3
De hagamodu muna o huaahenua
1 “Tilo, laangi laa ma de masavaa laa,
gai au e hagaahe ange naa de manuuia o Judah ma Jerusalem.
2 Au e hagabuni mai naa denga huaahenua alodahi
gi de Geelonga o Jehoshaphat.*Jehoshaphat i muna Hebrew e bei go Tagi Maolunga e hagamodu; diiloo hogi de gubu e 12.
Gai au ga hagamodu ai olaadeu muna i kilaa,
i hiidinga o dogu boolonga, go dangada o Israel,
go hiidinga gilaadeu ne hai ga mavaevae saele
ogu dangada gi denga huaahenua,
ma de vaevae dogu henua.
3 Gilaadeu ne hai tada i ogu dangada,
ma de hagao dahi gauligi daane
i dahi haahine hai be se manu;
gilaadeu ne hagao alaadeu uvaini i dahi gauligi haahine.
4 Tyre ma Sidon, aama Philistia alodahi, ni aha oodou gu hai mai nei gi de au? Goodou gu llodo nei e sui mai agu mee gu hai adu gi goodou? Noo goodou e llodo e sui mai gi de au, gai e moolau naa donu dagu sui adu oodou hegau gu hai.*Isa 14.29-31; 23.1-18; Jer 47.1-7; Ezk 25.15—28.26; Amos 1.6-10; Zep 2.4-7; Zec 9.1-7; Mat 11.21-22; Luke 10.13-14 5 Go hiidinga goodou ne kave agu selevaa ma agu goolo, ma de mmoli ogu goloa hagamogomogo gi lodo oodou temple. 6 Goodou ne hagao ange dangada o Judah ma Jerusalem gi de gau Greek, gai koe ga hai ai gilaadeu gi hulo gi dahi mommee mmao gee mai i delaadeu henua.
7 Tilo, au e hagaahe mai naa gilaadeu i de mommee oodou ne hagao ange gilaadeu aagena, gai au e sui adu naa oodou hegau gu hai. 8 Au e hagao ange naa oodou dama daane ma damaa hine gi dangada o Judah, gai gilaadeu e hagao ange naa gilaadeu gi de gau Seba, go dahi huaahenua mmao.” Go Tagi Maolunga e hagadaba.
9 Hagailoo ina muna nei i denga huaahenua:
hagadaabena ange gi de hebagi;
hagabuni ina mai denga daane mmahi!
Gai denga daane hebagi alodahi gi loomai e hebagi.
10 Dugidugia oodou mee hagabalabala e hai ai gadilaasa,
gai haia oodou naivi velevele e hai ai denga dao.
Taane baageaa gi hagadaba,
“Au se daane mmahi!” *Isa 2.4; Mic 4.3
11 Denga huaahenua alodahi i luu baasi,
goodou hagamoolau mai hagabuni i kilaa.
Tagi Maolunga, haia gi loomai oo daane hebagi!
12 Haia gi loomai denga huaahenua;
haia gilaadeu gi hulo gi de Geelonga o Jehoshaphat.
Go hiidinga au e noho naa i dogu nohoanga i kilaa
ga hagamodu ai muna o denga huaahenua i luu baasi delaadeu henua.
13 Hagaabo ina de kamaa,
go hiidinga denga huamanu gu lleu.
Hannoo, dagadagahia denga grape,
i hiidinga gu honu de mommee e kumi ai uvaini,
gai mommee hhao uvaini gu honu malingilingi —
olaadeu baubau gu lagolago mmao!*Rev 14.14-16, 19-20; 19.15
14 Dangada soa mmao, dangada soa mmao,
i lo te geelonga e hagamodu ai muna!
Go hiidinga de laangi o Tagi Maolunga gu baa mai donu
gi de geelonga e hagamodu ai muna.
15 De laa ma de maasina e hagagohu naa,
gai denga heduu e llilo naa.
16 Tagi Maolunga e haganngolo mai i Zion,
gai e hai gi paa mai de hatuli i Jerusalem;
de langi ma henua i lalo e ngalungaalue naa.
Aagai Tagi Maolunga go de buibui o ono dangada,
gai ia se mommee buibui makaga niio de gau Israel.*Amos 1.2
Manuuia ange gi dangada o de Maadua
17 “Gai goodou e iloo naa, bolo go au donu go Iahweh doodou Maadua,
e noho laa i Zion, dogu mounga dabu.
Jerusalem e hai naa gi dabu;
gai de gau henua gee e dee aahe ange donu e kage mai gi honga de henua.
18 De laangi laa gai e hai naa tau uvaini i honga denga mounga,
gai e lagolago naa vai uu i honga denga duuduu;
denga saalingaa vai alodahi o Judah nogo deai vai iai e ssali ai naa vai.
Gai dahi vai e sali mai naa i de hale o Tagi Maolunga,
ga hagamaluulu de geelonga o Shittim.
19 Egypt e hai naa ga deai dangada iai,
gai Edom e bei naa de vao e deai laa dangada iai,
go hiidinga delaadeu vaivai hai dangada o Judah,
ma delaadeu daa dangada tigi haisala ga maakau.
20 Judah e nnoho ai naa dangada ga hano ai,
gai Jerusalem e noholia naa i atangada alodahi.
21 Au e sui ange naa dodo olaadeu gu maakau,
aagu tigi sui ange laa.
Gai Tagi Maolunga e noho naa i Zion.”