19
Hainga o de hagagilimalali
1 Gai Tagi Maolunga ne hai ange gi Moses ma Aaron, 2 “Deenei de hainga a Tagi Maolunga gu hagasauaa adu gi goodou: koe hai ange gi de gau Israel, gilaadeu gi gaamai gi de goe e dahi kaau hahine mmea, e deai laa mee baubau i dono angaanga, gai tigi ai se laagau hagahai hegau ne nnoa ange gi honga dono eu. 3 Gai goodou ga gaavange gi tangada haimeedabu go Eleazar, gai de manu laa e kave gi tua de mommee nnoho gaainga, e daa ai gi magau i ono mada i mua. 4 Gai tangada haimeedabu go Eleazar gi gaavee hanu dodo i dono madannia, gai ia ga huli ange gi de mommee e duu ai de hale malo hagabuni, ga hagatoo madaua ai dodo laa i e hidu hanonga. 5 Gai de kaau laa e dudu alodahi i ono mada i mua; dono gili, ma ono kano, ma ono dodo, aama ono dae. 6 Gai tangada haimeedabu gi magaa ange hanu laagau cedar ma dahi laa hyssop aama hanu huga malo mmea gi lo te ahi, e dudu ai laa de kaau laa. 7 Gai tangada haimeedabu gi daia ono malo ga gaugau. Gai ia gu maua i de ahe mai gi de mommee nnoho gaainga, gai ia e dee gilimalali ga dae ai gi de ahiahi. 8 Gai tangada e duungia laa de kaau laa e taa hogi ono malo ga gaugau, gai ia e dee gilimalali ga dae ai gi de ahiahi.
9 Gai dahi daane gilimalali laa gi hagabudulia lehu o de kaau laa, ga kave ga dugua i dahi mommee gilimalali i tua de mommee nnoho gaainga; gai lehu nei ni mee e hagadabena ange gi de gau Israel e hai ai vai hagagilimalali, e hagagilimalali ai haisala.*Heb 9.13 10 Tangada e hagabudulia laa lehu o de kaau laa e taa hogi ono malo, gai ia e dee gilimalali ga dae ai gi de ahiahi. De mee nei se hainga gu hagasauaa ange gi de gau Israel, ma de gau henua gee e nnoho i olaadeu magavaa ga hano ai.
11 Tangada e poo ange laa gi tangada magau e dee gilimalali i e hidu laangi. 12 Gai ia ga hagagilimalali ia i vai hagagilimalali laa, i dua e dolu laangi ma dua de hidu laangi, gai ia gu gilimalali. Aagai noo ia e dee hagagilimalali ia i dua e dolu laangi ma dua de hidu langi, gai ia e dee gilimalali. 13 Gai be goai e poo ange gi de angaanga o dahi dangada magau, gai e dee hagagilimalali ia, gai ia e hai gi dee gilimalali de tabernacle o Tagi Maolunga, tangada laa e vvae gee donu mai i daho de gau Israel. Go hiidinga denga vai hagagilimalali laa tigi hagatoo madaua ange gi de ia, gai ia goi dee gilimalali donu huu.
14 Gai deenei de hainga ange gi de masavaa o dahi dangada e magau ai i dahi hale malo: dangada alodahi e ulu i lo te hale laa, ma dangada alodahi e nnoho i kilaa gu dee gilimalali i e hidu laangi. 15 Gai denga ssaa alodahi e deai olaadeu pono, i lo te hale laa gu dee gilimalali.
16 Gai be goai e poo ange gi tangada gu daia ma gu magau i de gadilaasa i lo te duu malaelae, be se dangada ne magau donu huu i de ia, be go ivi o dahi dangada magau, aabe go dahi daanunga, gai ia e dee gilimalali i e hidu laangi.
17 Gai tangada gu dee gilimalali laa, gilaadeu gi gaamai hanu lehu o de kaau mmea ne hai ai laa ssigidaumaha dudu, ga hhao ange madali hanu vai hoou gi dahi ssaa; 18 gai dahi dangada e gilimalali laa gi gaavee dahi laa hyssop gi hagasulu ina ange gi lodo vai laa, ga hagassii ina ange gi de hale malo, ma honga goloa alodahi i lo te hale, ma honga o dangada alodahi i kilaa, aama dangada alodahi gu poo ange laa gi hanu ivi o tangada magau, be go tangada ne daia laa ga magau, be go tangada maakau, aabe go dahi daanunga. 19 Gai tangada e gilimalali laa gi hagassii ange vai laa gi tangada gu dee gilimalali laa i tolu laangi ma de hidu laangi; gai de hidu laangi naa huu gai tangada gi hagagilimalali ina ia, ga taa ono malo ma de gaugau, gai ia gu gilimalali i de ahiahi laa. 20 Aagai noo tangada gu dee gilimalali laa e dee hagagilimalali ia, gai ia e vvae gee donu mai i daho de hagabuulingaa dangada, i hiidinga ia gu hai ma gu dee gilimalali de mommee dabu o Tagi Maolunga. Ia tigi gilimalali, i hiidinga vai o de hagagilimalali tigi hagatoo madaua ange gi de ia. 21 Gai de hainga nei gu hagasauaa ange gi gilaadeu ga hano ai.
Gai tangada ne hagatoo madaua ange laa vai o de hagagilimalali gi daia hogi ono malo; gai dangada alodahi gu poo ange gi vai o de hagagilimalali gu dee gilimalali ga dae ai gi de ahiahi. 22 Gai mee alodahi a tangada dee gilimalali laa e poo ange aagena gu dee gilimalali hogi; gai dangada alodahi oona e poo ange aagena gu dee gilimalali hogi ga dae ai gi de ahiahi.”