2
Talodalo a Jonah
1 Gai Jonah ne dangidangi ange gi Tagi Maolunga dono Maadua i dono noho i lo te dinae o de mamu laa, 2 ga hai ange,
“Au ne dangidangi ange gi Tagi Maolunga i dogu hai ngadaa,
gai ia ne basa mai gi dagu dangidangi;
au ne hagahi ange ia
mai i tagelo o de mommee o de gau maakau,
gai koe ne hagallongo dagu dangidangi.
3 Koe ne maga ange au gi lo te moana gelo,
ma lo te dagelo o denga lausedi,
gai denga lausedi ne duuli au.
Gai au beau alodahi ma de mee mmilo
gu hadihadi iho gi ogu elunga.
4 Gai au ne hagadaba, ‘Au gu aau gee mai i mada luoo mada;
aagai au e ahe ange naa ga gidee doo temple dabu.’
5 Denga lausedi gu loomosi au ma gu dai malemo;
au gu abulu gi lo te moana gelo,
denga helii lausedi gu pigi mai gi dogu biho.
6 Au ne abulu ga baa i de tagelo o denga mounga,
gelegele i tagelo o de moana gu daohi au ga hano ai;
gai koe, Tagi Maolunga dogu Maadua,
ne hagaola dogu mouli mai i de mommee o de magau.
7 Dogu masavaa ne dai magau ai,
gai au gu manadua goe, Tagi Maolunga.
Au ne dalodalo adu gi de goe
i doo temple dabu.
8 Gilaadeu e daumaha ange gi denga ngadi diinonga
e daahuli gee doo abodonu ange gi gilaadeu.
9 Aagai au e hagaahe adu donu de abodonu
ma de ssigidaumaha adu gi de goe.
Au e hai naa donu gi bei agu mee gu hagatoo donu ai.
De hagaola se mee mai i daho Tagi Maolunga.”
10 Gai Tagi Maolunga ga basa ange gi de mamu laa, gai de mamu laa ga busi age Jonah gi honga de henua.