4 Rev 9.7-9
*2:10 Rev 8.12
*2:11 Rev 6.17
*2:20 lo te dai i baasi i dua e bei go Tai Magau.
†2:20 lo te dai i baasi dai e bei go Mediterranean.
‡2:25 Denga hagadaagangaa itebuubuu nei e dee iloo danuaa olaadeu dagodo.
*2:28 Acts 2.17-21
*2:31 Mat 24.29; Mark 13.24-25; Luke 21.25; Rev 6.12-13
*2:32 Rom 10.13